Lajme flash
Kurti ‘lëshon pe’ për serbët, Vuçiç: U shmang katastrofa e ndonjë konflikti
14 Mars 2026, 17:37 / KOSOVA
Qeveria e Kosovës është pajtuar t’u ofrojë leje të përkohshme qëndrimi dhe t’ua njohë letërnjoftimet pjesëtarëve të komunitetit serb që nuk janë të pajisur me dokumenteve kosovare në Ligjin për të huaj dhe atë për automjetet, që do të fillojnë të zbatohen plotësisht nga e diela.
Vendimi i Qeverisë së kryeministrit Albin Kurti vjen pas një takimi në Prishtinë me të dërguarin e posaçëm të Bashkimit Evropian për dialogun mes Kosovës dhe Serbisë, Peter Sorensen, të shtunën në mëngjes, dhe ai u përshëndet si nga bashkësia ndërkombëtare, ashtu edhe nga Serbia.
Këto dy ligje filluan së zbatuari më 15 janar por vetëm si një fushatë informuese për procedurat dhe rregullat e zbatimit të këtyre ligjeve.
Ato kundërshtohen nga pjesëtarët e komunitetit serb në Kosovë, përfaqësuesit e tyre politikë dhe sektori civil, të cilët argumentojnë se një gjë e tillë do të ndikojë keq te sektorët e shëndetësisë dhe arsimit që veprojnë brenda sistemit të Serbisë në mjediset me shumicë serbe në Kosovë.
Ligjet do të hyjnë plotësisht në fuqi të dielën dhe kërkojnë që të gjithë ata që nuk kanë dokumente të Kosovës të pajisen me leje qëndrimi, ndërsa automjetet me targa të huaja nuk do të mund të qarkullojnë në Kosovë më gjatë se tre muaj ose vetëm në bazë të autorizimit.
Pas vendimit të së shtunës, kjo nuk do të vlejë tani për tani për serbët e Kosovës pa dokumente kosovare, pasi ata kanë mundësi të marrin leje të përkohshme qëndrimi prej 12-muajsh, si dhe të bartin si mjet identifikimi letërnjoftimet e lëshuara nga autoritetet serbe.
Duke folur në një konferencë për media me Sorensenin dhe shefin e zyrës së BE-së në Prishtinë, Aivo Orav, Kurti u zotua se Qeveria do të vazhdojë punën për shkrirjen e plotë të sistemit arsimor dhe shëndetësor serb në sistemin e vetëm të Kosovës.
Ai tha se është pajtuar për të mundësuar leje të përkohshme qëndrimi për punonjësit shëndetësorë dhe ata të arsimit, në mënyrë që serbëve lokalë të mos u mungojnë shërbimet bazike derisa Kosova t’i shkrijë ato plotësisht brenda sistemit të vet.
‘Qeveria do të pajiset nga krerët lokalë me lista të stafit akademik dhe shëndetësor të angazhuar në ofrimin e këtyre shërbimeve, këto lista pastaj do të shërbejnë për dhënien e lejeve të përkohshme të qëndrimit për qytetarët e huaj që aplikojnë te Ministria e brendshme e Kosovës’, tha Kurti.
Ai theksoi se e njëjta vlen edhe për studentët serbë që qëndrojnë në Kosovë për studime, për të cilët krerët komunalë do të ofrojnë listën e tyre me hollësi për fushën e studimeve për t’iu dhënë leje të përkohshme qëndrimi me afat 12-mujor, dhe me mundësi vazhdimi nëse i vazhdojnë studimet.
‘Në të njëjtën kohë, Ministria e Arsimit, në bashkërendim me Sorensenin dhe me ofruesit e këtyre shërbimeve publike, fillojnë procedurat e domosdoshme dhe përcaktojnë afatet për inkorporim të plotë, përfshirë licencimin e institucioneve dhe të stafit të angazhuar’, tha Kurti.
Ndërkohë, Sorensen tha se pati takim ‘të mirë’ me Kurtin dhe se e mirëpret angazhimin e Kosovës ndaj sundimit të ligjit dhe vendimin e saj të dhjetorit për të zbatuar gradualisht Ligjin për të huajt dhe atë për automjetet, gjë që mundëson një fushatë gjithëpërfshirëse dhe të qasshme informuese për ata që preken.
‘E konsideruam si prioritet kyç që Qeveria e Kosovës të sigurojë leje qëndrimi për punëtorët dhe studentët e përfshirë për një periudhë fillestare prej 12 muajsh, me qëllim parandalimin e çdo ndërprerjeje të shërbimeve shëndetësore dhe arsimore’, tha Sorensen.
