Përkujtohet sot në 102 vjetorin e lindjes, artistja Marie Logoreci

23 Shtator 2022, 14:26 / TRENDING ALFA PRESS

Përkujtohet sot në 102 vjetorin e lindjes, artistja Marie Logoreci

Marie Logoreci, artistja e kinematografisë shqiptare është përkujtuar sot me rastin e 102 vjetorit të lindjes.Logoreci lindi më 23 shtator 1920, në Shkodër.

Drejtoria e Përgjithshme e Arkivave ka risjellë në kujtesë, në këtë përvjetor, aktoren e madhe shqiptare. Vokacioni i saj artistik do të shpalosej që kur ishte vajzë e re, teksa pati nisur të luante rolet e para në teatrin e shkollës. Talenti që zotëronte Maria, shkonte edhe në drejtim të muzikës.

Në vitin 1945, nisi të këndojë në valët e Radio Tiranës dhe repertori i saj u zgjerua në koncertet e njëpasnjëshme të mbajtura brenda dhe jashtë vendit. Mandej, në vitin 1947 u ngjit për herë të parë në skenën e Teatrit Popullor, për të mishëruar personazhin e Elmirës në kryekomedinë e Molierit, “Tartufi”.

Në ekranin e filmit do të plazmohej së pari në filmin “Skënderbeu”. Nuk do të mungonte as në filmin e parë shqiptar me metrazh të shkurtër, “Fëmijët e saj”, si edhe as në filmin e parë tërësisht shqiptar, “Tana”.

Disa prej roleve të saj të pritura më mirë nga publiku janë: Xhesi te “Çështja ruse”, Alisa Lengton te “Rrënjë të thella”, Kristina Padera tek “Komploti i të dënuarve”, Fatimja te “Halili dhe Hajrija”, Aljona Patrovna te “Gjashtë dashnorët”, Lokja tek “Toka jonë”, Gertruda tek “Hamleti”, Bernarda Alba te “Shtëpia e Bernarda Albës” dhe Gjela te “Përmbytja e madhe”.

Logoreci ndërroi jetë në moshën 66-vjeçare, si pasojë e një ataku kardiak.

Krahas urdhrave dhe medaljeve të shumta, artistja mban edhe titujt e lartë “Artiste e Popullit”, “Artiste e Merituar” dhe “Nderi i Kombit”.

 

Po ndodh...