Kuksiani i falsifikon firmën shokut, prokuroria kërkon burg, gjykata jep pafajësi

Në emisionin investigativ “Piranjat”, 25-vjeçari Ardit Lala ka denoncuar një padrejtësi që i është bërë babait të tij të ndjerë, Hidër Lala, i cili ndërroi jetë në vitin 2020 si pasojë e Covid-19.

Ai deklaron se babai i tij kishte miqësi me një zotëri nga Kukësi, Muhamet Sula, i cili në vitin 2018 shfaqet poshtë banesës së familjes Lala dhe paraqet dy kontrata: një kontratë huaje dhe një deklaratë. Si në banesë, ashtu edhe në Polici, ku bëri kallëzim, z.Lala pretendoi se kjo ishte një formë gjobëvënie ndaj tij, nga miku Muhamet Sula dhe noteri në bashkëpunim, Ardian Elezi. Të dy u akuzuan për “falsifikim dokumentesh” dhe “shpërdorim detyre”.

Pasi nisin hetimet nga Prokuroria, bëhen disa veprime proceduriale hetimore, ndër të cilat edhe një akt-ekspertim i vitit 2019. Eksperti Vjolxhin Kuka bëri krahasime me modele të mëparshme shkrimi, si dhe shkrime të lira të z. Hidër Lala. Pasi kreu ekzaminime me të gjitha pajisjet e nevojshme që disponon Instituti i Policisë Shkencore, ai doli në përfundimin se dokumenti “Deklaratë” i vitit 2014, emri dhe mbiemri “Hidër Lala”, nuk duhet të jetë shkruar nga personi në fjalë, ndërsa sa i takon firmës, “nuk përjashtohet mundësia të jetë nënshkruar nga ai”.

Sipas Prokurorisë, ky ishte një vendim jo shterues, ndaj u kërkua një akt-ekspertim i dytë, përsëri nga Instituti i Policisë Shkencore, më 8 maj 2020. Dokumenti mban firmën e ekspertëve Durim Çako dhe Shefqet Xhemollari. Modelet e krahasimit ishin të njëjtat: emri, mbiemri dhe firma e z. Lala nga dokumentet e sipërpërmendura, si dhe shkrime të lira të tij. Edhe pajisjet e përdorura ishin të njëjtat. Dy ekspertët konkluduan se emri, mbiemri dhe firma nuk janë shkruar dhe nënshkruar nga z. Lala.

Kaq i mjaftoi Prokurorisë për të marrë në pyetje z. Muhamet Sula dhe noterin Ardian Elezi si persona nën hetim. Të dy deklaruan se nuk kanë falsifikuar asnjë shkrim apo akt noterial dhe se gjithçka është zhvilluar në prezencë të palëve. Megjithatë Prokuroria nuk mendoi kështu. Duke marrë parasysh dy aktet e kryera, prokurorja Rita Gjati dërgoi për gjykim çështjen në Gjykatën e Kukësit, ku ndaj z. Sula rëndonte vepra penale “falsifikim dokumentesh”, ndërsa noterit Elezi iu shtua edhe vepra “shpërdorim detyre”.

Por organi i akuzës kërkoi edhe një akt të tretë ekspertimi. Në dokumentin me datë 6 nëntor 2020, ekspertëve të mëparshëm, Vjolxhin Kuka dhe Shefqet Xhemollari, u shtohet edhe eksperti Gani Jahelezi. Pas ekzaminimeve me të njëjtat aparate dhe metoda, ata konkluduan se emri, mbiemri dhe firma e z. Hidër Lala nuk janë shkruar dhe nënshkruar nga ai.

Çështja kalon për gjykim në themel. Dy nga ekspertët, duke qenë se kishin marrë pjesë në aktet e mëparshme gjatë fazës së hetimit, bënë që të pandehurit t’i kërkonin gjykatës kryerjen e një riekspertimi grafik me 3 ekspertë të tjerë, sërish nga Instituti i Policisë Shkencore. U zgjodhën Elvis Mako, Suela Pashaj dhe Kristaq Gjika.

