Lajme flash
Atentat mafioz në Elbasan/ Gjendet një makinë e bërë gati për tu përdorur pranë shtëpisë së ...
19 Shkurt 2023, 09:37 / AKTUALITET
Gjendet një automjet i bërë gati për tu përdorur në një atentat mafioz në Elbasan.
Makina është tip fuoristradë dhe është gjendur në zonën ku ka shtëpinë Erion Alibeaj në Elbasan, por nuk dihet nëse kjo makinë është apo jo porosi e tij apo e grupit tjetër kriminal.
Në brendësi të automjetit janë gjetur 2 armë tip kallashnikovi, një sasi e madhe fishekësh si dhe 1 një shishe benzinë e cila do përdorej për të djegur automjetin mbas atentatit.
Deri tani nuk dihet se kush është shënjestra e atentatit dhe as autorët që do të kryenin këtë vrasje.
Policia ka sekuestruar pamjet filmike të kamerave sigurisë në zonë për të parë personat që do të kryenin këtë atentat dhe që kanë braktisur automjetin në atë zonë.
Njoftimi i policisë:
Falë inteligjencës informative, Policia parandalon një ngjarje të rëndë kriminale.
Sekuestrohen 4 armë zjarri (3 kallashnikovë dhe 1 pistoletë), 2 bidona me lëndë djegëse (benzinë) dhe një automjet që dyshohet se do të përdoreshin për kryerjen e këtij krimi.
Strukturat hetimore të Drejtorisë Vendore të Policisë Elbasan kanë marrë informacion se në orët e vona të natës së mbrëmshme mund të ndodhte një ngjarje e rëndë kriminale.
Bazuar në këtë informacion, Policia ka shtuar prezencën në terren, ka ngritur pika kontrolli dhe ka ushtruar kontrolle intensive në disa objekte të cilat dyshohet se shërbenin për fshehjen e sendeve dhe mjeteve me të cilat mund të kryheshin veprimtari kriminale.
Shërbimet e Policisë morën informacion se si pasojë e presionit të Policisë në terren, shtetasit që do të kryenin ngjarjen kriminale dyshohet se kishin fshehur automjetin që do të përdorej për kryerjen e krimit.
Në këtë kuadër, si rezultat i kontrolleve të shumta të kryera në terren, në lagjen “Emin Matraxhiu”, në zonën e quajtur “Ish-konservimi”, është gjetur një automjet tip “BMW X6”, brenda të cilit u gjetën 3 armë zjarri kallashnikov dhe 2 bidona me lëndë djegëse (benzinë).
Po në vijim të kontrolleve, në afërsi të një koshi mbeturinash, shërbimet e Policisë kanë gjetur dhe kanë sekuestruar një çantë, brenda së cilës kishte një armë zjarri pistoletë.
Në vendngjarje ndodhet një grup i posaçëm hetimor dhe ekspertë të Institutit të Policisë Shkencore, të cilët në drejtimin e Prokurorisë pranë Gjykatës së Rrethit Gjyqësëor Elbasan, vijojnë punën për të bërë të mundur fiksimin e provave në vendngjarje, hapjen dhe kontrollin e automjetit.
Në Drejtorinë Vendore të Policisë Elbasan janë shoqëruar disa shtetas, dhe nën drejtimin e Prokurorisë, vijon puna për zbardhjen e këtij rasti, identifikimin dhe kapjen e autorëve.
Veprimet janë në vijim dhe në përfundim të tyre, do të ketë një informacion përfundimtar.
Policia e Elbasanit kërkon mirëkuptimin e medias që në lidhje me këtë ngjarje, për shkak të rëndësisë dhe konfidencialitetit të hetimit, me qëllim zbardhjen e plotë të ngjarjes, të mos japin informacion të pakonfirmuar, por të presin rezultatet e hetimit intensiv që po kryhet nga grupi i posaçëm hetimor, në drejtimin e Prokurorisë së Elbasanit.
Po ndodh...
83 mandatet nuk janë imunitet për shokët dhe shoqet e Ramës
Nga Gentian Gaba
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128