Lajme flash
The Guardian: Protestat studentore në Shqipëri përshkallëzohen në dhunë, demonstruesit përplasen me policinë
2026-10-14 20:35:00 / POLITIKË
*Artikulli i plotë nga “The Guardian”*
Dhjetëra mijëra studentë kanë dalë në rrugët e Tiranës në një protestë që u përshkallëzua në përplasje të dhunshme me policinë, ndërsa një godinë qeveritare dhe dy banka u përfshinë nga flakët. Protestuesit hodhën gurë në drejtim të efektivëve, ndërsa policia përdori topa uji dhe gaz lotsjellës për të shpërndarë turmën.
Në raportimin e publikuar të mërkurën, më 14 tetor, gazeta britanike “The Guardian” shkruan se protesta u zhvillua kundër rritjes së kostove të arsimit dhe korrupsionit. Demonstruesit ndezën zjarr në godinën e Ministrisë së Arsimit, përmbysën kosha mbeturinash dhe dëmtuan fasadat e bizneseve në zonën përreth. Flakët përfshinë gjithashtu një degë të bankës Raiffeisen, pranë ministrisë.
Protesta më e dhunshme kundër qeverisë Rama
Sipas “The Guardian”, ngjarjet shënojnë përshkallëzimin më të dhunshëm të pakënaqësisë ndaj kryeministrit Edi Rama, i cili siguroi një mandat të katërt në zgjedhjet e majit 2025, por që prej asaj kohe është përballur me pakënaqësi në rritje për shkak të akuzave për korrupsion që përfshijnë zyrtarë të lartë të qeverisë.
Gazeta vëren se protestuesit nuk i shohin as figurat e opozitës si alternativa të pranueshme politike, duke reflektuar një pakënaqësi që shkon përtej kundërshtimit të qeverisë aktuale.
Trazirat e fundit vijnë pas një vere me protesta paqësore kundër Ramës. Sipas raportimit, ato u nxitën fillimisht nga projekti i propozuar për ndërtimin e një resorti luksoz në bregdetin jugor të Shqipërisë, i mbështetur nga Jared Kushner, dhëndri i presidentit amerikan Donald Trump. Projekti është përfshirë në mosmarrëveshje ligjore.
“Ky është një revolucion. Jemi lodhur nga protestat paqësore. Nuk do të ndalemi derisa Rama të japë dorëheqjen”, citohet të ketë thënë një studente e identifikuar me emrin Lora, e cila refuzoi të bëjë publik mbiemrin e saj, ndërsa hidhte gurë drejt policisë.
Gjatë protestës, demonstruesit brohoritën gjithashtu thirrje për dorëheqjen e kryeministrit dhe slogane kundër policisë.
Studentët kundërshtojnë kushtet në universitete dhe kostot e arsimit
Organizatorët studentorë kanë deklaruar se kërkesat e protestës lidhen me kushtet në universitete, kostot e arsimit të lartë, mungesën e mbështetjes financiare dhe perspektivën e punësimit pas diplomimit.
Pakënaqësia e të rinjve lidhet kështu jo vetëm me situatën politike, por edhe me vështirësitë ekonomike dhe mundësitë e kufizuara që ata shohin për të ardhmen.
Sipas raportimeve të mediave shqiptare të cituara nga “The Guardian”, protestat e së mërkurës janë shtrirë edhe në universitetet e Elbasanit dhe të Shkodrës.
Gazeta e vendos këtë valë protestash në kuadrin e një lëvizjeje më të gjerë të aktivizmit studentor në Evropë, ku të rinjtë po protestojnë për kushtet e arsimit dhe të jetesës.
Në Francë, nxënësit e shkollave të mesme kanë zhvilluar prej javësh protesta dhe bllokime të institucioneve arsimore, duke kërkuar më shumë mësues dhe ambiente më të mira. Ata argumentojnë se degradimi i ndërtesave shkollore dhe mbipopullimi i klasave po dëmtojnë cilësinë e arsimit.
Qeveria dënon dhunën, BE-ja kërkon hetim
Qeveria shqiptare ka dënuar aktet e dhunës gjatë protestës.
Zëvendëskryeministrja Albana Koçiu reagoi përmes një postimi në Facebook, duke theksuar se protesta është një e drejtë legjitime, por nuk mund të përdoret si justifikim për dhunë dhe shkatërrim të pronës publike apo private.
Ajo u bëri thirrje studentëve dhe qytetarëve që besojnë te e drejta për të protestuar të distancohen nga dhuna dhe vandalizmi.
Edhe Policia e Shtetit bëri thirrje për qetësi, duke paralajmëruar se personat që ushtrojnë dhunë, djegin ose shkatërrojnë pronën dhe sulmojnë efektivët do të mbajnë përgjegjësi individuale dhe do të përballen me ligjin, në varësi të veprave të kryera.
Ndërkohë, Bashkimi Evropian ka shprehur shqetësim për përshkallëzimin e dhunës gjatë protestës në Tiranë.
Delegacioni i BE-së në Shqipëri deklaroi se ka marrë në konsideratë pretendimet për përdorim të tepruar të dhunës nga policia ndaj protestuesve dhe gazetarëve. Përfaqësuesit evropianë kërkuan një hetim të shpejtë dhe u bënë thirrje të gjitha palëve të ulin tensionet.
Përplasjet e fundit shënojnë një përshkallëzim të ndjeshëm të protestave në kryeqytet, ku kërkesat për përmirësimin e arsimit dhe mbështetjen e të rinjve janë ndërthurur me pakënaqësinë ndaj qeverisë dhe akuzat për korrupsion./Përktheu Alfapress, marrë nga The Guardian
Po ndodh...
ide
The youth imprisoned between the SP and the DP is exploding!
Nga Sidi Hasanaj
Flamingos, in 137 days, turned into eagles
Nga Taulanda Jupi
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128