Lajme flash
Fama, misteri dhe vdekja/ Historitë tragjike të yjeve të Hollivudit
11 August 2026, 19:14 / SHOWBIZ
Hollivudi të sjell ndër mend famën, luksin dhe shkëlqimin, por pas dritave vezulluese të Tinseltown fshihet edhe një anë e errët. Disa prej yjeve më të mëdhenj të kinemasë patën funde tragjike, të rrethuara shpesh nga misteri, thashethemet dhe teoritë e konspiracionit.
Marilyn Monroe
Aktorja dhe simboli seksual Marilyn Monroe u bë modeli i biondeve joshëse që pushtuan Hollivudin në vitet 1950. Por me 4 gusht 1962, jeta e saj u ndërpre tragjikisht. E lindur si Norma Jeane Mortenson në vitin 1926, Monroe e kaloi fëmijërinë në familje kujdestare, përpara se të bëhej fillimisht modele dhe më pas aktore e famshme. Filmat e saj, në total, vlerësohet se kanë gjeneruar rreth 2 miliardë dollarë.
Fama e jashtëzakonshme ia përkeqësoi problemet me alkoolin dhe drogën. Ajo u gjet e vdekur në shtëpinë e saj në Los Anxheles nga psikiatri i saj, e shtrirë e zhveshur në shtrat, ndërsa në komodinën pranë saj kishte ilaçe me recetë. Vdekja u cilësua zyrtarisht si një vetëvrasje e mundshme, por shumë pyetje mbetën pa përgjigje. Në organizmin e saj nuk u gjetën kapsula dhe ajo nuk kishte lënë asnjë letër. Teoritë e konspiracionit shkojnë nga pretendimet se ajo u vra me urdhër të Robert Kennedy-t, deri te dyshimet se u vra nga një punonjës i shtëpisë. E vërteta mbetet e fshehur në hijet e Hollivudit.
Jayne Mansfield
Ashtu si Monroe, Jayne Mansfield kishte flokë bionde, një pamje shumë tërheqëse dhe një jetë që u ndërpre shumë herët. Talenti i saj i siguroi role të rëndësishme në filma dhe ajo u bë aktorja e parë amerikane e famshme që realizoi një skenë nudo para kamerës. Në orët e para të mëngjesit të 29 qershorit 1967, Mansfield po udhëtonte drejt New Orleansit me të dashurin, shoferin dhe tre fëmijët e saj, kur makina u përplas me një kamion të madh. Përplasja i vrau menjëherë atë dhe dy personat që ndodheshin në sediljet e përparme. Çuditërisht, fëmijët që flinin në pjesën e pasme të makinës mbijetuan.
Raportet e policisë përshkruanin një kafkë të shtypur dhe një shkëputje të pjesshme të kafkës nga pjesa tjetër e kokës. U përhapën zëra se Mansfield ishte kokëposhtë, të nxitur edhe nga fotografitë ku parukja e saj shihej jashtë rrënojave të makinës. Më pas qarkulluan teori të çuditshme konspirative, përfshirë pretendimin se aksidenti ishte shkaktuar nga një mallkim që Anton La Vey, themeluesi i Kishës së Satanait, i kishte bërë të dashurit të saj. Asnjë prej këtyre pretendimeve nuk u vërtetua.
Bruce Lee
Vdekja tragjike e Bruce Lee në moshën 32-vjeçare tronditi gjithë botën. Ikona e arteve marciale ishte trajnuar nga mjeshtri i madh i arteve marciale në Hong Kong, Yip Man, dhe u bë i famshëm ndërkombëtarisht me filmin Enter the Dragon në vitin 1973. Më 20 korrik 1973, ndërsa ndodhej në Hong Kong për një takim lidhur me një film, Lee mori një qetësues të zakonshëm për dhimbjen e kokës dhe u shtri në apartamentin e aktores Betty Ting Pei. Ai nuk u zgjua më. Mjekët e lidhën vdekjen e tij me një ënjtje të rëndë të trurit, në përputhje me një diagnozë të mëparshme për edemë cerebrale.
Teoritë e konspiracionit fajësuan gjithçka, nga mafiet kineze dhe amerikane deri te një i ashtuquajtur mallkim i familjes Lee. Kjo teori mori më shumë vëmendje pasi edhe djali i tij, Brandon Lee, vdiq i ri në një aksident në sheshxhirim.
Judy Garland
Vdekja e Judy Garlandit është një shembull i qartë se si shkëlqimi i Hollivudit mund të fshehë trauma të thella. Ylli i dashur i The Wizardof Oz mori pilulën e saj të parë në moshën 10-vjeçare, me insistimin e nënës. Më vonë, drejtuesit e studios MGM i jepnin amfetamina për ta mbajtur të aftë të përballonte ritmin e xhirimeve dhe shfaqjeve, ndërsa njëkohësisht e shtynin të mbante dietë dhe të pinte duhan për t’i frenuar oreksin.
