Lajme flash
Sytë nga Haga! Paralajmëron ish-këshilltari i Thaçit: Nëse Haga nuk i liron sot, do ketë tensione...
2026-09-16 10:08:00 / KOSOVA
Sytë e mbarë qytetarëve të Kosovës dhe jo vetëm, janë drejtuar ditën e sotme nga Gjykata Speciale e Hagës, aty ku pritet të merret një vendim thelbësor për ish-krerët e UÇK-së. Ky proces gjyqësor po cilësohet si një moment tejet delikat, i cili ka mbajtur opinionin publik nën ethe të forta emocionale dhe politike.
Në një analizë të situatës për “Ora News, ish-këshilltari i Hashim Thaçit, Ardian Arifaj, e konsideroi këtë si një ditë të rëndë për shtetin e Kosovës, e cila vjen pas një përvoje disavjeçare dhe sfiduese me Dhomat e Specializuara.
Megjithatë, pritet që vendimi të mbështetet rreptësisht mbi faktet e grumbulluara në tre vitet e fundit të gjykimit, duke lënë mënjanë influencat dhe agjendat e mundshme politike.
Arifaj theksoi se në Kosovë ka një dyshim të gjerë se ky institucion gjyqësor ka devijuar nga thelbi i tij i drejtësisë, duke marrë një profil të mirëfilltë politik.
Në arenën e brendshme, mungesa e një figure udhëheqëse si Hashim Thaçi është bërë thellësisht e dukshme, duke krijuar një vakum në skenën politike.
Raportimet e ashpra dhe të paprecedenta nga Departamenti Amerikan i Shtetit, bashkë me sfidat e përditshme si inflacioni më i lartë në Evropë dhe rritja alarmante e kostos së jetesës, dëshmojnë për një degradim si në aspektin e brendshëm ashtu edhe atë ndërkombëtar të Kosovës. Kjo situatë ka shkaktuar rritje të pakënaqësisë.
Një aspekt tejet alarmant i këtij procesi mbetet reagimi i mundshëm në rast të një vendimi të pafavorshëm nga Haga. Paralajmërimet për tensione të shtuara janë bërë të qarta. Marshimi i fundjavës së kaluar në Prishtinë, që mblodhi mbi 100 mijë qytetarë nga Shqipëria, Maqedonia e Veriut, Mali i Zi dhe diaspora, është dëshmia më e fortë e një ngarkese emocionale masive që rrezikon të derdhet në rrugë.
Ndërsa nga institucionet pritet pjekuri dhe reagime të matura, dinamikat qytetare mbeten të paparashikueshme. Frika, shpresa dhe frustrimi që aktualisht mbizotërojnë tek njerëzit do të kërkojnë menaxhim të kujdesshëm, duke e lënë fatin e stabilitetit qytetar plotësisht në dorë të drejtësisë që do të shpërndahet jashtë ndikimeve apo preferencave politike.
PJESË NGA BISEDA NË STUDIO
Sytë e qytetarëve të Kosovës dhe jo vetëm, nuk janë më se çfarë ndodh rreth e rrotull vendit, por janë përqëndruar në Hagë atje ku pritet vendimi në orën 10 e pak minuta. Si e mendoni këtë vendim ditën e sotme?
Ardian Arifaj: Në fakt është një ditë shumë e rëndë pasi që kjo përvojë gjatë vjeçare me Dhomat e Specializuara ka qenë e rëndë për Kosovën, por edhe me plot shpresë që sot në procesin që fillon tash në ora 10 e nuk e dimë sa do të zgjasë, megjithatë drejtësia do të mbizotërojë. Vendimi final do të jetë një vendim i marrë mbi faktet e prezantuara në këto tre vite të gjyqit edhe që politika do të qëndrojë anash edhe nuk do të përzihet në këtë vendim. Këto po e them sepse në Kosovë sot askush nuk ka dyshim që ky gjyq, kjo gjykatë, Dhomat e Specializuara janë kthyer në një institucion politik që ka devijuar nga misioni i vet që e ka pasur në fillim, e që ka qenë drejtësia, dhe tash më shumë po merret me politikë sesa me drejtësi. Prandaj edhe pritjet janë që ashtu siç e ka bërë të qartë mbrojtja që sa herë, që vendimi do të jetë i bazuar në faktet e prezantuara dhe asgjë tjetër.
