English
Luaj me Fjalëkryq
Lajme flash

Sot 31 vite nga rrëzimi i bustit të diktatorit/ A e dini se për 20 shkurtin ka një ligj të veçantë?

20 Shkurt 2022, 10:16 / DOSJE ALFA PRESS
Sot 31 vite nga rrëzimi i bustit të diktatorit/ A e dini se për

Dita e sotme shënon 31 vite nga rrëzimi i bustit të ish-diktatorit Enver Hoxha.

Pikërisht më 20 shkurt të vitit 1001, mijëra qytetarë dolën në shesh për të shembur simbolin e komunizmit e për t’i dhënë fund regjimit.

Ndoshta jo shumë njerëz e dinë, por për 20 shkurtin ka një ligj të miratuar në vitin 2010, “Për simbolet e përkujtimit të viktimave dhe të krimeve të komunizmit në Shqipëri”.

Ndër të  tjera, ligji parashikon ngritjen e Obeliskut të Viktimave dhe të Krimeve të Komunizmit në Tiranë, si dhe të monumenteve përkujtimore në qytetet e tjera të Shqipërisë.

Por 12 vite pas miratimit të ligjit, këto simbole përkujtimore nuk janë bërë realitet e po ashtu nuk ka një Muzeun Kombëtar të Viktimave dhe të Krimeve të Komunizmit në Shqipëri.

Ligji i plotë:

Ligj nr.10241, datë 25.2.2010 “Për simbolet e përkujtimit të viktimave dhe të krimeve të komunizmit në Shqipëri”.

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave, Kuvendi i Republikës së Shqipërisë, vendosi:

Neni 1

Qëllimi

Ky ligj ka për qëllim përcaktimin e disa simboleve, në përkujtim të viktimave dhe të krimeve të shkaktuara nga regjimi komunist në Shqipëri.

Neni 2

Përkufizime

Në kuptim të këtij ligji, me simbole nënkuptohen: muze, obelisk, monumente dhe një datë e përkujtimit publik të viktimave dhe të krimeve të shkaktuara nga regjimi komunist në Shqipëri.

Neni 3

Këshilli i Ministrave shpall datën 20 shkurt, ditën e rrëzimit të bustit të ish-diktatorit Enver Hoxha në Tiranë, si “Dita e përkujtimit të viktimave dhe të krimeve të komunizmit në Shqipëri”. Përkujtimi i kësaj date bëhet në përputhje me legjislacionin në fuqi.

Neni 4

Ngarkohet Këshilli i Ministrave të krijojë Muzeun Kombëtar të Viktimave dhe të Krimeve të Komunizmit në Shqipëri, në përputhje me legjislacionin në fuqi.

Neni 5

Këshilli i Ministrave të nxjerrë aktet e nevojshme nënligjore për ngritjen e Obeliskut të Viktimave dhe të Krimeve të Komunizmit në Tiranë, si dhe të monumenteve përkujtimore në qytetet e tjera të Shqipërisë.

Neni 6

Ngarkohet Këshilli i Ministrave që, në zbatim të neneve 3, 4 e 5, të nxjerrë aktet nënligjore brenda një muaji nga hyrja në fuqi e këtij ligji.

Neni 7

Ky ligj hyn në fuqi 15 ditë pas botimit në “Fletoren Zyrtare”.

Shpallur me dekretin nr.6467, datë 18.3.2010 të Presidentit të Republikës së Shqipërisë, Bamir Topi

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128