Dokumentet e dosjes “Epstein”, Jes Staley figuron si kujdestar i pasurisë së financierit deri në 2015! Email-i mes tyre: Përshëndete Borëbardhën, ishte…

Dokumente të reja të publikuara nga Departamenti Amerikan i Drejtësisë, tregojnë se Jes Staley ishte i emëruar si një nga kujdestarët e pasurisë së Jeffrey Epstein-it të paktën deri në vitin 2015, duke vënë në pikëpyetje dëshminë e tij në gjykatë se ai e kishte refuzuar këtë rol.

Sipas dokumenteve të noterizuara, të nënshkruara dhe të datuara nga vetë Staley, përfshirë një dokument të majit 2015, ai figuron si një nga tre kujdestarët e “Jeffrey E Epstein 2014 Trust”, së bashku me avokatin afatgjatë të Epstein-it, Darren Indyke, dhe një bashkëpunëtor të quajtur David Mitchell, investitor në pasuri të paluajtshme.

Në dokument thuhet se kujdestarët kishin të drejtë për një pagesë vjetore prej 250 mijë dollarësh, si edhe rimbursim të shpenzimeve të arsyeshme, megjithëse nuk është e qartë nëse Staley është kompensuar për këtë rol.

Dokumenti është pjesë e një numri të madh materialesh të publikuara në fund të janarit nga Departamenti Amerikan i Drejtësisë, në kuadër të hetimeve ndaj financierit të diskredituar.

Vitin e kaluar, Staley i tha një gjykate në Mbretërinë e Bashkuar se ai kishte refuzuar kërkesën e Epstein-it për t’u emëruar kujdestar i pasurisë së tij, ndërsa përpiqej të rrëzonte ndalimin e përjetshëm të vendosur nga Autoriteti i Sjelljes Financiare (FCA) për shkak të lidhjeve të tij me trafikantin e dënuar seksual, shkruan “Financial Times”.

Gjatë një seance në mars, ai u pyet nëse Epstein kishte dashur ta emëronte si kujdestar të pasurisë së tij. “Dhe unë e refuzova”, u përgjigj Staley. Avokatja e FCA-së, Leigh-Ann Mulcahy KC, e pyeti më tej nëse ai kishte njoftuar Barclays për këtë kërkesë, ndërsa Staley deklaroi se kjo kishte ndodhur shumë herët, kur ai punonte në fondin BlueMountain Capital, dhe se ai e kishte refuzuar rolin.

Kur u pyet më tej, Staley shtoi se fakti që ai kishte refuzuar të bëhej kujdestar “mund të tregojë se nuk isha një mik i ngushtë personal”.

Staley punoi në BlueMountain Capital nga viti 2013 deri në 2015. Barclays njoftoi emërimin e tij si drejtor ekzekutiv në tetor 2015. Sipas dokumenteve të publikuara nga Departamenti i Drejtësisë, trusti ishte ndryshuar dhe nënshkruar nga Staley një muaj më herët.

Në qershor, Tribunali i Lartë vendosi se Staley nuk arriti të provonte pretendimet e tij kundër FCA-së, duke lënë në fuqi vendimin se ai kishte mashtruar me pakujdesi autoritetin rregullator dhe duke konstatuar një “dështim serioz gjykimi”.

Staley ka pohuar prej kohësh se ai dhe Epstein kishin një “marrëdhënie të ngushtë profesionale”, por jo miqësi personale. Në vitin 2025, ai deklaroi se nuk kishte qenë në dijeni të “aktiviteteve monstruoze” të Epstein-it gjatë periudhës së marrëdhënies së tyre.

Trusti i vitit 2014 u anulua më vonë dhe versioni i vitit 2019 nuk e përfshin Staley si kujdestar.

Sipas raportimeve të mëparshme, Staley ishte emëruar gjithashtu si ekzekutor në disa versione të testamentit të Epstein-it, së bashku me ish-sekretarin amerikan të Thesarit, Lawrence Summers, por në testamentin përfundimtar ai nuk figuronte.

Epstein u arrestua në vitin 2008 dhe vuajti 13 muaj burg në Florida pasi pranoi fajësinë për kërkim marrëdhëniesh seksuale me një të mitur. Ai vdiq në një burg në Nju Jork në vitin 2019, ndërsa priste gjyqin për akuza të ndara për trafikim seksual, çka shkaktoi pasoja të mëdha për shumë figura të larta të biznesit dhe politikës që kishin pasur kontakte me të.

Staley, ish-drejtues i lartë në JPMorgan Chase, ka deklaruar se ishte njohur me Epstein-in në fillim të viteve 2000 si klient i bankës. Ai mbajti kontakte me të të paktën deri në fund të vitit 2015, kur mori drejtimin e Barclays, duke thënë se i kishte ndërprerë marrëdhëniet para se të bëhej drejtor ekzekutiv.

Të dy shkëmbyen më shumë se një mijë email-e, ku Staley kërkonte këshilla për çështje që varionin nga paga e tij në JPMorgan deri te arsimimi i vajzës së tij, dhe në disa raste iu referua Epstein-it si “familje”.

Mes tyre kishte edhe referenca më të paqarta, përfshirë email-in tashmë famëkeq ku Staley shkruante: “Ishte argëtuese. Përshëndete Borëbardhën.” Ai i tha gjykatës se nuk e kujtonte se çfarë i referohej email-i për “Borëbardhën”.

Po ndodh...

15:55 Fjalëkryq

Skemë kampionësh 12 shkurt

15:09 BOTA

Tragjedi në Sudanin Verior! Mbytet anija në Nil, 21 viktima

15:07 SHOWBIZ

Leonora Jakupi në pritje të ëmbël?

14:30 POLITIKË

Gjyqi në Hagë, Kuvendi i Shqipërisë miraton deklaratën për pafajësinë e ish-liderëve të UÇK

14:19 AKTUALITET

Kreu i SPAK, Klodjan Braho takohet me Presidentin e Eurojust

14:11 BOTA

Megaoperacioni në Bruksel/ Hetimet për shitjen e 23 ndërtesave për 900 milionë euro, policia belge bastis zyrat e Komisionin Evropian

14:09 AKTUALITET

Akuzohet për gjobëvënie, arrestohet gazetari Elio Laze

13:54 AKTUALITET

E rëndë në Kuçovë/ E larguan nga puna, gruaja hipën në një nga kullat e puseve të naftës dhe kërcënon se do hidhet

13:43 SHOWBIZ

Adeyemi sërish në qendër të kritikave, paraqitja në klipin e Loredanës irriton Dortmundin

13:39 POLITIKË

“Çdo natë nga kryeministria dalin kamionë për të zhdukur gjurmët e Ballukut”/ Berisha: Ja pse nuk po publikohet në Fletoren Zyrtare vendimi për pezullimin nga detyra

13:30 AKTUALITET

“Kam borxhe”/ Dështoi të grabiste bankën te Deliorgji, zbardhet dëshmia e 58-vjeçarit, sipërmarrës në ndërtim

13:19 BOTA

Rikthehet Angela Merkel, Bild: Mund të kandidojë për Presidente Federale në 2027

13:01 POLITIKË

"Në 21 Janar, përgjegjës Berisha"/ Agron Malaj thyen heshtjen: 'Grupi i Zjarrit' s'ka ekzistuar kurrë, e shpiku Berisha

12:54 POLITIKË

Shtyhet seanca paraprake për Monika Kryemadhin, avokatët e çështjes bojkotojnë pas dhunës ndaj Kujtim Cakranit në Vlorë

Dua të lexoj më shumë lajme