Lajme flash
SHBA tërheq diplomatët nga Lindja e Mesme pas tensioneve me Iranin
12 Qershor 2025, 08:55 / BOTA
Departamenti Amerikan i Shtetit dhe i Mbrojtjes po planifikojnë largimin e personelit nga Lindja e Mesme, mes tensioneve në rritje.
Departamentet amerikane të Shtetit dhe të Mbrojtjes ndërmorën përpjekje të mërkurën për të organizuar largimin e personelit jo-thelbësor nga disa vende në Lindjen e Mesme, sipas zyrtarëve amerikanë dhe burimeve të njohura me zhvillimet, sipas CNN.
Nuk është ende e qartë se çfarë po shkakton këtë ndryshim të papritur të qëndrimit, por një zyrtar i mbrojtjes tha se Komanda Qendrore e SHBA-së (CENTCOM) po monitoron “tensionet në zhvillim në Lindjen e Mesme”.
“Ata po largohen sepse mund të bëhet një vend i rrezikshëm, dhe do të shohim se çfarë do të ndodhë. Por janë larguar ose u kemi dhënë urdhër të largohen, dhe do të shohim si zhvillohet situata,” tha Presidenti Donald Trump të mërkurën për gazetarët, pas mbërritjes në një aktivitet në Kennedy Center.
Edhe pse arsyet për rritjen e shqetësimeve për sigurinë nuk janë të qarta, largimet e planifikuara ndodhin në një kohë kur tensionet mes Iranit dhe Izraelit janë përshkallëzuar, ndërsa administrata Trump vijon përpjekjet për një marrëveshje të re bërthamore me Iranin.
Sekretari i Mbrojtjes, Pete Hegseth, ka autorizuar largimin vullnetar të familjarëve të ushtarakëve nga disa vende në Lindjen e Mesme, sipas një zyrtari.
“Siguria e pjesëtarëve të forcave tona dhe familjeve të tyre mbetet prioriteti ynë më i lartë dhe Komanda Qendrore e SHBA-së po monitoron tensionet që po zhvillohen në Lindjen e Mesme,” tha zyrtari. Gjenerali Michael Kurilla, komandanti i CENTCOM-it, shtyu një dëshmi që kishte planifikuar të jepte përpara një komiteti të Senatit të enjten për shkak të këtyre tensioneve, sipas një zyrtari të mbrojtjes.
Departamenti i Shtetit gjithashtu po përgatitet të urdhërojë largimin e personelit jo-thelbësor nga ambasadat amerikane në Irak, Bahrein dhe Kuvajt për shkak të rritjes së rreziqeve të sigurisë në rajon, sipas një zyrtari tjetër amerikan dhe një burimi të dytë.
Largimi i personelit jo-thelbësor do të urdhërohet gjithashtu edhe për konsullatën amerikane në Erbil, në Kurdistanin irakian, thanë burimet. Një zyrtar i qeverisë irakiane tha se këto lëvizje të personelit nuk kanë lidhje me situatën e sigurisë në vendin e tij.
“Presidenti Trump është i përkushtuar për të mbrojtur amerikanët, si në vend ashtu edhe jashtë tij. Në përputhje me këtë angazhim, ne vlerësojmë vazhdimisht qëndrimin e duhur të personelit në të gjitha ambasadat tona. Bazuar në analizën tonë më të fundit, vendosëm të zvogëlojmë praninë e misionit tonë në Irak,” tha një zyrtar i Departamentit të Shtetit kur u pyet për ndryshimin e qëndrimit.
Më vonë të mërkurën, Departamenti përditësoi paralajmërimin e udhëtimit për të shtuar se largimi i personelit jo-emergjent të qeverisë amerikane ishte urdhëruar “për shkak të tensioneve të shtuara në rajon”.
Trump ka thënë se është bërë më pak i sigurt për mundësinë e arritjes së një marrëveshjeje me Iranin për frenimin e ambicieve bërthamore të vendit, duke thënë në një intervistë të re se Teherani mund të jetë “duke vonuar” arritjen e marrëveshjes.
“Jam gjithnjë e më pak i bindur për këtë. Ata duket se po e shtyjnë, dhe mendoj se është për të ardhur keq, por jam më pak i sigurt tani se sa isha disa muaj më parë,” tha Trump në një intervistë për një podcast të New York Post të publikuar të mërkurën.
“Diçka u ka ndodhur, por nuk jam më aq i bindur se do ketë marrëveshje,” shtoi ai, duke thënë se ishin “instinktet” e tij që e bënin të ndjente se marrëveshja po bëhej më e paarritshme.
CNN raportoi gjithashtu të mërkurën se Trump i kishte kërkuar kryeministrit izraelit Benjamin Netanyahu të ndalonte retorikën për një sulm ndaj Iranit, sipas një burimi të njohur me bisedën.
Dy liderët folën në telefon të hënën. Më pas, Trump tha se telefonata kishte shkuar “shumë mirë, shumë pa probleme.”
Muajin e kaluar, CNN raportoi se SHBA kishte marrë informacion të ri të inteligjencës që sugjeronte se Izraeli po përgatitej për një goditje ndaj objekteve bërthamore iraniane. Dy burime të inteligjencës thanë se SHBA kishte vërejtur lëvizje të municioneve ajrore dhe përfundimin e një ushtrimi ajror nga ana izraelite.
Megjithatë, zyrtarët theksuan se nuk është e qartë nëse udhëheqësit izraelitë kanë marrë një vendim përfundimtar dhe se ka mosmarrëveshje të mëdha brenda qeverisë amerikane për mundësinë që Izraeli do të ndërmarrë veprim real.
Ministri i mbrojtjes i Iranit paralajmëroi të mërkurën se nëse dështojnë bisedimet bërthamore me SHBA-në dhe shpërthen një konflikt, SHBA do të “detyrohet të largohet nga rajoni.”
Gjenerali i Brigadës Aziz Nasirzadeh tha se në një skenar të tillë “armiku me siguri do të pësojë humbje të mëdha,” edhe pse nuk e specifikoi nëse “armiku” i referohej SHBA-së, Izraelit apo të dyve.
Në komentet e tij të publikuara nga agjencia shtetërore iraniane IRNA, ministri i mbrojtjes tha se disa zyrtarë nga pala kundërshtare kishin “bërë deklarata kërcënuese, duke paralajmëruar për konflikt të mundshëm në rast se nuk arrihet marrëveshje” në bisedimet SHBA-Iran.
“Në atë rast, SHBA nuk do të ketë zgjidhje tjetër përveçse të largohet nga rajoni, pasi të gjitha bazat e saj janë brenda rrezes së ushtrisë iraniane dhe ata nuk do të hezitojnë t’i sulmojnë të gjitha në vendet pritëse,” tha Nasirzadeh.
Po ndodh...
Amerika mund të tërhiqet nga Europa, por jo nga SPAK
Nga Gentian Gaba
ide
Kush është Lepuri i Surrelit?
Nga Sidi Hasanaj
Dy rrugët e gabuara të opozitës me Avokatin e Popullit
Nga Patrik Sadikaj
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128