Lajme flash
Media greke “Protothema” për kryeministrin Rama: Ironizon Greqinë, por prindërit i ka me origjinë nga fshatra minoritare
2 Shkurt 2026, 23:52 / POLITIKË
Media greke Prothothema i ka kushtuar një artikull kryeministrit shqiptar Edi Rama, duke u fokusuar në kontrastin mes qëndrimeve të tij të fundit ndaj Greqisë dhe prejardhjes familjare. Artikulli thekson se Rama shpesh shfaqet ironik dhe kritik ndaj grekëve, ndërkohë që sipas historikut të familjes, të dy prindërit e tij kanë origjinë nga zona me minoritarë grekë në Shqipëri.
Sipas Prothothema, nëna e Kryeministrit Rama, Aneta Rama (Koleka), ishte nga fshati Vuno, në jugperëndim të vendit, i banuar kryesisht nga minoritarë dhe me disa shkolla greke që funksiononin në fillim të shekullit të 20-të. Artikulli thekson se Rama e paraqet ndryshe prejardhjen e saj, duke pretenduar se familja e tij vinte nga Mirdita, larg zonave me minoritet grek.
Po ashtu, media greke rikujton se babai i tij, Kristaq Rama, lindi në Durrës, por të parët e tij vinin nga fshati Dardha, afër Korçës, gjithashtu me prani historike greke dhe me shkolla greke në periudhën 1913–1914.
Artikulli sugjeron se Rama ka manipuluar të dhëna mbi prejardhjen e tij për të shmangur lidhjet me komunitetet greke.
Prothothema shkon më tej duke përmendur arsimimin dhe karrierën e hershme të Ramës. Ai studioi artet vizuale në Akademinë e Tiranës, ka pasur një karrierë si piktor dhe ka luajtur basketboll për Dinamon e Tiranës dhe në kombëtaren kuqezi. Në vitet ’80 ishte aktiv politikisht, duke organizuar protesta studentore kundër regjimit komunist dhe duke publikuar ese me kritikë politike.
Artikulli kujton edhe periudhën kur Rama punoi në Francë dhe ekspozoi pikturat e tij, si dhe përballjen me dhunën e një grupi të mundshëm të Sigurimit Shqiptar pas kthimit të tij në Shqipëri në vitin 1997. Ai u kthye përgjithmonë në vend pas vdekjes së babait në 1998 dhe menjëherë u emërua ministër i Kulturës, Rinisë dhe Sporteve.
Rama u bë më pas kryetar bashkie i Tiranës në 2000, ku implementoi reforma urbanistike, gërmoi ndërtime të paligjshme, mbolli mijëra pemë dhe përmirësoi infrastrukturën e qytetit. Artikulli grek përmend se për angazhimin e tij, Rama u ftua nga Greqia të ndjekë kurs për kryebashkiakë në Harvard, në kuadër të Programit Kokkalis, ndërkohë që lidhja e tij me këtë ftesë lidhej edhe me prejardhjen greke të nënës.
Sa i përket jetës personale, Prothothema thekson se Rama ka qenë i martuar dy herë dhe ka tre fëmijë. Ai përmendi familjen e tij edhe gjatë fjalimit në Kneset, duke theksuar tolerancën fetare dhe historinë e Shqipërisë në ndihmën ndaj hebrenjve gjatë Luftës së Dytë Botërore.
Artikulli nuk lë pa përmendur qasjen politike dhe ndërkombëtare të Ramës: ai vazhdimisht ka mbështetur marrëdhëniet me Turqinë dhe ka një qëndrim shpesh kritik ndaj Greqisë. Media greke lidh këtë qëndrim me mënyrën se si Rama paraqet prejardhjen e tij, duke minimizuar origjinën greke të familjes dhe duke u shfaqur ironik ndaj Greqisë.
Prothothema përfundon duke shtuar se, ndonëse Rama përfaqëson Shqipërinë me një imazh modern dhe tolerant, origjina dhe lidhjet historike të familjes me komunitetet greke duket se bien ndesh me retorikën e tij të fundit dhe me qëndrimet publike ndaj fqinjit jugor.
Artikulli i Protothema për Ramën
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128