Lajme flash
Prokuroria e Përgjithshme: 61167 dosje në shqyrtim, 10,52% më shumë se në 2023-shin
4 Prill 2025, 16:22 / AKTUALITET
Prokuroria e Përgjithshme ka depozituar në Kuvend raportin e veprimtarisë vjetore për vitin 2024.
Raporti përmbledh aktivitetin e Prokurorisë së Përgjithshme dhe jepen të dhëna të detajuara për numrin, llojet, shtrirjen territoriale, intensitetin dhe format e kriminalitetit në vend, për efiçencën e prokurorive me juridiksion të përgjithshëm dhe efektivitetin e hetimeve, ndjekjes penale, cilësinë e përfaqësimit të akuzës në gjyq, ekzekutimin e vendimeve penale, analizën e profilit të viktimave, kostot e shpenzimeve procedurale penale dhe veprimtari të tjera thelbësore përgjatë vitit 2024, si dhe objektivat prioritare për vitin 2025.
Sipas raportit, gjatë vitit 2024, në organin e prokurorisë janë trajtuar 61167 materiale në shqyrtim që përbën një rritje të çështjeve prej 10,52% në krahasim me vitin 2023.
Sipas të dhënave të publikuara në raport, “referuar analizës dhe vlerësimit të tendencave të kriminalitetit, bazuar në të dhënat statistikore, gjatë vitit 2024, konstatohet një rritje e ndjeshme e numrit të procedimeve të regjistruara për disa kategori të veprave penale.
“Veprat penale kundër pastrimit të parave, tregojnë rritjen më të lartë prej 58,86%, falsifikimi i monedhave dhe letrave me vlerë 48%, krimet në fushën e doganave 39,67% si dhe veprat penale në lidhje me veprimtaritë bankare dhe financiare 33,33%”, thuhet të raportin e Prokurorisë së Përgjithshme.
Sipas PP “këto të dhëna evidentojnë forcim të ndjekjes penale ndaj veprimtarive kriminale që prekin sigurinë ekonomike të vendit, si dhe forcim të bashkëpunimit institucional dhe të sistemit të mbikëqyrjes e kontrollit”.
“Një rritje e konsiderueshme e procedimeve të regjistruara vërehet edhe në veprat penale kundër personit, si veprat kundër lirisë së personit 30,59%, krimet seksuale 29,84%, krimet kundër jetës të kryera me dashje 21,72% dhe ato me pakujdesi, veprat kundër shëndetit të kryera me dashje 29,10% dhe ato me pakujdesi, veprat penale kundër moralit dhe dinjitetit 28,87%, veprat penale kundër fëmijëve, martesës dhe familjes 18,37%, si dhe veprat penale që rrezikojnë jetën dhe shëndetin nga ndërprerja e shtatzënisë ose mosdhënia e ndihmës 18,73%”, thuhet në raport.
Sipas raportit të Prokurorisë së Përgjithshme “gjatë vitit 2024, në organin e Prokurorisë janë trajtuar 61167 materiale në shqyrtim që përbën një rritje prej 10,52% në krahasim me vitin 2023. Janë ndjekur gjithsej 47576 procedime penale, që përbëjnë një rritje prej 4,79% në krahasim me vitin 2023, nga të cilat: 24956 janë procedime penale të regjistruara, me një rritje prej 3,35% në krahasim me vitin 2023; 22441 janë procedime penale të mbartura, me një rritje prej 6,59% krahasuar me procedimet e mbartura në vitin 2023 dhe 179 janë procedime penale të rifilluara”.
“Është vendosur mosfillimi për 13591 referime dhe kallëzime penale, që përbën një rritje prej 36,65% në krahasim me vitin 2023”, thuhet në raport.
“Gjatë vitit 2024 nga prokuroritë pranë gjykatës të shkallës së parë është ngritur dhe përfaqësuar akuza në gjykatë në emër të shtetit shqiptar për 9052 procedime penale (ulje prej 6,69% në krahasim me vitin 2023) me 10781 të pandehur (ulje prej 5,84% në krahasim me vitin 2023). Gjithashtu, janë paraqitur në gjykatë 13062 kërkesa lidhur me masat e sigurimit personal”, thuhet në raport.
Sipas Prokurorisë së Përgjithshme “numri më i madh i procedimeve penale të regjistruara rezulton në Prokurorinë pranë Gjykatës së Shkallës së Parë me Juridiksion të Përgjithshëm Tiranë me 35,47% të numrit total të procedimeve të regjistruara në shkallë vendi; në vijim, Durrës 10,36%; Fier 8,05%; Shkodër 7,35%; Korçë 6,98%; Elbasan 6,27%; Vlorë 5,99%; Lezhë 4,84%; Sarandë 3,87%; Gjirokastër 3,05%; Berat 2,97%; Kukës 2,48%; Dibër 2,31% të numrit total të procedimeve penale të regjistruara në shkallë vendi”.
“Koeficienti i kriminalitetit për procedimet penale të regjistruara, për 100 mijë banorë në vitin 2024 është 1037, ndërsa në vitin 2023 koeficienti i kriminalitetit ka qenë 872”, thuhet në raport.
Sa i takon kallëzimeve nga nëpunësit publikë në raport thuhet: “Në vitin 2024 rezulton të kenë ardhur në prokurori 802 kallëzime nga nëpunësit publikë, që përbën rritje prej 23,38% krahasuar me vitin 2023”.
“Referime nga Policia e Shtetit dhe polici të tjera me atributet e policisë gjyqësore, në vitin 2024 rezulton të kenë ardhur në prokurori 34587 referime, që përbën rritje prej 6,69% në krahasim me vitin 2022, në vitin 2023 rezulton të kenë ardhur në prokurori 32418 referime, që përbën rritje prej 2,73% në krahasim me vitin 2022, në vitin 2022 rezulton të kenë ardhur në prokurori 31557 referime, që përbën ulje prej 6,25% në krahasim me vitin 2021, ndërkohë që në vitin 2021 rezulton të kenë ardhur në prokurori 33662 referime, që përbën rritje prej 5,86% në krahasim me vitin 2020”, thuhet në raport.
Sipas raporti “gjatë vitit 2024 është përdorur përgjimi i komunikimeve elektronike nga prokurorët në fazën e hetimeve paraprake si mjet për sigurimin e provës në 405 procedime penale. Është realizuar përgjimi për 2361 pajisje fundore në përdorim të 2159 subjekteve ndaj të cilëve ishte lejuar përgjimi. Në total janë ekzekutuar 933 vendime për përgjim të autorizuara nga gjykata dhe 538 urdhra/autorizime të prokurorit”.
“Autoritetet gjyqësore të huaja, gjatë vitit 2024 kanë paraqitur në vendin tonë 599 kërkesa për ndihmë juridike në kuadër të çështjeve penale, tregues i cili rezulton me rritje në masën 39% krahasuar me vitin 2023, vit në të cilin janë paraqitur 431 letërporosi”, thuhet në raport.
Po ndodh...
Tallja e Ramës me integrimin në BE
Nga Namir Lapardhaja
ide
“Kush flet më për Lulzim Bashën?!”
Nga Sidi Hasanaj
Basha surpriza e kësaj fushate!
Nga Alban Daci
Rama përball Starmer/ Dy Kryeministra, dy botë!
Nga Lutfi Dervishi
top
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128