English
Luaj me Fjalëkryq
Lajme flash

Superkompjuteri i NASA-s zbulon një strukturë të çuditshme spirale në skajin e sistemit tonë diellor

24 Shkurt 2025, 16:14 / MISTERE&KURIOZITETE ALFA PRESS

Superkompjuteri i NASA-s zbulon një strukturë të çuditshme

Reja e Oortit, një mbështjellëse misterioze e objekteve të akullta në kufirin e sistemit diellor, mund të ketë dy krahë spiralë që e bëjnë të ngjajë me një galaktikë në miniaturë, sugjeron një studim i ri.

Forma e saktë e Resë së Oortit dhe ndikimi i forcave përtej sistemit tonë diellor mbeten ende një mister. Tani, shkencëtarët kanë zhvilluar një model të ri që sugjeron se struktura e brendshme e Resë së Oortit mund të ketë formën e një disku spiral.

Ata publikuan gjetjet e tyre më 16 shkurt në platformën arXiv, por studimi nuk është rishikuar ende nga ekspertë të tjerë.

Reja e Oortit përbëhet nga mbetjet e sistemit diellor që nuk u përdorën gjatë formimit të gjigantëve gazorë (Jupiterit, Saturnit, Uranit dhe Neptunit), rreth 4.6 miliardë vjet më parë.

Disa nga këto objekte janë aq të mëdha, sa mund të konsiderohen planete xhuxhë.

Ndërsa planetët nisën të orbitojnë rreth Diellit, lëvizjet e tyre e shtynë këtë material të tepërt përtej orbitës së Plutonit, ku ai ndodhet edhe sot.

Skaji i brendshëm i Resë së Oortit ndodhet midis 2000 dhe 5000 njësive astronomike (AU) nga Dielli, ndërsa skaji i saj i jashtëm shtrihet midis 10,000 dhe 100,000 AU. (Një njësi astronomike është e barabartë me rreth 150 milionë kilometra, distanca mesatare midis Tokës dhe Diellit.

Madje edhe me shpejtësinë e saj prej 1.6 milionë kilometrash në ditë, sonda e NASA-s Voyager 1 nuk do të arrijë në Resën e Oortit për 300 vjet dhe nuk do ta kalojë atë për 300,000 vjet.

Objektet e Resë së Oortit janë tepër të vogla, të ftohta dhe lëvizin shumë ngadalë për të qenë të dukshme edhe për teleskopët më të fuqishëm.

Shumica e provave për ekzistencën e saj vijnë nga kometat me orbitë të gjatë, të cilat ndonjëherë shpërngulen nga reja për shkak të ndërhyrjeve gravitacionale dhe fillojnë të sillen rreth Diellit.

Për të kuptuar formën e mundshme të Resë së Oortit, shkencëtarët analizuan orbitat e kometave dhe ndikimet gravitacionale nga brenda dhe jashtë sistemit tonë diellor.

Një element kyç në formimin e kësaj reje është batica galaktike, e cila përfshin tërheqjen gravitacionale nga ylli ynë, vrimat e zeza dhe qendra e galaktikës.

Këto forca kanë një ndikim të madh tek objektet e Resë së Oortit, por nuk janë të dukshme për trupat më afër Diellit, sepse ndikimi gravitacional i Diellit është më i fortë atje.

Kur shkencëtarët përdorën superkompjuterin Pleiades të NASA-s për të përpunuar modelin e tyre, ata zbuluan një strukturë spirale në pjesën e brendshme të Resë së Oortit, mes 1000 dhe 10,000 njësive astronomike.

Sipas modelit, krahët e kësaj spiraleje shtrihen deri në 15,000 njësi astronomike nga skaji në skaj.

Për të vërtetuar strukturën spirale të Resë së Oortit, shkencëtarët duhet të ndjekin drejtpërdrejt objektet e saj ose të izolojnë dritën e reflektuar nga këto objekte mes dritës së yjeve të tjerë.

Të dyja këto metoda janë jashtëzakonisht të vështira dhe deri më tani, nuk janë investuar burime për to.

Megjithatë, shkencëtarët besojnë se studimi i Resë së Oortit është thelbësor për të kuptuar nga vijnë kometat, si u formua sistemi ynë diellor dhe si ndikon Reja e Oortit në kozmosin tonë.

Për këtë arsye, ata sugjerojnë se ka ardhur koha që të fillojmë ta studiojmë seriozisht këtë re misterioze që ndodhet në kufirin e sistemit tonë diellor.

 

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128