Dhe ju në fakt e keni njohur nga afër Hashim Thaçin dhe keni punuar si këshilltar i tij, ashtu sikurse edhe unë ju prezantova. Çfarë prisni realisht nga vendimi i Hagës dhe sa mund të ndryshojë ky vendim pikërisht në politikën e Kosovës?
Ardian Arifaj: Po, kam pasur nderin, privilegjin të punoj me presidentin Thaçi me vite të tëra edhe ka qenë një përvojë e jashtëzakonshme, që më ka bërë të njoh më afër edhe të njoh përkushtimin e tij për një Kosovë të shekullit 21, një Kosovë të kthyer kah e ardhmja, kah zhvillimi, kah jeta më e mirë për të gjithë qytetarët e saj, një Kosovë që e ka mbyllur kapitullin e konfliktit. Dhe ajo që mund ta them unë si vëzhgues është që Kosovës sot po i mungon një politikan i kalibrit të Hashim Thaçit në këto vite. Pa Hashim Thaçin në skenën politike të Kosovës, politika në Kosovë, por edhe shteti i Kosovës, duke i falenderuar këtyre, të shprehemi ironikisht, politikanëve të sotshëm, ka stagnuar dhe në disa sektorë jetës madje edhe ka pësuar regres. U fol për një raportim në Dhomën e Përfaqësuesve në Shtetet e Bashkuara në të cilat u fol me një gjuhë shumë të ashpër nga Departamenti i Shtetit për Kosovën, një gjuhë e padëgjuar ndonjëherë. Pra, kemi inflacionin më të lartë në Evropë këtu në Kosovë, kemi çmime të larta, koston e jetesës më të shtrenjtë ndonjëherë. Pra, kemi një gjendje në të cilën Kosova ose ka ngecur ose ka degraduar, qoftë në rrafshin e brendshëm, qoftë në rrafshin ndërkombëtar. Edhe kjo sigurisht që më së shumti ndihet nga vetë qytetarët e Kosovës. Prandaj jo vetëm mua personalisht, por sot çdo qytetari të Kosovës po i mungon Hashim Thaçi si politikan, si lider politik i cili ka ditur ta orientojë vendin kah zhvillimi, kah një jetë më e mirë për qytetarët edhe kah mbyllja e kapitullit të luftës edhe konflikteve.
Dhe në fakt ju keni thënë pak ditë më parë se një vendim i pafavorshëm mund të shkaktojë tensione shumë më të mëdha ngase mund të parashikohet. Çfarë lloj reagimi politik dhe shoqëror prisni pikërisht në Kosovë?
Ardian Arifaj: Nga vetë institucionet, liderët, sigurisht që presim reagime të matura, por nuk mund të parashikojmë me saktësi se çfarë do të jenë reagimet e individëve jashtë institucioneve, pra nuk po hyjmë tash në spekulime. Ajo që shohim është që ka shumë emocione në rrugë, e pamë fundjavën e kaluar një marsh që solli në Prishtinë rreth 100 mijë pjesëmarrës nga tërë bota shqiptare, jo vetëm nga Kosova, por pat nga Shqipëria, nga Maqedonia e Veriut, Lugina e Preshevës, Mali i Zi, diaspora. Edhe ajo që po e vërejmë edhe sot për shembull në rrugët e Prishtinës është që njerëzit janë të emocionuar, kanë plot emocione sigurisht të ndryshme, shpresë, frikë, frustrim, besim, edhe që janë të vështirë të menaxhueshme. Por përsëri ta përmbyllim me shpresën që megjithatë vendimet do të jenë të drejta, të bazuara në fakte prezantuara e jo në preferenca politike.
Po ndodh...
Basha, Berisha and a meeting with parents in the USA!
Nga Ermal Peçi
ide
Tri krizat dhe tri zgjidhjet
Nga Përparim Gjeka
Innocence for the liberators, so that history is not judged!
Nga Azgan Haklaj
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128