Ai tregoi se Kosovës iu kërkua të lejojë përdorimin e letërnjoftimeve të lëshuara jo më vonë se 15 mars 2026 nga Serbia për ata që jetojnë në Kosovë, si mjet identifikimi për proceset administrative.
Kurti njoftoi se Qeveria e tij do ta hapë një dritare tremujore për t’ua mundësuar qytetarëve të kombësisë serbëve për t’i ‘regjistruar faktet’.
‘Në këtë periudhë aplikantëve do t’iu lejohet ekskluzivisht përdorimi si mjet identifikimi i letërnjoftimeve të lëshuara nga strukturat ilegale, ndërsa Ministria e Brendshme do ta bëjë regjistrimin e këtyre fakteve brenda sistemit qendror të regjistrit civil të Kosovës’, theksoi Kurti.
Presidenti i Serbisë, Aleksandar Vuçiç, tha se zgjidhja e arritur në lidhje me zbatimin e Ligjit për të huajt në Kosovë përbën një lehtësim për popullin serb.
‘Edhe pse nuk ka zgjidhje të bukura dhe të lehta, është arritur një model, për hollësitë e të cilit jam në dijeni. Jam mirënjohës për përpjekjet e evropianëve që donin të shmangnin katastrofën e ndonjë konflikti’, tha Vuçiç.
Drejtori i Zyrës për Kosovën në Qeverinë e Serbisë, Petar Petkoviq, tha se zgjidhja e arritur do ta mundësojë funksionimin e pandërprerë dhe normal të institucioneve shëndetësore dhe arsimore serbe.
Në një konferencë për shtyp, ai theksoi se gjatë javëve të fundit është punuar me BE-në për të gjetur një zgjidhje dhe se është shmangur ‘skenari më i keq i mundshëm i mbylljes së institucioneve serbe në Kosovë’.
Ndërkohë, zyrtari i Listës Serbe, Igor Simiq, tha se vendimi është ‘rezultat i punës së madhe dhe diplomacisë’.
Ai shtoi se të gjitha institucionet arsimore dhe shëndetësore do të vazhdojnë të funksionojnë si deri tani, në sistemin e Serbia.
Simiq gjithashtu sqaroi se rreth 7.200 pjesëtarë të komunitetit serb nuk kanë dokumente të Kosovës për arsye të ndryshme dhe se atyre do t’u mundësohet t’i marrin ato ‘në mënyrë që të jetojnë normalisht në këto hapësira’.
Megjithatë, Simiq - cili është deputet në Kuvendin e Kosovës nga partia më e madhe e serbëve të Kosovës-e përsëriti kundërshtimin e serbëve për integrimin e institucioneve të tyre në sistemin kosovar.
‘Kur bëhet fjalë për procesin e regjistrimit të studentëve, profesorëve dhe punonjësve shëndetësorë, ai do të realizohet përmes institucioneve tona arsimore dhe shëndetësore, me mbështetjen e plotë të kryetarëve serbë të komunave’, tha Simiq.
Në Kosovë janë 10 komuna me shumicë serbe dhe Simiq tha se ‘nuk ka integrim të shëndetësisë dhe arsimit’ në sistemin e Kosovës, por se ‘është koha e fundit’ që të formohet Asociacioni i Komunave me Shumicë Serbe’.
Kosova dhe Serbia janë pajtuar disa herë për një asociacion të tillë, por ai nuk është formuar asnjëherë.
Vendimi i së shtunës u mirëprit nga shefja e BE-së, Kaja Kallas, e cila tha se ai ‘ka krijuar një momentum i ri për t’i çuar përpara marrëdhëniet mes BE-së dhe Kosovës dhe dialogun mes Prishtinës dhe Beogradit’.
Kallas theksoi se është e gatshme ta ndërmjetësojë ‘së shpejti’ një takim të nivelit të lartë mes Kosovës dhe Serbisë.
Vendimi u përshëndet gjithashtu nga ambasadorë të huaj në Kosovë, si ai i Gjermanisë, Rainer Rudolph, dhe ai i Francës, Olivier Guerot.
Zbatimi i plotë i ligjeve për të huajt dhe automjetet në Kosovë ishte kritikuar ashpër edhe nga Beogradi, i cili e kishte përshkruar si ‘masa diskriminuese’.
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128