Lajme flash
Sarandë, u kap me armë pa leje, çobani dënohet me 3 vjet e 4 muaj burg
7 Mars 2025, 19:40 / AKTUALITET
Një çoban 30-vjecar nga Delvina është dënuar me 3 vjet e 4 muaj burg nga Gjykata e Sarandës nën akuzën e “mbajta pa leje dhe prodhimi i armëve, armëve shpërthyese dhe municionit”. Dënimi i dhënë për të ishte 5 vjet burg, por Marius Haxhi përfitoi nga gjykimi i shkurtuar.
Ngjarja për të cilën akuzohet 30-vjecari ka ndodhur në 1 korrik 2024. Në bazë të informacioneve të siguruara në rrugë operative, sipas të cilave i pandehuri Marius Haxhi, në afërsi të fshatit Bajkaj, lëvizte me armë zjarri me vete AK-47(Kallashnikov), është ngritur një grup pune dhe është shkuar në adresën e lartpërmendur për të bërë të mundur verifikimin e këtij informacioni. Shërbimet e Policisë të Komisariatit Sarandë kanë shkuar në fshatin Bajkaj, në afërsi ku ndodhet resort “Bio Farm Caca”, ku është konstatuar shtetasi Marius Haxhi, i cili pranë një shkurreje po kontrollonte brenda një thesi me ngjyrë të bardhë. Sapo i janë afruar punonjësit e policisë, ky shtetas tentoi të largohej por u bë e mundur kapja e tij. Bashkë me të, policia shkoi pranë vendit ku ndodhej thesi i bardhë, ku në brendësi të të cilit u konstatua një armë zjarri automatike bashkë me një krehër. Gjatë marrjes në pyetje, Haxhi deklaroi se nuk ka lidhje fare me armën e zjarrit, pasi ishte duke kullotur bagëtitë.
Nga ana e policisë, janë administruar pamje filmike të filmuara nga droni i policisë, nga këqyrja e të cilave konstatohet Haxhi që shkon në vendin ku është gjetur arma dhee një person tjetër, i cili largohet me makinë dhe më pas ndërhyjnë punonjësit e policisë që arrestojnë të dyshuarin.
Gjatë seancës gjyqësore, mbrojtësi i të pandehurit është shprehur se “nuk ka prova të paraqitura dhe të depozituara në fashikullin e Prokurorit që të vërtetojnë që i pandehuri e mbante armën në mënyrë aktive ose e dispononte atë. Pamjet filmike tregojnë një individ tjetër që largohet nga vendi i ngjarjes, duke ngritur dyshime mbi posedimin faktik të armës nga i pandehuri. Fakti që nga akti i ekspertimit të armës nuk janë gjetur gjurmë të të pandehurit e përforcon këtë dyshim dhe ul besueshmërinë e akuzës.
Për me tepër forcat e policisë kanë shkuar afër stanit kanë thirrur të pandehurin dhe e kanë cuar në një vend me shkurre për t’ju treguar se ku ndodhej arma. Këtë fakt punonjësit e policisë nuk e kanë dokumentuar me pamje filmike, pra momentin që kanë shkuar dhe kanë marrë të pandehurin. I pandehuri ka mohuar që të ketë patur një armë të tillë dhe nuk e ka patur asnjë herë. Është një fermer i rregullt, që merret me punë bujqësore dhe blegtori duke kontribuar në ekonominë e tij dhe të familjes, ku së bashku me prindërit e tij kanë rreth 300 krerë dele”.
Pavarësisht pretendimeve të mbrojtjes, Gjykata e ka dënuar 30-vjecarin me 3 vjet e 4 muaj heqje lirie.
Po ndodh...
ide
top
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128