Avokati i Popullit zbret në terren: Gjetëm 118 persona te Blloku i Sigurisë, të arrestuarit janë rrahur

Institucioni i Avokatit të Popullit njofton se ka dalë në terren dje, ashtu si çdo herë në përfundim të protestës studentore, duke bërë publike gjetje shqetësuese për sjelljen policore dhe trajtimin e personave të ndaluar.

Gjatë 24 orëve të fundit, janë administruar 6 ankesa për pretendime dhune gjatë ditës së 20 tetorit, të gjitha në Bllokun e Sigurisë, ndërsa pamjet filmike të publikuara nga protesta ngrenë shqetësime për tërheqje zvarrë dhe goditje me shkopinj gome.

Në Spitalin e Traumës, një person i arrestuar qëndronte ende i shtruar, i prangosur në krevat, ndërsa një punonjës policie ishte në dhomë. Ai pretendoi se u dhunua gjatë arrestimit dhe kishte dëmtim të madh në sy.

Gjatë inspektimit në Bllokun e Sigurisë u konstatua se në dhoma të destinuara për një person qëndronin 3 deri 4 persona. Sipas raportimit, të paktën dy persona flinin në dysheme. Kapaciteti zyrtar i Bllokut të Sigurisë është 67 persona, ndërsa Avokati i Popullit ka gjetur aty 118 të arrestuar.

Gjatë monitorimit është marrë kontakt me 6 të mitur, por në Bllokun e Sigurisë, ku mbahen, nuk është identifikuar një dhomë e veçantë për fëmijët. Ankesat e administruara lidheshin me kufizimet për kontaktin me familjen dhe avokatin, si dhe mungesën e psikologut gjatë marrjes në pyetje.

"Ne dënojmë çdo akt dhune, nga kushdo që vjen. Policia ka detyrimin të garantojë sigurinë publike dhe, në çdo ndërhyrje, të përdorë forcën vetëm kur është e domosdoshme dhe në mënyrë proporcionale", thotë Avokati i Popullit.

KOMUNIKATË PËR SHTYP

Monitorimi i protestës së 20 tetorit 2026

Tiranë, 21 tetor 2026

Ahmet Prençi-Komisioner

Drejtues i Mekanizmit Kombëtar për Parandalimin e Torturës

Sot, 21 tetor, si komisioner i Mekanizmit Kombëtar për Parandalimin e Torturës, që është njësi e Avokatit të Popullit, ju informoj mbi gjetjet nga monitorimi i datës 20 tetor në lidhje me respektimin e të drejtave të njeriut gjatë protestës dhe me trajtimin e personave të shoqëruar dhe të lënduar. Këto janë gjetje paraprake. Hetimi i thelluar vazhdon, dhe do t'ju njoftojmë brenda afateve ligjore.

Ku u bë monitorimi
Gjatë ditës së 20 tetorit, ekipe të Avokatit të Popullit kanë inspektuar Komisariatin e Policisë nr. 2, Bllokun e Sigurisë dhe Spitalin e Traumës. Komisariatet nr. 1, 5 dhe 6 nuk kishin persona të shoqëruar gjatë inspektimit, dhe për këtë arsye nuk janë pjesë e këtij monitorimi.

Numrat
Komisariati nr. 2: 2 persona madhorë, meshkuj, të cilët u liruan gjatë monitorimit.
Në momentin e inspektimet në Bllokun e Sigurisë ndodheshin 118 persona, nga të cilët 36 ishin arrestuar orët e fundit. Në këtë ambient ndodhen  6 të mitur. U administruan 6 ankesa nga personat e arrestuar.
Spitali i Traumës: 6 protestues, 1 prej të cilëve i mitur, krahasuar me 34 persona të trajtuar mjekësisht një ditë më parë.
Gjatë ditës së djeshme u administruan 6 ankesa për pretendime dhune gjatë ditës së 20 tetorit, të gjitha në Bllokun e Sigurisë.
Gjetjet dhe baza ligjore
3.1 Pretendimet e dhunës dhe përdorimi i forcës

