English
Luaj me Fjalëkryq
Lajme flash

Dhjetë pikantet e euroderbit, ja çfarë duhet të dini para Real-Atletiko

4 Mars 2025, 18:23 / SPORT ALFA PRESS

Dhjetë pikantet e euroderbit, ja çfarë duhet të dini para

Kur flitet për një përballje si ajo mes Realit të Madridit dhe Atletikos, natyrisht që nga pas është një histori e mbushur me plot me zhvillime. Gazeta spanjolle “Mundo Deportivo” ka bërë një përmbledhje të disa statistikave që kanë lidhje me përballjen e sotme.

TRI BARAZIME NË TRI DERBET E FUNDIT NË “BERNABEU” – Në tri përballjet e fundit mes dy gjigantëve të Madridit në stadiumin “Santiago Bernabeu”, nuk ka pasur asnjë fitues. E veçanta është se të gjitha ndeshjet janë mbyllur në barazim 1-1. Barazimi i fundit ishte ai në La Liga më 8 shkurt, kur golit të Julian Alvarez (11-m) për mysafirët iu përgjigj Mbape për Realin.

EUROPA E GJITHA PËR REALIN – Në secilën nga pesë përballjet në fazën e eliminimeve në Ligën e Kampionëve ose Kupë e Kampioneve, Reali ka dalë gjithmonë fitues përballë Atletikos. Përballja e fundit daton në sezonin 2016-2017 në gjysmëfinale (3-0 në ndeshjen e parë në “Bernabeu” dhe 2-1 në ndeshjen e kthimit në “Calderón”).

GJYQTARI DHE KARTONI I KUQ PËR SIMEONEN – Ndër precedentët e arbitrit të ndeshjes, francezit Klement Turpë, spikat përjashtimi i Diego Simeones në ndeshjen e parë gjysmëfinale të Europa League kundër Arsenalit, të luajtur më 26 prill 2018 në Londër. Trajneri i Atletikos ofendoi arbitrin dhe u dënua me katër ndeshje pezullim.

NJË DERBI 12.5 MILIONË EURO – Fituesi i ndeshjes do të kalojë në çerekfinale të Ligës së Kampionëve me një çmim prej 12.5 milionë euro. Reali deri më tani ka fituar 49.7 milionë euro në këtë edicion të Champions, ndërsa Atletiko ka fituar 53.5 milionë deri më tani.

ATLETIKO, NJË HUMBJE NË 26 NDESHJET E FUNDIT – Atletiko ka humbur vetëm një nga 26 ndeshjet e fundit, atë kundër Leganes në “Butarque”. Kjo ecuri përfshin pesë fitore radhazi në Ligën e Kampionëve.

PORTA E PASTËR – Atletiko ka ruajtur portën e saj të paprekur në 18 nga 40 ndeshjet e saj në këtë sezon, (45%), ndërsa Reali i Madridit e ka bërë këtë në 16 nga 44 ndeshjet e tyre (36%). Në vitin 2025, skuadra bardhekuq mbajti portën e pastër në gjysmën e katërmbëdhjetë ndeshjeve të saj, kurse skuadra e bardhë vetëm në gjashtë nga 18 ndeshjet e saj.

TRAJNERËT, 26 NDESHJE MES TYRE – Dy trajnerët përkatës, Ançeloti (Real) dhe Simeone (Atletiko) janë përballur në 26 raste, me një bilanc të barabartë: nëntë fitore për secilin dhe tetë barazime

REALI NJË “TREN” NË SHTËPI – Reali ka shënuar 17 gola në pesë ndeshje në shtëpi në Ligën e Kampionëve të këtij viti, me një shifër që i kalon 3 golat për ndeshje. “Los Blancos” kanë fituar 21 nga 28 ndeshjet e fundit evropiane në shtëpi.

MBAPE – Kilië Mbape ka shënuar 14 gola në 13 ndeshjet e tij të fundit për Realin, duke qenë golashënuesi më i mirë i ekipit në këtë sezon me 28 rrjeta.

JULIAN ALVAREZ – Golashënuesi më i mirë i Atletikos, Julian Alvarez, ka shënuar 21 gola këtë sezon, katër prej tyre në tre ndeshjet e fundit në stadiumin “Santiago Bernabeu”, ku shënoi dhe golin e barazimit mes dy skuadrave më 8 shkurt.

 

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128