Lajme flash
Nga Papa Françesku, Zelensky deri te Vuçiç, solidaritet me RMV pas zjarrit tragjik
17 Mars 2025, 09:51 / BOTA
Mesazhe ngushëllimi dhe mbështetjeje vërshojnë nga liderët europianë pas zjarrit tragjik në një klub nate në Maqedoninë e Veriut ku humbën jetën 59 persona dhe u plagosën më shumë se 150 të tjerë.
Tragjedia ka tërhequr vëmendjen për korrupsionin në këtë vend të vogël të Ballkanit, ndërsa autoritetet kanë arrestuar 15 persona.
Zjarri ka shpërthyer rreth orës 02:30 të mëngjesit, gjatë një koncerti të një grupi pop lokal në klub, siç njoftoi Ministri i Brendshëm, Panche Toshkovski. Ai tha se deri tani janë identifikuar 39 viktima.
Autoritetet paralajmërojnë se numri i të vdekurve mund të rritet, pasi 20 nga të plagosurit janë në gjendje kritike.
Qeveria shpalli shtatë ditë zie kombëtare për të nderuar viktimat e tragjedisë. Shumica e viktimave dhe të plagosurve ishin të rinj ndërsa humbën jetën kryesisht për shkak të djegieve, tymit dhe panikut që shkaktoi një grumbullim i madh njerëzish në përpjekje për të arritur në daljen e vetme të klubit, thanë autoritetet.
Një e mbijetuar, Marija Taseva, 19 vjeç, tha: “Ne u përpoqëm të dilnim përmes banjos, por gjetëm shufra në dritaret.” Ajo tha se arriti të shpëtonte vetëm pas një rënie nga shkallët, ku shumë njerëz e kaluan dhe e shkelën atë. “Pothuajse vdiqa dhe mezi mund të merrja frymë,” shtoi Taseva. Zjarri shkaktoi shembjen e pjesës së çatisë së ndërtesës, duke zbuluar mbetje druri dhe copa të djegura. Policia ka rrethuar vendin dhe ka dërguar grupe për mbledhjen e provave në një operacion që përfshin prokurorë shtetërorë.
Liderët evropianë shprehin ngushëllime dhe ofrojnë ndihmë
Mesazhe ngushëllimi kanë ardhur nga liderët e Europës dhe zyra e Papa Françeskut, i cili është i hospitalizuar prej një muaji për një pneumoni të dyfishtë. Ai shprehu ngushëllimet e tij të thella dhe siguroi lutjet për ata që humbën jetën, duke kërkuar edhe ngushëllimin e Zotit për ata që po vuajnë.
Kryetarja e Komisionit Europian, Ursula von der Leyen, u shpreh përmes një postimi në X (ish-Twitter), duke shprehur trishtimin për këtë humbje tragjike dhe duke siguruar mbështetje për popullin e Maqedonisë së Veriut.
Po ashtu, Presidenti i Ukrainës, Volodymyr Zelensky, shprehu ngushëllimet dhe dëshirën për shërim të shpejtë për të plagosurit. “Ukraina është në dhimbje me miqtë tanë maqedonas në këtë ditë të trishtuar,” tha Zelensky.
Zyrtarët e Ministrisë së Shëndetësisë të Maqedonisë së Veriut thanë se kishin pranuar ofrimin e ndihmës nga disa shtete fqinje, përfshirë Bullgarinë, Greqinë, Serbinë dhe Turqinë, të cilat ishin duke u përgatitur për të pranuar pacientë me lëndime të rënda.
Presidenti i Serbisë, Aleksandar Vuçiç, tha se ka urdhëruar qeverinë për të mobilizuar mbështetje dhe për të siguruar çdo burim të nevojshëm për të ndihmuar në zvogëlimin e kësaj tragjedie.
Në qytetin e Selanikut në Greqi, tre persona me djegie të rënda – dy 25-vjeçarë dhe një 19-vjeçar – po trajtohen në një spital civil, ndërsa njëri prej tyre po kalon një operacion. Gjendja e tyre është kritike.
Të dielën, të afërm të viktimave u mblodhën para spitaleve dhe zyrave të qytetit në Koçan – rreth 115 km në lindje të Shkupit – duke kërkuar më shumë informacion nga autoritetet.
Dragi Stojanov, një banor, u informua se djali i tij 21-vjeçar, Tomce, kishte vdekur në zjarr.
“Ai ishte fëmija im i vetëm. Nuk kam më nevojë për jetën time. 150 familje janë shkatërruar,” tha ai. “Fëmijët e djegur nuk njihen. Ka kufoma, vetëm kufoma brenda (klubit). Dhe bosët (të krimit të organizuar), thjesht po fusin para në xhepat e tyre”, tha ai.
Presidentja e Maqedonisë së Veriut, Gordana Siljanovska-Davkova, vizitoi të plagosurit në spitalin e Shkupit dhe foli me prindërit që prisnin jashtë. “Është tmerrshme. E vështirë të besohet si ndodhi kjo,” tha ajo. “Duhet t’u japim këtyre të rinjve kurajë të vazhdojnë.”
Kryeministri Hristijan Mickoski e cilësoi këtë ngjarje si “ditën më të vështirë të jetës së tij” dhe shtoi se vendi duhet të luftojë korrupsionin.
“Jam angazhuar në politikë për të ndryshuar diçka. Kam hasur një sistem të thellë korruptiv që është krijuar dhe ushqyer për dekada, i cili përfshin njerëz nga të gjitha partitë,” tha ai.
Qeveria e Maqedonisë së Veriut urdhëroi një inspektim të gjerë në të gjitha klubet dhe kabaret e vendit për tre ditët e ardhshme.
Kjo është tragjedia më e rëndë që ka ndodhur në Maqedoninë e Veriut, një shtet të izoluar në Ballkan me një popullsi më pak se 2 milionë banorë, dhe ngjarja më e fundit vjen në një seri zjarresh tragjike në klube nate në botë.
Po ndodh...
Pse Aleanca Madhështore përfundoi në Foltore 2
Nga Namir Lapardhaja
ide
top
receta Alfa
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128