Lajme flash
Von der Leyen i ofron Trumpit marrëveshje tarifash zero për zero për të gjitha mallrat industriale
7 Prill 2025, 16:44 / BOTA
Tensionet tregtare mes Bashkimit Evropian dhe Shteteve të Bashkuara kanë arritur kulmin, teksa Presidentja e Komisionit Evropian, Ursula von der Leyen, deklaroi se Evropa është “gjithmonë e gatshme për një marrëveshje të mirë”, por gjithashtu e përgatitur të kundërpërgjigjet nëse SHBA zbaton tarifat e reja të shpallura nga Presidenti Donald Trump.
Në një deklaratë pasditen e së hënës, von der Leyen tha se Brukseli i ka ofruar Uashingtonit një marrëveshje “zero për zero” për të gjitha mallrat industriale, një qasje që BE ka ndjekur me sukses me partnerë të tjerë.
Por ajo paralajmëroi se nëse negociatat dështojnë, BE-ja do të përdorë të gjitha mjetet për të mbrojtur interesat e saj.
“Ne e kemi mbajtur këtë ofertë në tryezë, por jemi gjithashtu të përgatitur të përgjigjemi përmes kundërmasave,” tha von der Leyen, duke shtuar se Komisioni është gati të përdorë një instrument të ri kundër shtrëngimit, i miratuar në vitin 2023.
Trump ka paralajmëruar tarifa të përgjithshme prej 20% për të gjitha importet nga BE, që do të hyjnë në fuqi më 9 prill. Ndërkohë, çeliku, alumini dhe makinat do të goditen me një tarifë të veçantë prej 25%.
Masa pritet të prekë mbi 380 miliardë euro produkte evropiane, ndërsa sektorë si farmaceutikët, gjysmëpërçuesit dhe energjia janë përjashtuar.
“Tarifat gjithëpërfshirëse të Presidentit Trump janë një pikë kthese për SHBA-në dhe do të kenë një kosto të madhe për konsumatorët dhe bizneset amerikane,” tha von der Leyen, duke e quajtur këtë një kërcënim serioz për ekonominë globale.
Brukseli është gjithashtu i shqetësuar për ndikimet indirekte, me frikën se tarifat ndaluese kundër vendeve aziatike – që shkojnë deri në 49% për Kamboxhian dhe 54% për Kinën – do të detyrojnë këto ekonomi eksportuese të ridrejtojnë mallrat drejt tregjeve evropiane, duke krijuar trysni të reja në BE.
Për këtë qëllim, Komisioni Evropian do të ngrejë një “Task Forcë të Mbikëqyrjes së Importit” për të monitoruar nga afër rritjet e papritura në importe dhe për të parandaluar devijimin e tregtisë që mund të dëmtojë industrinë evropiane.
“Ne do të veprojmë nëse shohim që një produkt apo sektor i caktuar pëson rritje të papritur për shkak të këtyre zhvillimeve globale,” përfundoi presidentja e Komisionit.
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128