Lajme flash
Profil/ U zgjodh në Këshillin Kombëtar të PD, por cilat janë dritë-hijet e Stresit?
31 Maj 2026, 19:05 / POLITIKË
Surprizë ishte kandidimi, por jo zgjedhja. Arkimed Lusha, i njohur gjerësisht në publik me emrin e tij të artit "Stresi", pas numërimit të votave, rezoltoi fitues si anëtar i Këshillit Kombëtar të PD-së së "Ripërtëritur". Zgjedhja e tij ishte e padiskutueshme që gjatë punimeve të Kuvendit Kombëtar ditën e shtunë në Pallatin e Kongreseve, pasi vetë Sali Berisha e promovoi në faqen e tij në FB, gjë që nuk e bëri me asnjë kandidat tjetër. Por kush është Arkimed Lusha? Ai është një nga reperët dhe figurat më të njohura të muzikës hip-hop në Shqipëri, i cili edhe pse 42 vjeç, sapo ka bërë hapin e tij zyrtar në politikën aktive dhe në një forum kaq të lartë të PD-së së Berishës.
Karriera muzikore dhe profili publik
Stresi e ka nisur karrierën e tij muzikore rreth vitit 2007 dhe është themelues i labelit "BadBoys4Life". Ai njihet për një stil rebel, tekstet e lidhura me jetën e rrugës dhe ka një audiencë të madhe mes të rinjve në Shqipëri dhe Kosovë (ku ka fituar edhe formate televizive si Big Brother VIP Kosova).
Pavarësisht imazhit të tij në muzikë, ai ka kryer studimet e larta për Psikologji, ndonëse nuk e ka ushtruar asnjëherë këtë profesion.
Lidhja Historike me Partinë Demokratike
Zgjedhja e tij në forumet e larta të PD-së vjen nga një lidhje e fortë e babait të tij me Sali Berishën. Ai është djali i Sali Lushajt, një prej figurave më besnike dhe i njohur ndër vite si mbështetës i afërt dhe ish-truprojë e Sali Berishës që nga vitet '90.
Vetë Stresi ka qenë gjithmonë publikisht aktiv në mbështetje të Partisë Demokratike, duke marrë pjesë nëpër mitingje, fushata elektorale dhe protesta të ndryshme opozitare ndër vite.
Mesazhi i tij Politik
Gjatë shpalljes së kandidaturës së tij për Këshillin Kombëtar, ai u shpreh se ky vendim nuk është një "katapultim", por vjen pas një angazhimi të gjatë e të natyrshëm pranë kësaj force politike. Ai theksoi:
"Kam ardhur nga rruga, nga jeta reale, nga sfidat që çdo i ri i njeh mirë. Prandaj dua që zëri ynë të dëgjohet aty ku merren vendimet. Ka ardhur koha që rinia të ngrihet, të flasë dhe të marrë vendin që meriton."
Përfshirja e tij në Këshillin Kombëtar përkon me një proces riorganizimi brenda PD-së, ku po synohet hapja ndaj figurave me ndikim publik te të rinjtë dhe rritja e kuotave të përfaqësimit rinor në forumet vendimmarrëse të partisë. Kur bëhet fjalë për figurën e Arkimed Lushajt (Stresit), problemet e tij të shpeshta me ligjin dhe policinë janë një nga pjesët më të përfolura të profilit të tij publik. Ai vetë nuk i ka fshehur kurrë; përkundrazi, një pjesë të madhe të rebelimit të tij muzikor dhe imazhit të "djalit të rrugës" e ka ndërtuar pikërisht mbi këto përplasje.
Në kontekstin politik, ky "historik" përbën thikën me dy presa për efektet që ka në publik dhe brenda PD, zgjedhja e Stresit në "parlamentin" e PD. Por cilat janë disa nga çështjet dhe problemet më kryesore penale që kanë shënjuar profilin e tij?
Arrestimet dhe përplasjet për armëmbajtje dhe lëndë narkotike
Gjatë viteve, Stresi ka qenë disa herë i arrestuar apo i shpallur në kërkim nga Policia e Shtetit për vepra të ndryshme penale. Ka pasur disa raste ku është shoqëruar apo arrestuar për armëmbajtje pa leje. Në disa raste, ai ka sfiduar hapur autoritetet duke postuar video apo foto në rrjetet sociale me armë, gjë që ka nxitur reagimin e policisë.
Në vitin 2018, ai u arrestua në një ambient hoteli në Tiranë nën akuzat për përfshirje në një grup kriminal të skeduar për trafikim lëndësh narkotike dhe armëmbajtje. Ai kaloi disa muaj në paraburgim përpara se të lirohej.
Arratisja spektakolare nga Komisariati
Një nga ngjarjet që i dha atij një lloj "famë legjendare" mes ndjekësve të tij, por që alarmoi autoritetet, ishte arratisja nga Komisariati Nr. 3 në Tiranë në vitin 2015.
Pasi ishte shoqëruar nga policia për shkelje të rregullave të qarkullimit dhe mosbindje, ai arriti të hidhej nga dritarja e katit të dytë të komisariatit dhe u largua në drejtim të paditur, duke nxjerrë zbuluar njerëzit e sigurimit (ngjarje e cila solli edhe pezullimin e disa punonjësve të policisë).
Protagonizmi në protesta dhe "I shpallur në kërkim"
Përtej problemeve të natyrës thjesht ordinere, Stresi ka pasur probleme me policinë edhe për shkak të aktivizmit të tij radikal në protesta. Pas vrasjes së të riut Klodian Rasha nga një punonjës policie, Stresi u bë një nga fytyrat kryesore dhe organizatorët e protestave të dhunshme që shpërthyen në Tiranë. Policia e shpalli në kërkim si një nga organizatorët kryesorë të tubimeve të paligjshme dhe shkatërrimit të pronës publike. Ai u largua për disa kohë në Kosovë për t'i shpëtuar arrestimit.
Stresi në Këshillin e PD dhe polemika mes demokratëve
Në çdo parti tradicionale apo konservatore, një CV e tillë penale do të ishte skualifikuese e menjëhershme. Megjithatë, në dinamikën aktuale të Partisë Demokratike (Rithemelimit), ky historik interpretohet në dy mënyra të ndryshme:
Mbështetësit e Berishës dhe një pjesë e lidershipit i shohin përplasjet e tij me policinë jo si kriminalitet ordiner, por si "përndjekje politike" nga regjimi në pushtet. Vetë Stresi në fjalimin e tij la të kuptohej se ai ka vuajtur presionin e policisë sepse ka qenë gjithmonë hapur kundër qeverisë socialiste. Për ta, rebelimi i tij dhe fakti që "nuk thyhet" para policisë shihet si trimëri dhe vlerë opozitare në terren.
Kurse për kritikët e Sali Berishës, përfshirja e tij në forume kaq të larta është provë e "degradimit të kritereve" të partisë. Ata argumentojnë se Berisha po promovon njerëz besnikë në funksion të halleve personale dhe familjare që ka me drejtësinē, pavarësisht se janë me precedentë penalë dhe çojnë në parti modelin e "rrugës" në vend të intelektualëve apo të rinjve të shkolluar./Alfapress.al
Po ndodh...
Kuvendi i izolimit të madh të Sali Berishës
Nga Bato Kosova
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128