Në Bllokun e Sigurisë u pretendua dhunë gjatë ndalimit ose shoqërimit. Në një rast u raportua dëmtim në kokë, dhe në një tjetër dëmtim i syrit. Pamjet filmike të publikuara nga protesta ngrenë shqetësime për tërheqje zvarrë dhe goditje me shkopinj gome. Qytetarët na kanë dërguar pamje filmike të dhunës së ushtruar nga policia gjatë ndalimit dhe shoqërimit. Ne po i analizojmë dhe po i hetojmë për të nxjerrë përgjegjësit. Gjithashtu, publiku na është drejtuar me ankesa përmes telefonit dhe na ka sinjalizuar raste të përdorimit të forcës, të cilat po analizohen.

Standardi: Neni 3 i Konventës Evropiane për të Drejtat e Njeriut (KEDNJ) ndalon torturën dhe trajtimin çnjerëzor ose poshtërues. Neni 11 mbron tubimin paqësor. Përdorimi i forcës duhet të jetë i ligjshëm, i domosdoshëm dhe proporcional.

3.2 Trajtimi në spital

Në Spitalin e Traumës, një person i arrestuar qëndronte ende i shtruar, i prangosur në krevat, ndërsa një punonjës policie ishte në dhomë. Ai pretendoi se u dhunua gjatë arrestimit dhe kishte dëmtim të madh në sy.

Standardi: Nenet 3 dhe 5 të KEDNJ kërkojnë mbrojtjen nga keqtrajtimi dhe respektimin e garancive gjatë privimit nga liria. Çdo kufizim fizik duhet të ketë bazë, të jetë i nevojshëm dhe të dokumentohet.

3.3 Kushtet dhe mbipopullimi

Gjatë inspektimit në Bllokun e Sigurisë u konstatua se në dhoma të destinuara për një person qëndronin 3 deri 4 persona. Sipas raportimit, të paktën dy persona flinin në dysheme. Kapaciteti zyrtar i Bllokut të Sigurisë është 67 persona, ndërsa ne gjetëm aty 118 të arrestuar.

Standardi: Neni 3 i KEDNJ ndalon trajtimin çnjerëzor ose poshtërues. Gjykata e Strasburgut ka përcaktuar hapësirën minimale prej 3 m² për të burgosur në qeli me shumë persona. Standardet e Komitetit Evropian për Parandalimin e Torturës (CPT) kërkojnë vend për fjetje, ujë, higjienë dhe kujdes mjekësor.

3.4 Të miturit

Gjatë monitorimit morëm kontakt me 6 të mitur. Por në Bllokun e Sigurisë, ku mbahen, nuk arritëm të identifikojmë dhomë të veçantë për fëmijët. Ankesat e administruara lidheshin me kufizimet për kontaktin me familjen dhe avokatin, si dhe mungesën e psikologut gjatë marrjes në pyetje.

Standardi: Neni 37 i Konventës për të Drejtat e Fëmijës kërkon trajtim njerëzor dhe mbrojtje të posaçme për çdo fëmijë të privuar nga liria.

Kërkesat tona
E drejta për tubim paqësor garantohet me Kushtetutë. Ne dënojmë çdo akt dhune, nga kushdo që vjen. Policia ka detyrimin të garantojë sigurinë publike dhe, në çdo ndërhyrje, të përdorë forcën vetëm kur është e domosdoshme dhe në mënyrë proporcionale.

Nga Policia e Shtetit kërkojmë:

Ruajtjen e menjëhershme të pamjeve filmike të protestës, të komisariateve dhe të Bllokut të Sigurisë, dhe instalimin e kamerave në çdo ambient shoqërimi dhe zyrë, me ruajtje të pamjeve.
Vënien në dispozicion të urdhrave, regjistrave dhe të dhënave për bazën e shoqërimit, kohëzgjatjen dhe identitetin e punonjësve.
Identifikim të detyrueshëm të çdo punonjësi dhe automjeti në çdo operacion.
Dokumentimin e garancive për 6 të miturit dhe ndarjen e tyre nga të rriturit.
Sqarim mbi prangosjen e personit të shtruar në spital: kush e vendosi, arsyet dhe kohëzgjatja.
Nga Ministria e Brendshme kërkojmë:

