Lajme flash
Gentian Selmani lë Teutën dhe transferohet në Kosovë, portieri shqiptar firmos me Ballkanin
26 August 2026, 16:47 / SPORT
Gentian Selmani do ta vazhdojë karrierën në Kosovë. Portieri 28-vjeçar është larguar nga Teuta dhe ka firmosur me Ballkanin, duke nisur një aventurë të re pas eksperiencës në kampionatin shqiptar.
Klubi nga Suhareka e ka zyrtarizuar afrimin e portierit shqiptar, i cili sjell me vete eksperiencë nga Shqipëria, Turqia dhe Kombëtarja shqiptare.
Selmani ka lindur më 9 mars 1998 në Krujë dhe është formuar në futbollin shqiptar. Gjatë karrierës së tij ka luajtur edhe në Turqi, ku ka veshur fanellat e Menemen FK dhe Boluspor, duke grumbulluar paraqitje në kategorinë e dytë turke dhe në Kupën e Turqisë.
Sezonin e fundit, portieri ishte pjesë e Teutës, ku pati një rol të rëndësishëm në skuadër. Në sezonin 2025/26, Selmani regjistroi 40 paraqitje në të gjitha kompeticionet, duke qenë një nga portierët kryesorë të ekipit durrsak.
Tashmë, 28-vjeçari do të mbrojë portën e Ballkanit dhe do të jetë pjesë e një skuadre që synon të qëndrojë në elitën e futbollit kosovar dhe të ketë rol në garat ndërkombëtare.
“FC Ballkani ka siguruar shërbimet e portierit shqiptar Gentian Selmani, i cili sjell në skuadër përvojë të rëndësishme nga kampionati shqiptar, ai turk dhe Kombëtarja e Shqipërisë”, bëri me dije klubi kosovar.
Me këtë lëvizje, Selmani hap një kapitull të ri në karrierë, pas eksperiencave në Shqipëri dhe Turqi. Tashmë sfida e radhës për të është porta e Ballkanit.
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128