English
Luaj me Fjalëkryq
Lajme flash

Prishtina dhe Beogradi përplasen rreth pranisë së flamurit të Kosovës në Kongresin e UEFA-s në Serbi

3 Prill 2025, 16:14 / KOSOVA ALFA PRESS

Prishtina dhe Beogradi përplasen rreth pranisë së flamurit
Federata e Futbollit e Kosovës (FFK) dhe Federata e Futbollit e Serbisë (FFS) janë përplasur rreth pranisë së flamurit të Kosovës në Kongresin e 49-të të Federatës Evropiane të Futbollit (UEFA) në Beograd më 3 prill.

Derisa Federata Serbe tha se e kishte hequr flamurin e Kosovës nga vendtakimi i Kongresit në kryeqytetin serb, Federata Kosovare nguli këmbë se flamuri ishte i pranishëm deri në përfundim të mbledhjes.

Një video e presidentit të Federatës së Futbollit të Kosovës, Agim Ademi, duke u fotografuar pranë flamurit të Kosovës në ngjarjen e UEFA-s në Beograd mori vëmendje të madhe në rrjetet sociale dhe media të mërkurën vonë.

Në ditën e Kongresit të UEFA-s, të enjten, Federata Serbe tha se e hoqi flamurin, duke e fajësuar UEFA-n për vendosjen e tij.

UEFA nuk i është përgjigjur Radios Evropa e Lirë në pyetjet e saj rreth kësaj ngjarje deri në publikimin e këtij teksti.

Kosova është anëtare me të drejta të plota e UEFA-s që nga viti 2016, por Serbia vazhdon ta kundërshtojë praninë e saj në shtëpinë e futbollit evropian, ashtu siç e kundërshton pavarësinë e Kosovës, e shpallur më 2008.

Në një komunikatë për media të enjten herët, Federata Serbe tha se “organizimi i jashtëzakonshëm” i Kongresit u la në hije nga “një mbikëqyrje nga organizatorët që një pjesëmarrës i Kongresit u përpoq ta shfrytëzonte për interesa jofutbollistike”.

“Ne reaguam së bashku, shpejt dhe me vendosmëri dhe me përgjegjësi të plotë informojmë opinionin se në Kongresin e UEFA-s sot në Beograd nuk ka flamuj të të ashtuquajturës Kosovë”, thuhet në njoftimin e Federatës Serbe.

Nuk është e qartë se në çfarë ore është hequr flamuri i Kosovës nga vendtakimi i Kongresit, ndërsa tubimi vjetor i UEFA-s përfundoi pak pas mesditës të enjten.

Megjithatë, Federata Kosovare i kundërshtoi pretendimet e homologes së vet serbe, duke thënë se Kosova mori pjesë në Kongresin e UEFA-s në Beograd me simbolet shtetërore.

Në një reagim në ueb-faqen e saj, FFK-ja tha se në lidhje me pretendimeve për largimin e flamurit shtetëror të Kosovës gjatë punimeve të Kongresit, “theksojmë se Kosova ishte e përfaqësuar zyrtarisht me simbolet e saj shtetërore, njësoj si çdo anëtare tjetër e UEFA-s”.

“Çdo veprim i mundshëm në përfundim të mbledhjes, kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e këtij organizimi, ashtu siç është në familjen e futbollit evropian dhe botëror”, tha ajo.

FFK-ja paralajmëroi se do të paraqesë “menjëherë” notë proteste në UEFA dhe institucionet tjera ndërkombëtare “lidhur me këto veprime, që janë kundër vlerave që promovon UEFA”.

Kongresi i 49-të i rregullt i UEFA-s u mbajt në Qendrën e Kongreseve Sava në Beograd. Ky tubim vjetor mblodhi presidentët dhe sekretarët e përgjithshëm nga 55 federatat kombëtare anëtare të UEFA-s për të diskutuar çështjet kryesore që formësojnë futbollin evropian.

Në fjalimin e tij hapës, presidenti i UEFA-s, Aleksander Ceferin, theksoi rëndësinë e unitetit dhe solidaritetit në futbollin evropian.

“Ne jemi një ekip i bashkuar. Një forcë e unifikuar. Dhe një union i fuqishëm. Ne jemi unioni i futbollit evropian”, tha ai./REL

 

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128