Lajme flash
Milan dhe Inter ofertë zyrtare për të blerë ‘San Siron’, pritet stadium i ri
12 Mars 2025, 17:54 / SPORT
FC Inter dhe AC Milan zyrtarizuan të martën ofertën e tyre të përbashkët për të ndërtuar një stadium të ri në vendin e ikonës ‘San Siro’, pasi paraqitën një studim fizibiliteti tek autoritetet lokale në qytetin verior italian.
Një pjesë e propozimit përfshin një ofertë për të blerë tokën në të cilën ndodhet stadiumi aktual, në pronësi të qytetit, me klubet që thonë se ata “po synonin të përfundonin procesin e blerjes deri në korrik 2025”.
“Dokumenti përmban propozimin për blerjen e stadiumit Giuseppe Meazza (San Siro) dhe zonave përreth, së bashku me një plan fizibiliteti për ndërtimin e një stadiumi më të avancuar”, thuhet në një deklaratë të klubeve.
“Gjatë muajve të ardhshëm, të dy klubet do të angazhohen me administratën komunale për të diskutuar dhe përmirësuar detajet dhe elementët dallues të propozimit… Koncepti përfundimtar dhe projekti ekzekutiv mund të prezantohen përfundimisht në një fazë të mëvonshme dhe nuk janë pjesë e paraqitjes së sotme”.
Javën e kaluar kryetari i bashkisë së Milanos, Giuseppe Sala tha se ai shpresonte të përfundonte këtë punë “deri në pushimet verore”.
Gjigantët e futbollit evropian, Interi dhe Milani kanë dashur prej kohësh të zëvendësojnë San Siron aktuale me një arenë moderne dhe në tetor rifilluan një projekt të përbashkët, i cili u braktis në vitin 2023 pasi kaloi mbi tre vjet duke dredhur në korridoret burokratike dhe politike.
Përpara se të ndodhte ndonjë prishje e terrenit aktual, një stadium i ri, i cili në projektin e mëparshëm ishte planifikuar të kishte një kapacitet prej 60,000, por këtë herë thuhet se është rritur në mbi 70,000, do të ndërtohej menjëherë në perëndim të terrenit aktual, në parkingun e makinave dhe një park lokal.
Puna nuk do të fillonte përpara Lojërave Olimpike Dimërore të vitit të ardhshëm, kur ‘San Siro’ aktual do të presë ceremoninë e hapjes dhe çdo shitje e tokës publike do të duhet të kalojë përmes këshillit të qytetit.
Ka patur shqetësim nga këshilltarët në të gjithë spektrin politik, me zemërim për atë që ata e shohin si anashkalim të demokracisë lokale, ndërsa Sala përpiqet të detyrojë projektin të vijojë për të shmangur të bëhet kryebashkiaku që lejoi dy nga klubet më të mëdha të futbollit në botë të largoheshin nga qyteti.
Ndërkohë, tifozët kanë shprehur shqetësimin se një stadium i ri do të çonte në rritje të mëtejshme të çmimeve të biletave pasi zonat e mikpritjes zëvendësojnë vendet për tifozët e rregullt, të cilët rregullisht numërojnë më shumë se 70,000 për ndeshjet në shtëpi të të dyja skuadrave.
Gjigantët milanez kanë bërë një ofertë për të blerë të drejtat në zonën e San Siros, duke përfshirë Stadio Giuseppe Meazza, të cilin të dy klubet e kanë të përbashkët që nga viti 1947.
“FC Internazionale Milano dhe AC Milan kanë dorëzuar sot DOCFAP në Bashkinë e Milanos, që përmban propozimin për blerjen e stadiumit Giuseppe Meazza dhe zonat përreth, së bashku me një studim fizibiliteti për ndërtimin e një stadiumi më të avancuar si pjesë e një projekti rigjenerimi urban të fokusuar në inovacionin, qëndrueshmërinë dhe konfirmimin e këshillit të qytetit të martën”.
“Ky propozim, i zhvilluar nga profesionistë të lartë dhe ekspertë të industrisë, është rezultat i vizionit strategjik të pronësisë së dy klubeve dhe hedh themelet për realizimin e një projekti që do të shërbejë si pikë referimi ndërkombëtar duke sjellë përfitime të rëndësishme për qytetin e Milanos dhe banorët e tij”.
“Në muajt në vijim, të dy Klubet do të angazhohen me administratën bashkiake për të diskutuar dhe përpunuar më tej detajet e propozimit dhe aspektet kyçe, duke synuar të përfundojnë procesin e blerjes deri në korrik 2025. Koncepti përfundimtar dhe projekti ekzekutiv do të prezantohen në një fazë të mëvonshme dhe për këtë arsye nuk janë përfshirë në dokumentacionin e dorëzuar sot”, thuhet në njoftim.
Oferta besohet të jetë rreth 200 milionë euro, çmimi i vendosur nga Zyra e Taksave Italiane në fillim të këtij viti. Interi dhe Milani kishin përgatitur tashmë një projekt për të prishur ‘San Siron’ dhe për të ndërtuar një stadium të ri në bashkëpronësi të quajtur ‘Katedralja’, por plani u braktis pasi një ligj i detyrueshëm e bëri të pamundur shkatërrimin e stadiumit.
Megjithatë, nëse shitja përfundon para vitit 2026, dy klubet mund të prishin pjesërisht stadiumin aktual dhe të ndërtojnë një të ri aty pranë. Interi dhe Milani pritej të dërgonin ofertën e tyre javën e kaluar, por propozimi zyrtar u prezantua disa ditë më vonë.
Po ndodh...
ide
Shqipëria Madhështore apo Shqipëria e Pazarit Madhështorë!
Nga Ermal Peçi!
Opozita, akoma larg një projekti për rrotacionin e pushtetit
Nga Preç Zogaj
top
receta Alfa
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128