English
Luaj me Fjalëkryq
Lajme flash

Taulanda Jupi: Të mos i lëmë në hije fëmijët që shkëlqejnë ndryshe

2 Prill 2025, 11:08 / POLITIKË ALFA PRESS

Taulanda Jupi: Të mos i lëmë në hije fëmijët

Në Ditën Botërore të Autizmit, kandidatja për deputete, Taulanda Jupi, theksoi domosdoshmërinë për të krijuar një shoqëri më të drejtë dhe gjithëpërfshirëse për fëmijët në spektrin e autizmit.

“Autizmi nuk është një kufizim, por një mënyrë tjetër e të perceptuarit, të të menduarit, të të jetuarit,” shprehet Jupi, duke nënvizuar se është detyrë e shoqërisë të përshtatë sistemet, jo të kërkojë ndryshimin e këtyre fëmijëve.

Ajo ka vënë theksin te sfidat me të cilat përballen prindërit dhe mësuesit, si dhe mungesën e politikave të qëndrueshme: “Në vend të mëshirës, këta fëmijë kanë nevojë për besim. Në vend të përjashtimit, për qasje të barabartë.”

Jupi bëri thirrje për reforma arsimore dhe mbështetje institucionale për familjet, duke e cilësuar këtë si një detyrim për një Shqipëri më të drejtë dhe më përparimtare.

Postimi i plotë në faqen e kandidates:

Të mos i lëmë në hije fëmijët që shkëlqejnë ndryshe. 

Në një shoqëri të ndershme dhe të zhvilluar, nuk ka vend për të heshtur përballë paragjykimeve.

Në Ditën Botërore të Autizmit, nuk flasim thjesht për një çështje shëndetësore apo sociale. Flasim për një betejë të përditshme për dinjitetin, për të drejtën për të qenë i pranishëm, i përfshirë dhe i respektuar.

Autizmi nuk është një kufizim. Është një mënyrë tjetër e të perceptuarit, të të menduarit, të të jetuarit. Dhe për këtë arsye, është përgjegjësia jonë si shoqëri, jo të përpiqemi t’i ndryshojmë fëmijët që janë në spektrin e autizmit, por të ndryshojmë vetë sistemin: arsimin, përqasjen institucionale, të folurën rreth autizmit.

Kam parë nga afër përpjekjen e prindërve që luftojnë çdo ditë për të siguruar terapinë e nevojshme për fëmijët e tyre. Kam dëgjuar mësues të përkushtuar që ndihen të pambështetur përballë sfidave të mësimdhënies për fëmijë me nevoja të veçanta. Dhe mbi të gjitha, kam njohur fëmijë të mrekullueshëm, me talent, imagjinatë dhe ndjeshmëri, të cilët shoqëria ende nuk di t’i mbështesë siç duhet.

Në vend të mëshirës, këta fëmijë kanë nevojë për besim. Në vend të përjashtimit, për qasje të barabartë. Dhe mbi të gjitha, për politika që nuk ndryshojnë me ndërrimin e qeverive, por që ndërtojnë themele të forta për të ardhmen.

Ky është një zotim që nuk përfundon këtu. Ky është një angazhim që do të përkthehet në reforma arsimore, mbështetje për familjet, trajnime për profesionistët dhe një ndryshim rrënjësor në mënyrën se si i kuptojmë dhe i trajtojmë dallimet.

Në një Shqipëri që synon të jetë e drejtë dhe e përparuar, nuk ka vend për fëmijë që mbeten në hije.

Sot, le të flasim për autizmin jo si një ditë në kalendar, por si një thirrje për veprim. Le të dëgjojmë, të mësojmë dhe të veprojmë me kurajo, me largpamësi dhe me përkushtim.

 

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128