Eurovision ndryshon rregullat! Vendet në luftë mund të humbasin të drejtën për të organizuar konkursin

Eurovision po ndryshon rregullat e tij dhe një prej ndryshimeve më të rëndësishme lidhet me vendet që janë të përfshira në konflikte të armatosura. Sipas rregullores së re, nëse një shtet i përfshirë në një konflikt fiton konkursin, ai nuk do të ketë automatikisht të drejtën ta organizojë Eurovision-in në vitin pasues.

Ndryshimi u miratua nga organi drejtues i konkursit pas reagimeve të transmetuesve pjesëmarrës pas Eurovision 2026 në Vjenë. Rregullat specifikojnë gjithashtu se një vend mund të humbasë të drejtën për të organizuar eventin nëse një “situatë e ndjeshme gjeopolitike” ndikon në sigurinë, stabilitetin ose mirëqenien e shtetit apo rajonit përreth tij.

Ndryshimi që shihet si mesazh për Izraelin

Edhe pse rregullorja nuk përmend asnjë shtet në mënyrë specifike, ndryshimi është interpretuar gjerësisht si një reagim ndaj situatës së Izraelit dhe pranisë së tij të vazhdueshme në Eurovision, në një kohë kur veprimet ushtarake të vendit në Gaza dhe Lindjen e Mesme kanë shkaktuar kritika të shumta.

Pas përpjekjes së dështuar për pezullimin e Izraelit nga konkursi, pesë transmetues njoftuan bojkotin e Eurovision 2026, mes tyre edhe Spanja dhe Irlanda. Pavarësisht protestave, përfaqësuesi i Izraelit, Noam Bettan, u rendit në vendin e dytë me këngën “Michelle”. Kjo ishte hera e dytë radhazi që Izraeli renditej i dyti, duke shtuar shqetësimet e disa transmetuesve për sigurinë në rast se vendi do të fitonte dhe do të duhej të organizonte konkursin në Tel Aviv ose Jerusalem.

Rregulli prek edhe Ukrainën

Megjithatë, ndryshimi nuk vlen vetëm për Izraelin. Një tjetër shtet që mund të preket nga kjo rregullore është Ukraina, e cila ndodhet në luftë që prej pushtimit rus në vitin 2022.

Në atë vit, Ukraina fitoi Eurovision-in me grupin Kalush Orchestra dhe këngën “Stefania”, në një rezultat që u pa edhe si një shprehje e fuqishme solidariteti ndërkombëtar. Sipas rregullave të reja, një fitore e ngjashme në të ardhmen nuk do të nënkuptonte domosdoshmërisht që Ukraina do të organizonte Eurovision-in vitin pasues.

Pas fitores së vitit 2022, organizatorët kryen një vlerësim të plotë të sigurisë dhe mundësisë për ta zhvilluar konkursin në Kiev. Në fund, rreziqet u konsideruan shumë të mëdha dhe Mbretëria e Bashkuar mori përsipër organizimin e Eurovision 2023 në Liverpool, në bashkëpunim me transmetuesin ukrainas.

Tashmë ky proces është formalizuar në rregullore. European Broadcasting Union mund të kërkojë, kur e sheh të nevojshme, një vlerësim të pavarur të sigurisë në rajonin e shtetit fitues. Më pas, bazuar në këtë vlerësim, do të vendoset nëse transmetuesi fitues është në gjendje ta organizojë në mënyrë të sigurt konkursin.

Nëse vendi fitues konsiderohet i papërshtatshëm për të pritur eventin, EBU do të zgjedhë një transmetues alternativ për ta organizuar atë.

Ndryshojnë edhe rregullat për performancat

Ndryshimet nuk lidhen vetëm me çështjet gjeopolitike. Eurovision ka njoftuar gjithashtu se mosha minimale për pjesëmarrje do të rritet nga 16 në 18 vjeç.

Janë sqaruar edhe rregullat për përdorimin e backing tracks. Nga edicioni i ardhshëm, këto materiale të regjistruara nuk duhet të ndihmojnë në mënyrë të tepruar vokalistin, për shembull duke përfshirë një zë të regjistruar që këndon melodinë kryesore për ta mbështetur ose përforcuar performancën live.

Sipas organizatorëve, qëllimi është të sigurohet që publiku të dëgjojë gjithmonë vokalin kryesor të interpretuar live dhe të ruhet integriteti i performancave.

Drejtori i Eurovision, Martin Green, tha se ndryshimet synojnë të ofrojnë më shumë qartësi, të mbrojnë artistët dhe të garantojnë një ambient të sigurt për të gjithë pjesëmarrësit, duke ruajtur njëkohësisht frymën e konkursit.

Ndërkohë, Eurovision-i i ardhshëm do të zhvillohet në Bullgari, pasi përfaqësuesja e saj Dara fitoi edicionin 2026 me këngën “Bangaranga”.

Po ndodh...

11:54 EKONOMI&SOCIALE

Si u bënë tym milionat e djegësit fantazmë të mbetjeve në Tiranë?

11:51 AKTUALITET

Ndahet papritur nga jeta ish-kreu i Gjykatës së Vlorës, ishte me pushime me familjen në bjeshkët e Tropojës

11:40 AKTUALITET

Çahet tubacioni i ujit te rrethrrotullimi i Saukut, pezullohet qarkullimi i makinave

11:29 POLITIKË

Dyshohen si pasuri e fshehur e Ballukut, SPAK kontroll dy vilave të Igli Tares në Palasë

11:27 SPORT

Vlahovic kthen faqe, eliminon çdo gjurmë të Juventusit nga rrjetet sociale pas largimit

11:03 EKONOMI&SOCIALE

Ku do shkojë Tirana e betonit?!/ Në janar-qershor jepen 5-fish leje për ndërtime, rekord me vlerë 1.6 mld euro

10:51 BOTA

Përhapet virusi i Nilit Perëndimor, 9 viktima dhe 110 raste në Greqi

10:33 KOSOVA

Ngërçi politik në Kosovë, PDK-ja dorëzon kërkesë për vazhdimin e seancës konstituive të Kuvendit

10:17 AKTUALITET

Kërcënoi grupin e xhirimit të Ora News, arrestohet Sinan Hamdi Idrizi, e pëson edhe punëdhënësi

10:04 AKTUALITET

Zjarri në Lurë alarmant, flakët afrohen rreth 50 metra pranë banesave

09:53 AKTUALITET

12 vatra zjarri akoma aktive në Shqipëri, 839 forca në terren, ministria bën bilancin

09:33 POLITIKË

Veliaj dhe Bashkia Tiranë ankimojnë në Apel vendimin e Administratives për emërimin e prokurorit Ols Dado

09:11 BOTA

Pas tërmetit shkatërrues, vullkani i baltës shpërthen në Kolumbi

08:46 BOTA

Përplasje Marok–Algjeri/ Migracioni në Ceuta rikthen në vëmendje rivalitetin për Saharanë Perëndimore

Dua të lexoj më shumë lajme