Tentoi të korruptonte policin kufitar me 50 euro, vihet nën hetim 30-vjeçari në Kakavijë

25 Maj 2023, 11:20 / AKTUALITET ALFA PRESS

Tentoi të korruptonte policin kufitar me 50 euro, vihet nën hetim

Një 30-vjeçar është vënë nën hetim pasi tentoi të korruptonte një punonjës të Policisë Kufitare Kakavijë duke i dhënë 50 euro, me qëllim kalimin e kufirit ne mënyrë të parregullt. 30-vjeçari me qëllim që të kalonte kufirin e Shqipërisë, kishte vendosur 50 euro brenda pasaportës në mënyrë që polici ta lejonte të kalonte në mënyrë të parregullt, por 'e pësoi'.

Për pasojë është vënë nën hetim 30-vjeçari me iniciale S. D, ndërsa uniformat blu referuan materialet në Prokurori.

NJOFTIMI I PLOTË:

PKK Kakavije, Gjirokastër

Tentoi të korruptonte punonjësin e Policisë Kufitare, për të dalë në mënyrë të parregullt nga Shqipëria, pasi ishte kthyer deportiv nga pala greke, procedohet penalisht 30-vjeçari. Punonjësit e Policisë Kufitare të PKK Kakavije, në vijim të kontrolleve të bazuara në analizën e riskut, me qëllim parandalimin dhe goditjen e krimeve kufitare, kanë goditur një rast të tentativës për të korruptuar punonjësin e Policisë, me qëllim kalimin e kufirit në mënyrë të parregullt.

Shërbimet e Policisë Kufitare, në dalje të RSh-së, i kanë kërkuar shtetasit S. D., pasaportën, me qëllim kryerjen e procedurës së regjistrimit. Shtetasi S. D. e ka dorëzuar pasaportën me një kartmonedhë 50 euro në brendësi të saj, me qëllim korruptimin e punonjësit të Policisë Kufitare, që ta lejonte të kalonte kufirin në mënyrë të parregullt, duke qenë se shtetasi S. D. ishte kthyer deportiv nga Policia Kufitare e Greqisë.

Në vijim të veprimeve procedurale për këtë rast, specialistët për Hetimin e Krimeve Ekonomiko-Financiare të Drejtorisë Vendore të Policisë Gjirokastër referuan materialet në Prokurori dhe nisi procedimi në gjendje të lirë për shtetasin S. D., 30 vjeç, banues në Kuçovë, për veprën penale "Korrupsioni aktiv i personave që ushtrojnë funksione publike". Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.



 

 

Po ndodh...