Lajme flash
PS propozoi shkrirjen e bashkisë/ Kryebashkiaku i Divjakës del në protestë: Ndihem i tradhtuar, na erdhi si bombë
31 July 2026, 22:06 / POLITIKË
Kryetari i Bashkisë së Divjakës, Josif Gorrea, ka dalë kundër propozimit të bërë nga Partia Socialiste për Reformën Territoriale, sipas të cilit bashkia që ai drejton do t’i bashkohet Lushnjës.
Gjatë një proteste të zhvilluar në Divjakë, Gorrea tha se lajmi për shkrirjen e bashkisë i kishte rënë si “bombë”.
Kryebashkiaku socialist tha se ndihet i tradhtuar nga partia e tij dhe se nuk është pyetur, por as nuk ka pasur dijeni për vendimin e marrë nga PS-ja.
Gorrea tha se ka disa arsye pse bashkia që ai drejton nuk duhet të shkrihet, duke theksuar se ajo ka 56 mijë banorë dhe se, sipas censusit të dy viteve më parë, në Divjakë aktualisht banojnë rreth 25 mijë persona.
Po ashtu, ai hodhi akuza, duke deklaruar se “kjo nuk mund të quhet reformë”.
“Ju falënderoj që jeni pjesë e këtij tubimi, i cili dje të gjithëve na ra si bombë. Mendova se fjalën këtu do ta mbanin vetë ata, por të gjithë kanë të drejtën e vet të flasin siç e ndiejnë. Edhe unë, si qytetar, ashtu si ju, jam i çuditur, edhe pse duhej të isha disi në dijeni për shkak të pozicionit politik që kam.
Dje më ra si bombë lajmi, kur pashë që Bashkia Divjakë ishte një nga 15 bashkitë që do të shkriheshin. Unë mendoj se këtu jemi për një qëllim dhe qëllimi i përbashkët është që ta mbrojmë bashkinë tonë, e cila është e popullit më punëtor të republikës. Të them të vërtetën, ndihem i tradhtuar, sepse pa asnjë paralajmërim na vjen kjo bombë.
Në të vërtetë, kjo nismë e qeverisë ka kohë që përflitet. Komisioni i Reformës Territoriale ka shqyrtuar mundësitë se si ta vijojë këtë reformë, por, për fat të keq, ajo që ndodhi dje nuk mund të quhet reformë. Pse? Sepse një nga kriteret ishte numri i popullsisë dhe unë kam fjetur i qetë, pasi bashkia jonë ka 56 mijë banorë dhe, për nga renditja numerike, ne jemi të 26-tët. Pra, duhej të shkriheshin 27 bashki që të na vinte radha neve për nga numri i popullsisë. Edhe sipas censusit, bashkia ka një numër të lartë banorësh. Janë 25 mijë banorë, një shifër që është pranuar nga qeveria shqiptare dhe që është shumë e lartë”, tha ndër të tjera Gorrea.
Sakaq, administrata e Bashkisë Divjakë ka paralajmëruar se do të lërë punën duke nisur nga dita e hënë.
Qytetarët, të cilët janë me bindje edhe të majtë, edhe të djathtë, janë shprehur se do të dalin çdo ditë në protestë në sheshin kryesor të qytetit, derisa të anulohet projekti për reformën territoriale.
Po ndodh...
Berisha plaket "kur do vetë”, por PD po jep shpirt!
Nga Indrit Gjyzeli
ide
Fundi i iluzionit të diplomacisë
Nga Sokol Neçaj
Poliçani është vetëm fillimi i shpërthimit të krizës
Nga Red Varaku
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128