Rama nuk humbet kohë për të goditur SPAK/ Pas rezolutës anti-Korrupsion, të enjten votohet Komisioni i Posaçëm "Xhafa"

28 Maj 2024, 22:16 / POLITIKË ALFA PRESS

Rama nuk humbet kohë për të goditur SPAK/ Pas rezolutës
Mazhoranca e drejtuar nga Kryeministri Edi Rama nuk humbet kohë pas miratimit të rezolutës anti-korrupsion, e cila kaloi në Kuvend me votat e ligjvënësve socialistë.

Në seancën e së enjtes, në pikën 7 të rendit të ditës së punimeve të Parlamentit është ngritja e Komisionit të Posaçëm Parlamentar. Duket se hetimet e shumta në proces ndaj qeverisë së tij, po e nxitojnë që të bllokojë SPAK dhe GJKKO nëpërmjet një komisioni parlamentarë të drejtuar nga Fatmir Xhafa. 

Projektvendimi “Për ngritjen e Komisionit të Posaçëm për Thellimin e Reformave për Mirëqeverisjen, Sundimin e Ligjit dhe Antikorrupsionin për Shqipërinë 2030 në Bashkimin Europian””, thuhet në njoftimin zyrtar nga Kuvendi, ndërsa ngritja e Komisionit bëhet me shumicë të thjeshtë votash.

Kryeministri në seancën e së hënës ftoi opozitën të mos e bojkotojë Komisionin e Posaçëm, ndërkohë që nuk dihet nëse Grupi Parlamentar i Rithemelimit me kryetar Gazment Bardhin, apo grupimet e tjera në Kuvendin e Shqipërisë, do të jenë pjesë e këtij komisioni.

Nisma e Kryeministrit Edi Rama është interpretuar si një tentativë e tij për të vënën nën kontroll drejtësinë e re, institucionet e saj duke nisur me SPAK e GJKKO, përmes një Komisioni të Posaçëm parlamentar.

Gjithsesi në deklaratat publike nga mazhoranca është pohuar se rezoluta dhe Komisioni i Posaçëm do të jenë një mbështetje më shumë për thellimin e reformave, duke dhënë garanci se nuk do të cënohet pavarësia e drejtësisë së re.