Lajme flash
Donald Trump nënshkruan dekretet për ringritjen e industrisë bërthamore, synohet rigjallërimi i prodhimit dhe pasurimit të uraniumit në SHBA
23 Maj 2025, 20:46 / BOTA
Presidenti i Shteteve të Bashkuara, Donald Trump, ka nënshkruar dekretet e para ekzekutive që synojnë ringjalljen e industrisë bërthamore, duke lehtësuar proceset rregullatore për miratimin e reaktorëve të rinj dhe duke forcuar zinxhirët e furnizimit me karburant bërthamor.
I përballur me rritjen e parë të kërkesës për energji në më shumë se dy dekada – si pasojë e bumit të inteligjencës artificiale – Trump shpalli gjendje të jashtëzakonshme energjetike ditën e parë të mandatit të tij presidencial.
Në SHBA, licencimi i reaktorëve bërthamorë mund të zgjasë mbi një dekadë, një proces që është projektuar për të prioritizuar sigurinë, por që ka penguar ndjeshëm ndërtimin e impianteve të reja.
“Me këto veprime, Presidenti Trump i dërgon një mesazh botës: Amerika do të rindërtohet dhe rilindja bërthamore amerikane mund të nisë,” deklaroi Michael Kratsios, drejtor i Zyrës për Politikën Shkencore dhe Teknologjike të Shtëpisë së Bardhë.
Dekretet përfshijnë ristrukturim të rëndësishëm të Komisionit Rregullator Bërthamor, duke shqyrtuar numrin e stafit dhe duke udhëzuar Departamentin e Energjisë dhe Departamentin e Mbrojtjes që të bashkëpunojnë për ndërtimin e centraleve bërthamore në toka federale, sipas një zyrtari të lartë të Shtëpisë së Bardhë. Qeveria parashikon që Departamenti i Mbrojtjes të luajë rol kyç në porositjen dhe instalimin e reaktorëve në bazat ushtarake.
Dekretet synojnë gjithashtu rigjallërimin e prodhimit dhe pasurimit të uraniumit në SHBA.
Pjesa më e madhe e veprimeve të deritanishme të Trumpit është përqendruar në forcimin e karburanteve fosile si qymyri, nafta dhe gazi natyror. Megjithatë, zyrtarët e administratës e mbështesin gjithashtu energjinë bërthamore, e cila kohët e fundit ka fituar mbështetje gjithnjë e më të gjerë nga të dy krahët politikë.
Disa demokratë e mbështesin energjinë bërthamore, pasi centrale të tilla nuk emetojnë gazra serrë që ndikojnë në ngrohjen globale – edhe pse ambientalistët shprehin shqetësime për mbetjet radioaktive dhe sigurinë e reaktorëve.
Nga ana tjetër, republikanët, të cilët janë më pak të shqetësuar për ndryshimet klimatike, e mbështesin sepse besojnë se energjia bërthamore mund të forcojë sigurinë energjetike të SHBA.
Po ndodh...
Amerika mund të tërhiqet nga Europa, por jo nga SPAK
Nga Gentian Gaba
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128