“Gjithmonë më paraqesin si një figurë më tragjike nga sa jam”, kishte thënë dikur Garland. Por krizat e përsëritura nervore, falimentimi financiar dhe marrëdhëniet toksike tregonin një histori tjetër. Me 22 qershor 1969, bashkëshorti i saj i pestë e gjeti të vdekur në banjën e shtëpisë së tyre në Londër. Autopsia përcaktoi se vdekja ishte shkaktuar aksidentalisht nga një mbidozë barbituratesh. Vajza e saj, Liza Minnelli, e përshkroi në një mënyrë më prekëse: “Ajo nuk vdiq nga mbidoza. Mendoj se thjesht u lodh.”
Natalie Wood
Natalie Wood, e nominuar për çmimin Oskar, u bë e famshme përkrah James Dean në Rebel Without a Cause, duke marrë nominimin e saj të parë për Oscar në moshën 18-vjeçare. Por suksesi i saj u errësua nga një fund tragjik. Gjatë fundjavës së Ditës së Falënderimeve në vitin 1981, Wood dhe bashkëshorti i saj, Robert Wagner, udhëtuan drejt ishullit Santa Catalina së bashku me kolegun e saj Christopher Walken dhe kapitenin e varkës, Dennis Davern.
Ajo që ndodhi atë natë mbetet e paqartë. Wagner, i cili thuhej se ishte xheloz ndaj Walken-it, dyshohet se theu një shishe vere dhe u përball me të përpara se të dy burrat të tërhiqeshin veçmas. Më vonë, Wagner i tha Davernit se gruaja e tij ishte zhdukur. Trupi i Wood-it u gjet të nesërmen në mëngjes, duke pluskuar në ujë, e veshur me këmishë nate dhe xhaketë, pavarësisht frikës së saj të njohur dhe të përjetshme nga uji. Një dëshmitar kishte dëgjuar një grua që bërtiste për ndihmë disa orë më parë. Rrëfimi i mëvonshëm i Davernit e cilësoi Wagner-in si person të dyshuar, por çështja mbetet ende e pazgjidhur.
James Dean
James Dean pushtoi Hollivudin me karizmën e tij dhe interpretimet e fuqishme,para se të vdiste në mënyrë tronditëse në moshën 24-vjeçare. Me 30 shtator 1955, ndërsa po drejtonte Porsche Spyder-in e tij, të cilin e kishte pagëzuar “Little Bastard”, ai u përplas ballazi me një Ford në një kryqëzim. Dean u shpall i vdekur sapo mbërriti në spital. Filmi i tij Rebel Without a Cause u shfaq disa muaj më vonë dhe u prit me entuziazëm të madh, duke e kthyer në një yll të përjetshëm, famën e së cilës ai nuk arriti ta shijonte kurrë.
Për vite me radhë vazhduan të qarkullonin thashetheme për një mallkim që lidhej me makinën e shkatërruar. Thuhej se disa pjesë të saj u shitën pas aksidentit dhe se blerësit pësuan fate tragjike. Një mjek thuhej se kishte vdekur në një aksident me motorin e makinës, ndërsa një shofer tjetër kishte pësuar një aksident pasi i ishin çarë gomat. Asnjë nga këto vdekje nuk u vërtetua.
Sharon Tate
Ndër tragjeditë e shumta të Hollivudit, vrasja e Sharon Tate mbetet një nga më të tmerrshmet. Aktorja e re, e cila ishte gruaja e regjisorit Roman Polanski, ishte tetë muajshe shtatzënë kur, me 8 gusht 1969, anëtarë të sektit të Charles Mansonit hynë me forcë në shtëpinë e saj në Los Anxheles. Tate dhe tre miq të saj u vranë në mënyrë brutale. Ajo u godit me thikë 16 herë. Vrasësit shkruan fjalën “Pigs” në derë me gjakun e saj.
Fillimisht, policia dyshoi se bëhej fjalë për një pazar droge që kishte shkuar keq, por hetimet zbuluan përfshirjen e familjes Manson. Një teori thotë se anëtarët e sektit synonin të vrisnin një person krejt tjetër. Vrasja e Tate, e kryer në kulmin e epokës së paqes dhe dashurisë së viteve 1960, u bë një nga tragjeditë më famëkeqe të Hollivudit. Dhe ndryshe nga shumë të famshëm të vdekur, për të cilët janë përhapur thashetheme se janë vrarë, në rastin e Tate nuk kishte asnjë dyshim: ajo ishte viktimë e një vrasjeje.
Nga shkëlqimi te tragjedia, shumë prej yjeve më të ndritur të Hollivudit u shuan shumë shpejt. Historitë e tyre mbeten një kujtesë e zymtë se fama nuk është garanci as për sigurinë, as për mbijetesën.
Po ndodh...
Pushtetit të Ramës nuk i mjafton më Berisha!
Nga Indrit Gjyzeli
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128