Lajme flash
Derbi luhet vetëm për fitore, Partizani e Tirana vijnë në pozita të ndryshme në këtë përballje
29 Nëntor 2024, 14:29 / SPORT
Tirana e Partizani do të synojnë triumfin në derbin e së dielës.
Dy skuadrat vijnë në pozita krejtësisht të ndryshme në kampionat, me të kuqtë që kryesojnë Superligën, ndërsa bardheblutë pranë fundit të renditjes.
Kalendari i javës së 15-të i Superligës shqiptare sjell kryendeshjen Tirana-Partizani.
Derbi i kryeqytetit do të luhet ditën e dielë, duke nisur nga ora 19:00, në stadiumin ‘Air Albania’.
Lajmi i mirë është që shkallët e stadiumit do të kenë prezencë të tifozëve, pas vendimit të Apelit, që hodhi poshtë atë të Komisionit të Disiplinës, për kyçjen e stadiumit për Tiranën, deri në fundin e edicionit aktual.
Por ky derbi i gjen skuadrat në pozita krejtësisht të ndryshme.
‘Të kuqtë’ kërkojnë të mbrojnë kryesimin e renditjes, ku ndodhen në kuotën e 27 pikëve, teksa ndjek Vllaznia me vetëm 2 pikë më pak.
Nga krahu tjetër, ‘bardheblutë’ ndodhen shumë larg pritshmërive të fillim sezonit, ku aktualisht pozicionohen në të shtatin, me 15 pikë.
Por pavarësisht rrethanave dhe formës respektive të të dy skuadrave, derbi mbetet derbi dhe askush nuk hyn në fushën e blertë si favorit.
Historia na ka mësuar, që përballjet derbi kanë prodhuar shpesh herë rezultate surprizë dhe sigurisht ai i së dielës mund të jetë një i tillë.
Për këtë sfidë, trajneri i Tiranës, Gugash Magani do të ketë grupin e plotë të lojtarëve, pasi të gjithë janë rikuperuar nga dëmtimet, apo pezullimet nga kartonat.
Nga krahu tjetër, Aleksandër Veselinoviç nuk i ka të gjithë futbollistët në dispozicion.
Mehmeti do të mungoj për shkak lëndimi, ndërsa Ismajli pritet të ‘shtrëngojë dhëmbët’ dhe të rikthehet në mesin e fushës titullar, teksa janë ende në mëdyshje Tedi Cara e Andi Hadroj.
Për sa i përket bilancit të përballjeve mes tyre, ajo flet për ‘demat e kuq’.
Në 175 takime në total, mes kampionatit dhe kupës, Partizani ka triumfuar në 73 raste, Tirana në 47, ndërsa 55 ndeshje janë mbyllur në barazim.
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128