English
Luaj me Fjalëkryq
Lajme flash

Zbardhet skema! Si paguante Rusia që të dezinformonte dhe ndërhynte në zgjedhjet në Moldavi! Roli i oligarkut të sanksionuar nga SHBA dhe BE

21 Shtator 2025, 17:53 / BOTA ALFA PRESS

Zbardhet skema! Si paguante Rusia që të dezinformonte dhe

Një rrjet sekret propagande, i financuar nga Rusia, po tenton të ndikojë dhe të prishë zgjedhjet parlamentare të 28 shtatorit në Moldavi, ka zbuluar një hetim i BBC. Qëllimi i këtij operacioni është dëmtimi i partisë qeverisëse pro-BE, duke përhapur propagandë pro-ruse dhe lajme të rreme në rrjetet sociale.

Hetimi, i kryer nga një gazetare e fshehtë e BBC-së, zbuloi se pjesëmarrësit në rrjet u premtoheshin pagesa mujore në këmbim të postimeve në TikTok dhe Facebook që sulmonin partinë qeverisëse PAS, të themeluar nga Presidentja Maia Sandu.
Një organizatore e rrjetit, Alina Juc, i tha gazetares se do të paguhej 3,000 lei moldavë (170 dollarë) në muaj, me paratë që vinin nga Promsvyazbank (PSB) – një bankë shtetërore ruse e sanksionuar, e lidhur me Ministrinë e Mbrojtjes së Rusisë.

Pjesëmarrësit u trajnuan për të prodhuar përmbajtje manipuluese, madje duke përdorur ChatGPT, por u udhëzuan të shmangnin përdorimin e tepërt të inteligjencës artificiale që postimet të dukeshin sa më organike. Fillimisht, ata krijonin përmbajtje patriotike, por me kalimin e kohës, udhëzimet u bënë haputazi politike, me akuza të pabaza ndaj qeverisë Sandu, si falsifikim votash dhe trafikim fëmijësh.

Një nga detyrat e rrjetit ishte kryerja e sondazheve të fshehta. Gazetarja dhe rekrutët e tjerë duhej të intervistonin qytetarë që mbështesnin opozitën pro-ruse dhe t’i regjistronin fshehurazi, për të krijuar prova të rreme që zgjedhjet ishin manipuluar nëse PAS fitonte.
Këto të dhëna do të përdoreshin si bazë për të vënë në dyshim rezultatin zgjedhor, duke ndezur trazira dhe destabilitet politik.

BBC ka gjetur lidhje direkte midis këtij rrjeti dhe oligarkut moldav Ilan Shor, i cili ndodhet në Moskë dhe është i sanksionuar nga SHBA, BE dhe Britania e Madhe për “operacione të ndikimit të keq të Kremlinit” dhe korrupsion.
Gjithashtu, rrjeti lidhet me OJQ-në Evrazia, e cila është akuzuar se ka paguar qytetarë moldavë për të votuar kundër anëtarësimit të Moldavisë në BE në një referendum të kaluar. Një nga grupet në Telegram, ku u infiltrua BBC, quhej pikërisht “Udhëheqësit e Evrazias”.

Në një bisedë të filmuar fshehurazi, Alina Juc dëgjohet duke kërkuar fonde nga Moska:
“Dëgjo, a mund të sjellësh para nga Moska? Më duhen vetëm që t’u jap njerëzve të mi rrogat.”

Hetimi zbuloi se rrjeti përbëhet nga të paktën 90 llogari në TikTok, të cilat kanë shpërndarë mijëra video propagandistike, me mbi 23 milionë shikime dhe 860,000 pëlqime që nga janari.
Një analizë e Laboratorit të Kërkimeve Forenzike Dixhitale (DFRLab) sugjeron se rrjeti mund të jetë edhe më i madh, duke arritur 55 milionë shikime në total.

Moldavia, një vend me vetëm 2.4 milionë banorë, ka një pozicion strategjik midis Ukrainës dhe Rumanisë, duke e bërë atë një pikë të nxehtë të interesave mes BE-së dhe Kremlinit.
Ekspertët paralajmërojnë se, përveç luftës në Ukrainë, Moldavia mund të kthehet në fushëbetejën e radhës të luftës hibride të Rusisë përmes propagandës dhe destabilizimit politik.

Hetimi i BBC-së nxjerr në pah mekanizmat e sofistikuar të ndërhyrjes ruse dhe rrezikun që dezinformimi paraqet për demokracitë në Evropë.

 

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128