Shqip
Luaj me Fjalëkryq
Lajme flash

Trupat eritrease hyjnë në Tigray, përshkallëzohen luftimet në Etiopi

2026-10-07 23:04:00 / BOTA ALFA PRESS
Trupat eritrease hyjnë në Tigray, përshkallëzohen luftimet

Trupat eritrease kanë hyrë në veri të Etiopisë dhe po lëvizin drejt zonave ku janë zhvilluar përleshje mes ushtrisë kombëtare dhe forcave rajonale të Tigrayt, sipas dëshmive të banorëve të qytetit Adigrat për BBC.

Luftimet në rajon nisën rreth dy javë më parë, pas muajsh tensionesh mes qeverisë etiopiane dhe Frontit Çlirimtar të Popullit të Tigrayt (TPLF), i cili kontrollon rajonin. Të dyja palët akuzojnë njëra-tjetrën për shkeljen e marrëveshjes së vitit 2022 që i dha fund një lufte dyvjeçare.

Etiopia ka akuzuar gjithashtu Eritrenë se po mbështet TPLF-në, pretendim që Asmara e ka mohuar më herët. Përshkallëzimi i fundit vjen pas krijimit në shtator të një aleance të re të grupeve të armatosura në Etiopi, ku bën pjesë edhe TPLF-ja.

Gjatë fundjavës, forcat e TPLF-së u tërhoqën nga Mekelle, qyteti kryesor i Tigrayt, i cili ndodhet rreth 115 kilometra në jug të Adigratit dhe tashmë kontrollohet nga ushtria etiopiane.

 

Sipas dëshmive të banorëve, forcat eritrease kanë lëvizur nga qyteti kufitar Zalambessa drejt Tigray-t qendror. Kolona ushtarake raportohet se ka kaluar përmes Adigratit dhe është drejtuar drejt Edaga Hamusit, një qytet që ndodhet mes Adigratit dhe Mekelles.

Një banor i Adigratit tha për BBC se kishte parë rreth 40 kamionë me ushtarë që lëviznin në drejtim të jugut. Një tjetër banor raportoi se kishte parë 20 deri në 30 kamionë të mëdhenj me targa eritrease duke u drejtuar drejt Edaga Hamusit. Sipas tij, në zonë janë parë edhe automjete që transportonin armë të rënda, përfshirë armë kundërajrore, ndërsa disa trupa po lëviznin në këmbë.

Një burim në Mekelle tha se të afërm në Adigrat kishin raportuar lëvizje edhe më të mëdha, duke përmendur deri në 60 kamionë me ushtarë, të cilët më pas dyshohet se janë dislokuar në terrene malore pranë Edaga Hamusit.

Pamje të publikuara në rrjetet sociale duket se tregojnë kamionë ushtarakë të ngarkuar me trupa që lëvizin drejt Adigratit, Edaga Hamus dhe ndoshta Wukros, një tjetër qytet i rëndësishëm në aksin mes Adigratit dhe Mekelles. BBC thekson se këto pamje nuk janë verifikuar në mënyrë të pavarur.

Ndërkohë, burime në Wukro thanë se ushtarë të ushtrisë kombëtare dhe luftëtarë aleatë kanë hyrë në qytet të mërkurën, pas një shkëmbimi të armëve të rënda rreth 15 kilometra në jug të tij.

Përshkallëzimi i konfliktit ka rritur frikën për një përhapje të luftës në rajon. Eritrea ishte aleate e Etiopisë gjatë luftës së viteve 2020-2022 kundër TPLF-së, por marrëdhëniet mes dy vendeve janë përkeqësuar ndjeshëm që prej përfundimit të konfliktit. Javën e kaluar, Etiopia dhe Eritrea ndërprenë marrëdhëniet diplomatike, duke shtuar shqetësimet për një konflikt më të gjerë në Bririn e Afrikës.

 

Po ndodh...

Dua të lexoj më shumë lajme

ide

top

16:44 BOTA

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128