Lajme flash
Zjarret në Arizona dhe nxehtësia ekstreme nxisin evakuimet pranë Kanionit të Madh
11 Korrik 2025, 19:01 / BOTA
Një zjarr i fuqishëm që po përhapet me shpejtësi në veriperëndim të Parkut Kombëtar të Kanionit të Madh në Arizona ka detyruar autoritetet të mbyllin Rimin Verior dhe të lëshojnë urdhra evakuimi për banorët dhe vizitorët në zonë.
Zjarri, i quajtur “Sage Fire” (Zjarri i Sherbelës), dyshohet se është shkaktuar nga rrufeja më 9 korrik dhe ka përfshirë rreth 400 hektarë tokë pranë Liqenit Jacob.
Sipas autoriteteve, flakët janë ende plotësisht jashtë kontrollit dhe po përhapen në mënyrë aktive, të nxitura nga temperaturat e larta, erërat e forta dhe bimësia e thatë.
Shërbimi i Parkut Kombëtar e ka cilësuar zjarrin si “0% të kontrolluar” dhe ka bërë thirrje për evakuim të menjëhershëm të të gjithë vizitorëve në Rimin Verior.
Paralelisht, të premten është lëshuar një paralajmërim për nxehtësi ekstreme, me temperatura që arrijnë deri në 46 gradë Celsius. Autoritetet u kanë bërë thirrje turistëve të mos ndërmarrin ecje në Kanionin e Madh për shkak të kushteve të rrezikshme.
Tragjikisht, një alpinist 67-vjeçar nga Teksasi humbi jetën të martën në Shtegun South Kaibab, poshtë Cedar Ridge. Ai u gjet pa ndjenja dhe përpjekjet për ta ringjallur rezultuan të pasuksesshme, sipas një deklarate të Shërbimit të Parkut Kombëtar.
Ekipet e emergjencës kanë angazhuar njësi tokësore dhe mjetet ajrore për të luftuar zjarrin, duke përdorur retardantë zjarri që nga e mërkura.
Për shkak të përparimit të flakëve drejt zonës së banuar pranë Liqenit Jacob, që ndodhet tashmë nën urdhër evakuimi, lëshimi i një alarmi emergjent u bë i domosdoshëm.
Gjithashtu, një pjesë e rëndësishme rrugore – Rruga Shtetërore 89A – është mbyllur deri në një njoftim të dytë, me paralajmërime për vonesa të zgjatura për drejtuesit e mjeteve.
Ndërkohë, edhe shteti fqinj Kolorado po përballet me situata të ngjashme.
Në Parkun Kombëtar Gunnison, të gjithë vizitorët dhe stafi u evakuuan të enjten për shkak të disa zjarreve të reja të shkaktuara nga rrufeja.
Njësia Ndëragjenciale e Menaxhimit të Zjarrit në Lumin e Sipërm të Kolorados njoftoi se aktualisht po punohet për të përballuar rreth 10 vatra të ndezura në zona të ndryshme.
Me flakët që po përhapen në disa shtete dhe temperaturat që po arrijnë nivele rekord, veriu dhe jugperëndimi i SHBA-së përballen me një verë të rrezikshme dhe të paparashikueshme.
Po ndodh...
83 mandatet nuk janë imunitet për shokët dhe shoqet e Ramës
Nga Gentian Gaba
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128