Lajme flash
Tensione në kufi dhe në tavolinat e FIFA-s!/ Kriza e emigrantëve kris raportet Spanjë-Marok, beteja diplomatike për finalen e madhe të Botërorit 2030
2 August 2026, 09:43 / BOTA
Ndërsa bota e futbollit përgatitet për edicionin historik të Kupës së Botës në vitin 2030, gazeta e njohur spanjolle "El Mundo" ka zbardhur në një artikull të detajuar tensionet e heshtura dhe manovrat diplomatike mes Spanjës dhe Marokut. Edhe pse ndeshja finale e këtij eventi do të luhet më 21 korrik 2030, vendimi se cili vend do të presë takimin vendimitar do të merret në vitin 2027, duke shndërruar fushën e gjelbër në një arenë të re përplasjesh mes dy fqinjëve të Mesdheut.
Zanafilla e projektit dhe përfshirja e Maroku
Sipas "El Mundo", ideja e organizimit të këtij Botërori lindi fillimisht në vitin 2018 nga ish-presidenti i Federatës Spanjolle të Futbollit, Luis Rubiales, në bashkëpunim me Portugalinë. Në atë kohë, marrëdhëniet mes qeverisë spanjolle dhe federatës ishin të qëndrueshme, dhe gjatë një vizite të presidentit të FIFA-s, Gianni Infantino, në Madrid, projekti nisi të merrte jetë.
Megjithatë, gjërat ndryshuan kur vetë kryeministri spanjoll Pedro Sánchez, gjatë një vizite në Rabat në nëntor të vitit 2018, ftoi publikisht Marokun t'i bashkohej nismës (pa informuar fillimisht Portugalinë). Pas një sërë zhvillimesh politike dhe largimit të Ukrainës nga ky kombinim, Maroku u përfshi zyrtarisht vetëm në muajin mars të vitit 2023.
Dobësimi i pozitës spanjolle dhe ambicia e Marokut
Siç thekson "El Mundo", hyrja e vonë e Marokut e poziciononte atë fillimisht si një "vend të ftuar". Por situata ndryshoi rrënjësisht pas skandaleve që tronditën federatën spanjolle dhe pezullimit të Luis Rubiales, ngjarje që çuan në një periudhë disavjeçare paqëndrueshmërie administrative në Spanjë.
Përfitues nga kjo situatë ka qenë Maroku, i cili përmes një diplomacie të heshtur por intensive, ka fituar peshë në marrëdhëniet me kreun e FIFA-s, Gianni Infantino. Ndërkohë që në Spanjë ekzistonte një pakt i heshtur se finalja do të luhej në stadiumin "Santiago Bernabéu" të Madridit, Maroku ka hedhur në tavolinë një projekt gjigant: ndërtimin e "Gran Estadio Hassan II" në Casablanca. Ky impiant parashikohet të jetë stadiumi më i madh në botë, me një kapacitet prej 115,000 vendesh, duke synuar drejtpërdrejt marrjen e të drejtës për të pritur ndeshjen vendimtare.
Baza e Spanjës dhe vendimi përfundimtar i FIFA-s
Në këtë duel diplomatik, qeveria dhe Federata Spanjolle e Futbollit po përpiqen të ruajnë një profil të ulët publik, duke shmangur përplasjet e drejtpërdrejta me Rabatin, ku as Sánchez dhe as presidenti i ri i federatës, Rafael Louzán, nuk janë të sigurt për rezultatin.
Sipas "El Mundo", baza më e fortë e Spanjës për ta mbajtur finalen në Madrid mbetet prania e presidentit të Real Madridit, Florentino Pérez, në krye të klubit. Në fund, vendimi mbetet ekskluzivisht në duart e FIFA-s dhe rregulloreve të saj. Një sinjal i parë se si do të rrjedhin ngjarjet pritet të jepet më 18 mars, gjatë Kongresit të 77-të të FIFA-s që do të mbahet pikërisht në Rabat, ku Gianni Infantino do të kërkojë rizgjedhjen në krye të institucionit botëror të futbollit.
Po ndodh...
Berisha plaket "kur do vetë”, por PD po jep shpirt!
Nga Indrit Gjyzeli
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128