English
Luaj me Fjalëkryq
Lajme flash

Shpallen dy fitues për kullat te Shtëpia e Fëmijëve “Zyber Hallulli”

29 Janar 2026, 20:01 / EKONOMI&SOCIALE ALFA PRESS

Shpallen dy fitues për kullat te Shtëpia e Fëmijëve

Fituesi i konkursit për projektin e Shtëpisë së Fëmijëve “Zyber Hallulli” është Shoqëria “PROGEEN l.l.c”, e cila konkurron së bashku me një grup nënkontraktorësh të specializuar që përfshin Taller Hector Barroso, Studio B&L l.l.c, Doriana Bleta, Agim Seranaj dhe Ardian Paci. Projekti fitues synon të rikualifikojë këtë hapësirë duke i dhënë një rol të zgjeruar social dhe komunitar, përtej funksionit tradicional institucional.

Koncepti arkitektonik i propozuar nga PROGEEN l.l.c e trajton Shtëpinë e Fëmijëve si një kampus të hapur dhe të integruar, ku ndërtesat janë të organizuara në mënyrë të tillë që krijojnë oborre të brendshme, hapësira rekreative dhe ambiente edukative të ndriçuara natyrshëm. Projekti parashikon një ndërthurje të funksioneve të edukimit, kujdesit dhe aktiviteteve komunitare, duke krijuar një mjedis të mbrojtur, miqësor dhe të aksesueshëm për fëmijët, stafin dhe komunitetin përreth. Qasja arkitektonike synon që godina të mos jetë e izoluar, por të komunikojë me hapësirat publike përreth, duke e bërë zonën më të gjallë dhe funksionale.

Ndërkohë, për projektin e kullave funksionale, fituese është shpallur Shoqëria “MOTUS” shpk, e cila bashkëpunon me nënkontraktorët “Asab” shpk, Son Engineering & Construction, Rojkind Arquitectos S.C dhe Julian Kasharaj. Projekti i MOTUS shpk synon zhvillimin e një kompleksi multifunksional urban, që përfshin kulla me funksione të përziera dhe që lidhen drejtpërdrejt me kontekstin urban të zonës pranë Stadiumit “Air Albania” dhe Korpusit të Inspektorateve.

Sipas konceptit të paraqitur, kullat janë menduar si objekte moderne me funksione të ndryshme, që përfshijnë zyra, shërbime, hapësira tregtare dhe aktivitete të tjera urbane. Organizimi i tyre krijon një ansambël të integruar, ku lëvizja, aksesueshmëria dhe lidhja vizuale mes objekteve janë elementë kyç. Fasadat dhe forma arkitektonike synojnë të krijojnë një identitet të ri urban për zonën, duke kontribuar në transformimin e saj në një qendër të re funksionale dhe dinamike të qytetit.

Përveç projekteve fituese, në konkurs morën pjesë edhe disa studio dhe kompani të tjera ndërtimi e projektimi, të cilat paraqitën alternativa të ndryshme arkitektonike dhe urbane. DIAGONAL PROJEKTIM & ZBATIM në bashkëpunim me ASL shpk propozuan një zhvillim me kulla dhe hapësira të gjelbëruara, ku ndërtesat ndërthureshin me zona publike dhe parkime nëntokësore. BE-IS shpk së bashku me CEBRA Arkitekter A/S paraqitën një projekt me karakter më konceptual, i frymëzuar nga ideja e një “fshati” për fëmijë, ku ndërtesat dhe sheshet krijonin një ambient më intim dhe komunitar. Ndërkohë, GRUPPO KONI SRL, me pjesëmarrjen e studios Stefano Boeri Architetti, solli një projekt që vinte theksin te gjelbërimi, ndërthurja me natyrën dhe ndërtimi i objekteve me funksione të përziera, duke synuar krijimin e një peizazhi urban më të qëndrueshëm.

Konkursi tregoi interes të lartë nga studio vendase dhe ndërkombëtare, duke reflektuar rëndësinë e këtij zhvillimi për transformimin urban të zonës “Zyber Hallulli” dhe për krijimin e një ekuilibri mes funksionit social të Shtëpisë së Fëmijëve dhe zhvillimit të strukturave të reja multifunksionale.

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128