Lajme flash
Trondit Elon Musk: Duan të më vrasin!
20 Mars 2025, 16:43 / BOTA
Elon Musk ka pohuar se aktivistë të krahut të majtë po komplotojnë për ta vrarë atë dhe për të dëmtuar Teslën me qëllim që të ndalin përpjekjet e tij për të reduktuar shpërdorimet dhe korrupsionin në qeverinë federale të SHBA. Një seri sulmesh të dhunshme kanë vënë në shënjestër makinat dhe koncesionarët e Teslës përmes vandalizmave dhe zjarrvënieve.
Miliarderi i teknologjisë aktualisht shërben si këshilltar i presidentit të SHBA-së, Donald Trump, dhe ka mbikëqyrur shkurtimet e buxhetit dhe zvogëlimin e fuqisë punëtore federale, përfshirë ato të realizuara përmes Departamentit të sapoformuar të Efiçiencës Qeveritare (DOGE). Kritikët e kanë akuzuar Musk-un për masa të rrepta kursimi, ndërsa mbështetësit e tij argumentojnë se këto lëvizje janë të nevojshme për të frenuar shpërdorimet e qeverisë.
Reagimi kundër veprimeve të Musk-ut është përshkallëzuar javët e fundit, me protesta dhe sulme ndaj pronave të lidhura me Teslën. Një sulm ndaj një qendre riparimi të Teslës në Las Vegas përfshiu përdorimin e koktejeve Molotov dhe shkaktoi dëme në të paktën pesë automjeteve Tesla. Autoritetet raportuan se dy makina u përfshinë plotësisht nga flakët, ndërsa të tjerat u qëlluan me armë zjarri. Zyrtarët e rendit kanë deklaruar se po e trajtojnë çështjen me seriozitet, edhe pse ende nuk ka të dyshuar të identifikuar.
Duke folur për Fox News të hënën, Musk dënoi sulmet, duke i cilësuar ato si “të çmendura” dhe duke sugjeruar se nuk janë raste të izoluara, por një përpjekje e koordinuar kundër tij dhe Teslës.
“Ata duan të më vrasin sepse po i ndal shpërdorimet e tyre dhe duan të dëmtojnë Teslën sepse po ndalojmë keqmenaxhimin dhe korrupsionin në qeveri,” tha Musk për Fox News. Ai gjithashtu vuri në dyshim burimin e sulmeve, duke pyetur: “Kush po i financon dhe kush po i koordinon këto? Sepse kjo është e pabesueshme. Nuk kam parë kurrë diçka të tillë.”
Me gjithë kërcënimet, Musk mbetet i vendosur. Ai ka deklaruar se reagimi i ashpër është një dëshmi se politikat e tij dhe të Trump-it po funksionojnë dhe se intensiteti i kundërshtimeve tregon se po tronditin interesa të caktuara. Protestat kundër Musk-ut kanë vazhduar në të gjithë SHBA, me demonstrues që kritikojnë lidhjet e Teslës me administratën. Disa aktivistë kanë ndërmarrë masa ekstreme, duke shënjestruar madje edhe klientët e Teslës. Një fushatë e fundit online, e lidhur me grupin “DogeQuest”, ka krijuar një hartë interaktive për doxing, duke ekspozuar adresat e pronarëve të makinave Tesla dhe duke u bërë thirrje aktivistëve që t’i vandalizojnë ato me bojë spraj.
Prokurorja e Përgjithshme e SHBA, Pam Bondi, ka dënuar përshkallëzimin e dhunës, duke i quajtur sulmet ndaj Teslës dhe bashkëpunëtorëve të saj “asgjë më pak se terrorizëm i brendshëm”. Ajo është zotuar të ndjekë penalisht përgjegjësit dhe ka paralajmëruar se sulme të mëtejshme mund të çojnë në akuza federale./Business-Standard – Syri.net
Po ndodh...
ide
Bindja absolute dhe jeta e përjetshme!
Nga Erl Kodra
Europa, gropa dhe shpëtimtari!
Nga Armir Shkurti
Sikur të kishim nja shtatë a tetë si Kreshnik Spahiu!
Nga Edison Ypi
top
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128