Lajme flash
Mbi 3 miliardë euro për 10 ditë/ Europa, e goditura e madhe nga lufta në Lindjen e Mesme
11 Mars 2026, 18:44 / BOTA
Goditjet gjeopolitike në Lindjen e Mesme po japin efektet e tyre të drejtpërdrejta në ekonominë evropiane. Gjatë një seance plenare të mërkurën në Parlamentin Evropian, Presidentja e Komisionit Evropian, Ursula von der Leyen, deklaroi se vetëm dhjetë ditë konflikt i kanë kushtuar taksapaguesve evropianë 3 miliardë euro shtesë për importet e lëndëve djegëse fosile.
Fjalimi i saj, i cili preku sigurinë energjetike dhe qëndrimin e BE-së ndaj krizës në Lindjen e Mesme dhe Iranit, ka ngjallur reagime të forta dhe të polarizuara mes grupeve politike evropiane.
Fatura e energjisë dhe varësia evropiane
Von der Leyen theksoi se Bashkimi Evropian nuk është imun ndaj goditjeve të çmimeve, pavarësisht përpjekjeve për diversifikim. Ajo paraqiti shifra shqetësuese lidhur me tregjet e energjisë që nga fillimi i konfliktit të fundit.
Gazi është rritur me me 50%, ndërsa nafta ka një rritje me 27%.
“Ky është çmimi i varësisë sonë,” deklaroi ajo, duke paralajmëruar ashpër kundër çdo ideje për t’u rikthyer tek energjia ruse, një lëvizje që sipas saj do ta bënte Evropën “më të prekshme dhe më të dobët”.
Presidentja mbrojti gjithashtu Sistemin e Tregtimit të Emetimeve (ETS), duke argumentuar se pa të, BE-ja do të kishte konsumuar 100 miliardë metra kub gaz më shumë, ndonëse pranoi nevojën për ta modernizuar atë. Komisioni po shqyrton masa të reja për të lehtësuar barrën mbi familjet dhe bizneset, përfshirë përdorimin e kontratave afatgjata (PPA) dhe kufizime të mundshme të çmimeve të gazit. Ajo paralajmëroi gjithashtu një udhërrëfyes të ri,“Një Evropë, Një Treg”, që pritet të prezantohet në samitin e ardhshëm të liderëve të BE-së.
Qëndrimi i ashpër ndaj Iranit
Në frontin e politikës së jashtme, von der Leyen mbajti një qëndrim të ashpër ndaj zhvillimeve në Iran.
“Nuk do të derdhim lot,” tha ajo lidhur me rënien e regjimit iranian. “Shumë iranianë festuan rënien e Khameneit. Kjo është ajo që meriton populli iranian: liri, dinjitet dhe të drejtën për të vendosur të ardhmen e tij.”
Ajo kujtoi historikun e dhunës së regjimit, duke përmendur shtypjen e qytetarëve, mbështetjen e terrorizmit rajonal dhe ndihmën e ofruar për Rusinë në luftën kundër Ukrainës.
Reagimet, nga mbështetja te kritikat e ashpra
Fjalimi i Presidentes së Komisionit shkaktoi reagime të menjëhershme dhe të ndryshme në sallën e Strasburgut, si dhe nga kryeqytetet evropiane.
Qeveria spanjolle pati qëndrime të nuancuara. Ndërsa Ministri i Presidencës, Félix Bolaños, u shpreh se ndihej “më i rehatshëm” me theksin e von der Leyen te paqja, Ministrja e Mbrojtjes, Margarita Robles, e paralajmëroi atë kundër pranimit të një rendi të ri ndërkombëtar ku “mbizotëron ligji i më të fortit”.
Reagim pati edhe nga socialistët e BE-së. Udhëheqësja Iratxe García Perez e quajti “të papranueshme” justifikimin e sulmit ndaj Iranit përmes mos-keqardhjes për regjimin. “Është një gjë të mos qash për regjimin dhe një tjetër të heshtësh përballë vdekjes së të pafajshmëve,” tha ajo.
Nga e Majta e BE-së, eurodeputetja Manon Aubry përdori tone shumë të ashpra, duke e akuzuar von der Leyen për paaftësi në ndaljen e luftës në Palestinë dhe duke deklaruar: “Nëse pranoni luftën, dërgoni fëmijët tuaj atje.”
Liberalët (Renew), nëpërmjet Valeria Hayer, kërkuan që Evropa të mos mbetet një “nënkontraktore e Shteteve të Bashkuara” në menaxhimin e pasojave të lëna nga diplomacia amerikane.
Kurse Patriotët për Evropën, nëpërmjet Jordan Bardella (Franca), u përqendruan te siguria e Izraelit, duke deklaruar se “një Liban pa Hezbollahun është garancia më e madhe e sigurisë për Izraelin,” pavarësisht paqëndrueshmërisë së re rajonale.
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128