Të merren masa që Blloku i Sigurisë të funksionojë me kapacitetin normal prej 67 personash dhe personat e tjerë të mbipopulluar të sistemohen në ambientet të tjera që plotësojnë standardet..
Nga Ministria e Shëndetësisë kërkojmë:

Mjekë të disponueshëm çdo kohë në ambientet e shoqërimit.
Dokumentimin mjekësor të çdo dëmtimi trupor, për të lehtësuar hetimin dhe nxjerrjen e përgjegjësive për rastet e trajtimit çnjerëzor dhe degradues ndaj protestuesve.
Avokati i Popullit do të vazhdojë të monitorojë zbatimin e këtyre kërkesave. Kur verifikohen përgjegjësitë, do të kërkojmë marrjen e masave ndaj punonjësve të policisë dhe do t'i referojmë në prokurori rastet kur konstatojmë shkelje të ligjit dhe përgjegjësi penale nga ana e tyre.

Gjejmë rastin të ftojmë çdo qytetar që pretendon se i janë cenuar të drejtat gjatë protestës ose shoqërimit në polici t'i drejtohet Avokatit të Popullit me ankesë individuale: përmes numrave tanë të telefonit, faqes zyrtare apo rrjeteve sociale. Konfidencialiteti garantohet.

Po ndodh...

14:19 AKTUALITET

Vrau dy vëllezërit në Kamëz, lihet në burg Ngushëllim Manzi

14:15 AKTUALITET

“Më arrestoni, në shtëpi jam si në burg”, i riu me aftësi të kufizuara del në protestë: Vetëm të bëhet ky vend

13:53 POLITIKË

“S’do hipni në trena e s’do keni akses në hotele”/ Rama kërcënoi protestuesit, Berisha: Zhduku 230 mln euro me inceneratorë që nuk punojnë

13:29 POLITIKË

U tha se ishte shoferi i tij, deputeti i PS-së reagon pas vetëvrasjes së 46-vjeçarit në Tiranë

13:21 AKTUALITET

Arrestimet të paligjshme! Prokurori Arbër Berexha liron menjëherë protestuesit

13:12 POLITIKË

Protesta e studentëve në Shqipëri, eurodeputeti gjerman: Kam dëshmuar lidhjet mes shtetit, pushtetit dhe krimit të organizuar

13:09 AKTUALITET

“Të japë dorëheqjen e të hapë krahun”/ Rama kërkon takim, protestuesi refuzon: Nuk ka dialog me kriminelë! Ka hyrë në gjak me shqiptarët

12:57 AKTUALITET

“Do ta hidhja kapelën, nuk luftoj për një diktator!”/ Mit’hat Havari: Policia të mos ushtrojë dhunë ndaj studentëve. Rama drejt fundit!

12:42 AKTUALITET

Dita e 9 e revoltës studentore/ Pas tubimit para Kryeministrisë, studentët dhe pedagogët nisin marshimin drejt Ministrisë së Arsimit

12:30 POLITIKË

“Fëmijë me kapuç të verbër dhe të manipuluar”/ Rama vijon fyerjet ndaj të rinjve: Vandalë të vegjël, jo heronj të lëvizjes!

12:16 KOSOVA

Nga masakrat në Kosovë te Gjykata Speciale, përplasja e Konjufcës me Gjuriqin në OKB

12:14 POLITIKË

Rrahjet barbare ndaj të rinjve nga civilë dhe policë, Rama nuk reflekton: Pedagogët i bëjnë jehonë dhunës! Duan të na imponojnë me gurë e zjarr botën e tyre!

12:00 AKTUALITET

Kontroll për sende të ndaluara në burgun e Shkodrës, zbulohen celular dhe karikues

11:58 AKTUALITET

Me flamurin kuq e zi, një tjetër grup studentësh i bashkohet marshimit te Kryeministria, thirrje: Rama dorëhiqu!

Dua të lexoj më shumë lajme