“Donbasi kundër NATO-s”, SHBA hedh në tryezë skenarin e bujshëm për paqen në Ukrainë: Territoret Rusisë në këmbim të anëtarësimit në Aleancë
Një propozim i diskutuar në qarqet diplomatike muajt e fundit duket se është rikthyer në negociatat për përfundimin e luftës në Ukrainë: Kievi të heqë dorë nga territoret që kontrollon ende në Donbas, në këmbim të anëtarësimit në NATO.
Sipas raportimit të Wall Street Journal, duke iu referuar burimeve të njohura me diskutimet, ideja është rikthyer në tryezë nga Jared Kushner, dhëndri dhe i dërguari i posaçëm i presidentit amerikan Donald Trump. Propozimi është diskutuar në takime mes përfaqësuesve amerikanë, ukrainas dhe evropianë, përfshirë bisedimet e zhvilluara në një aeroport ushtarak në Dublin dhe në Emiratet e Bashkuara Arabe. Sipas burimeve, Uashingtoni ka paraqitur dy skenarë të mundshëm për t’i dhënë fund konfliktit.
Skenari i parë parashikon tërheqjen e Ukrainës nga territoret që kontrollon ende në Donbas, në këmbim të anëtarësimit të plotë në NATO. Ndërsa alternativa e dytë është ngrirja e konfliktit përgjatë vijës aktuale të frontit, duke ruajtur kontrollin ukrainas mbi një pjesë të Donbasit dhe duke i ofruar Kievit garanci të forta sigurie nga SHBA-ja dhe aleatët evropianë. Nuk është e qartë se sa seriozisht po shqyrtohet propozimi nga administrata amerikane dhe nëse Donald Trump ka ndryshuar qëndrim për anëtarësimin e Ukrainës në Aleancën Atlantike.
Ndërkohë, Moska ka reaguar kundër çdo formule që do t’i mundësonte Ukrainës një anëtarësim të drejtpërdrejtë apo të tërthortë në NATO. Zëvendësministri i Jashtëm rus, Sergei Ryabkov, deklaroi se çdo formë e ashtuquajtur e anëtarësimit të pjesshëm të Ukrainës në Aleancë është e papranueshme për Rusinë.
Nga ana tjetër, i dërguari amerikan Jared Kushner deklaroi se Moska po bëhet më e hapur ndaj garancive të sigurisë për Ukrainën, të ngjashme me ato që ofron NATO. Sipas tij, këto garanci do të shoqëroheshin me pasoja të rënda në rast të një sulmi të ri rus.
Çështja është diskutuar edhe në Berlin, ku presidenti francez Emmanuel Macron u shpreh se ka ardhur koha që të diskutohet seriozisht anëtarësimi i Ukrainës në NATO. Megjithatë, Gjermania ka shfaqur rezerva, ndërsa kancelari Friedrich Merz, sipas burimeve të cituara nga raportimi, nuk beson se Ukraina do të anëtarësohet në Aleancë gjatë mandatit të tij politik.
Vetë presidenti ukrainas Volodymyr Zelensky ka konfirmuar se pala amerikane ka ngritur mundësinë e anëtarësimit të Ukrainës në NATO në këmbim të tërheqjes nga Donbasi. Ai theksoi se çdo marrëveshje përfundimtare duhet të miratohet nga populli ukrainas, ndërsa Kievi vijon negociatat me Uashingtonin dhe vendet evropiane për garancitë e sigurisë. Propozimi mbetet pjesë e diskutimeve diplomatike dhe nuk përbën një marrëveshje të arritur mes palëve.
Po ndodh...
Çfarë janë socialistët pa Ramën, "mut"?!
ide
Eunukët e pushtetit kanë gjithçka, përveç guximit për dinjitet
Protesta është më e madhe se partitë
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128