Me aktin e datës 25 tetor 2024, këta tre ekspertë rrëzuan punën e kolegëve të tyre të Institutit të Policisë Shkencore dhe hapën rrugën drejt pafajësisë së z. Sula dhe noterit Elezi. Ata konkluduan se emri, mbiemri dhe firma e z. Hidër Lala në dokumentin “Deklaratë” janë shkruar dhe nënshkruar nga vetë ai.

Në bazë të këtij akti të fundit, Gjykata vendosi t’u japë pafajësinë shtetasve Muhamet Sula dhe Ardian Elezi.

Pas kësaj vendimmarrjeje, djali i të ndjerit, Ardit Lala, kallëzoi për “ekspertim të rremë” tre ekspertët Elvis Mako, Suela Pashaj dhe Kristaq Gjika në Prokurorinë e Kukësit. Por Prokuroria çmoi se çështja nuk duhej të kalonte në hetim. Një muaj më pas, më 16 qershor, Ardit Lala depozitoi ankim në Gjykatën e Kukësit kundër vendimit për “mosfillim të hetimeve”.
Paralelisht me procedurat ligjore, “Piranjat” vijuan punën për të zbardhur çështjen duke u përballur me ekspertët.

E para që foli për gazetarin Freard Rista ishte znj. Suela Pashaj, e cila deklaroi se çdokush mban përgjegjësi për veprimet e veta dhe se puna e tyre nuk bëhet vetëm me aparate të specializuara. Gjatë debatit, bashkëshorti i saj u tregua agresiv, duke tentuar t’i merrte mikrofonin gazetarit, ndërsa ajo vetë e kërcënoi gazetarin duke përmendur Drejtorin e Përgjithshëm të Policisë së Shtetit.

Disa ditë më pas, tre ekspertët që kishin dhënë vendimin unanim, u panë ulur së bashku në një kafene. Në ballafaqimin me gazetarin, z. Elvis Mako u largua menjëherë, ndërsa z. Kristaq Gjika pretendoi se nuk ishte në dijeni të rastit dhe kërkoi informacion vetëm në rrugë zyrtare, një mënyrë e njohur tashmë për shmangien e debatit dhe të së vërtetës./Piranjat

Po ndodh...

21:06 BOTA

Franca heton raportimet për dronë mbi një bazë të nëndetëseve bërthamore

20:58 AKTUALITET

Familjarët e Erion Bobës akuzuan për neglizhencë, reagon Spitali i Durrësit

20:48 BOTA

Delegacioni ukrainas në Miami, Witkoff raporton për bisedimet me Putinin

20:34 KOSOVA

Vjosa Osmani pret ambasadorin francez, i kërkon heqjen e masave të BE-së ndaj Kosovës

20:32 BOTA

Kreu i forcave të armatosura ukrainase : T’i lëshosh territor Rusisë është e papranueshme!

20:26 BOTA

Bolsonaro mbështet djalin e tij të madh për kandidaturën presidenciale në zgjedhjet e vitit 2026

20:22 JETË

Liqeni në Fushë Studën në Librazhd, i veshur me petkun e dëborës

20:19 SPORT

Shorti i Botërorit/ Përcaktohen grupet, Shqipëria dhe Kosova njohin rivalët në rast kualifikimi

20:07 MISTERE&KURIOZITETE

A e dinit se sot është Dita Botërore e Kafesë Turke?

20:04 BOTA

Sarkozy në burg për 20 ditë, zbulohet se ambasadori amerikan në Francë kërkoi leje ta vizitonte në qeli

19:57 SHOWBIZ

Kinemaja botërore në zi, ndërron jetë ylli i arteve marciale

19:53 BOTA

Shesim më shtrenjtë në tregun vendas sesa jashtë/ Çmimet e prodhimit ngadalësohet

19:49 BOTA

Votohen ndryshimet në shërbimin ushtarak në Gjermani, studentët organizojnë protesta

19:42 KOSOVA

AAK konfirmon Haradinajn si kandidat për kryeministër

Dua të lexoj më shumë lajme