Lajme flash
Rumania merr drejtimin e SEECP, RCC: Koha për më pak deklarata dhe më shumë rezultate në Ballkan
28 July 2026, 15:31 / BOTA
Bukuresht – Kryesia rumune e Procesit të Bashkëpunimit të Evropës Juglindore (SEECP) mund të shënojë një fazë të re të bashkëpunimit praktik në rajon. Ky ishte mesazhi i Sekretarit të Përgjithshëm të Këshillit të Bashkëpunimit Rajonal (RCC), Amer Kapetanović, gjatë vizitës së tij zyrtare në Bukuresht.
Në takimin me ministren e Punëve të Jashtme të Rumanisë, Oana Țoiu, u diskutuan prioritetet e Kryesisë rumune të SEECP-së dhe mënyrat për të përshpejtuar nismat rajonale në fusha si zhvillimi ekonomik, ndërlidhja, siguria, qëndrueshmëria dhe integrimi evropian.
“Bukureshti merr Kryesinë e SEECP-së në një moment kur rajoni ka nevojë për bashkëpunim që prodhon rezultate konkrete. Nuk na duhen më deklarata të shkëputura nga zbatimi, por ekonomi më të forta, lidhje më të mira dhe mundësi që qytetarët t’i ndiejnë në jetën e përditshme”, u shpreh Kapetanović.
Ai vlerësoi përvojën dhe kapacitetet institucionale të Rumanisë, duke theksuar se RCC-ja është e gatshme të mbështesë Kryesinë rumune në shndërrimin e prioriteteve politike në projekte konkrete dhe rezultate të matshme.
Nga ana e saj, ministrja Țoiu konfirmoi angazhimin e Rumanisë për një Kryesi aktive dhe të orientuar drejt rezultateve, me fokus te forcimi i bashkëpunimit ndërmjet vendeve të rajonit dhe promovimi i projekteve me ndikim të drejtpërdrejtë për qytetarët.
Gjatë vizitës në Bukuresht, Kapetanović zhvilloi gjithashtu takime me Sekretaren e Shtetit për Çështjet Evropiane, Clara Staicu, si dhe mori pjesë në një tryezë të rrumbullakët me përfaqësues të ministrive, Parlamentit dhe institucioneve kryesore rumune.
Diskutimet u përqendruan te zbatimi i Strategjisë SEE 2030, Tregut të Përbashkët Rajonal dhe Agjendës së Gjelbër për Ballkanin Perëndimor, si dhe te bashkëpunimi në ekonomi, digjitalizim, turizëm, siguri, menaxhim kufijsh, mbrojtje civile, kërcënime hibride, reforma në sektorin e sigurisë, politika për të rinjtë dhe sfidat demografike.
Pjesëmarrësit shqyrtuan edhe projektet që mund të avancohen gjatë Kryesisë rumune të SEECP-së, me synimin për të forcuar bashkëpunimin institucional dhe për të sjellë rezultate konkrete për vendet e Evropës Juglindore.
Rumania mori Kryesinë e SEECP-së pas Samitit të mbajtur në qershor 2026 në Sofje, ku udhëheqësit e rajonit miratuan Raportin Vjetor të RCC-së dhe përditësimin afatmesëm të Strategjisë SEE 2030, duke riafirmuar angazhimin për stabilitet, siguri dhe zhvillim të qëndrueshëm në Evropë
Po ndodh...
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128