Dialogu në udhëkryq! Pas diskutimeve pa konsensus, Kurti-Vuçiç-Lajçak ia pasojnë fajin njëri-tjetrit

18 Shtator 2023, 23:07 / KOSOVA ALFA PRESS

Dialogu në udhëkryq! Pas diskutimeve pa konsensus,

Pas takimit të rëndësishëm trepalësh në Bruksel mes kryeministrit të Kosovës Albin Kurtit, presidentit serb Aleksandër Vuçiç dhe përfaqësuesve të BE-së, pjesëmarrësit fajësuan njëra-tjetrën për mosarritjen e një konsensusi për dialogun mes vendeve në konflikt.

Reagimi i fundit u bë nga Albin Kurti, i cili akuzoi të dërguarin e posaçëm të Bashkimit Evropian për bisedimet Kosovë – Serbi, Miroslav Lajçak ka mbajtur anën serbe gjatë diskutimit që kanë zhvilluar.

Ai gjithashtu u ka dërguar letra kryeqendrave kryesore të vendeve perëndimore për të sqaruar takimin e fundit, ku shpjegon me përpikmëri deformimin e plotë të procesit nga ana e Lajçak.

Më parë Miroslav Lajçak ka paralajmëruar për bisedime strategjike BE -SHBA për të përcaktuar hapat e ardhshëm të procesit të dialogut, që po zvarritet prej kohësh.

Pas këtij vendimi ai rikujtoi situatën në veri të Kosovës, e cila vijon të mbetet e tensionuar, pavarësisht opsioneve të ofruara nga ai së bashku me kolegun Joseph Borell, sërish nuk pati dakordësim.

Presidenti serb Aleksandar Vuçiç nuk ka qëndruar i heshtur pas dialogut të pasuksesshëm, fillimisht ai ia hodhi fajin Kurtit se nuk ka dashur të arrijë marrëveshje për formimin e Asociacionit të komunave me shumicë serbe, por pavarësisht kësaj, Vuçiç u shpreh se sërish pret “një presion të ri” nga Perëndimi ndaj shtetit të tij lidhur me bisedimet me Kosovën.