Lajme flash
“Nuk kam kohë të plakem”, fjalët e fundit të Dolly Parton para vdekjes
26 August 2026, 09:30 / SHOWBIZ
Dolly Parton, një prej ikonave më të mëdha të muzikës country, kishte folur disa muaj para vdekjes për mënyrën se si e shihte moshën, jetën dhe atë që do të linte pas.
Këngëtarja, e cila u nda nga jeta në moshën 80-vjeçare më 25 gusht, kishte deklaruar se pleqërinë e konsideronte kryesisht një çështje mendësie dhe se nuk kishte ndërmend të ndalonte së punuari.
Disa muaj para se të mbushte 80 vjeç, Parton i kishte thënë revistës PEOPLE se ndihej sikur “sapo kishte filluar”, pavarësisht moshës. Ajo shpjegoi se sekreti për t’u ndier e re ishte të mos i kushtonte vëmendje moshës.
“Nëse e lejon veten të plakesh, do të plakesh. Nuk kam kohë të plakem. Nuk kam kohë të ulem dhe të mendoj për këtë. Nuk është aty ku e kam mendjen”, ishte shprehur ajo në nëntor, gjatë promovimit të autobiografisë së saj.
Parton kishte nisur gjithashtu të mendonte më shumë për trashëgiminë e saj dhe për atë që dëshironte të linte pas. Kjo e kishte frymëzuar të shkruante kujtimet e saj, “Ylli i Shfaqjes, Jeta Ime në Skenë”.
“Kur arrin në moshën time, fillon të mendosh për atë që duhet të bësh për të mbyllur rrethin. Të sigurohesh që lë pas atë që dëshiron që bota të dijë për veten tënde, nga goja jote, nga zemra jote”, kishte thënë ajo.
Megjithatë, Parton kishte folur edhe për mënyrën se si dëshironte të dukej në të ardhmen. Në një intervistë me Oprah Winfrey në vitin 2020, ajo theksoi se nuk e shihte jetën përmes numrave.
“Do të jem versioni më i mirë i vetes, pavarësisht moshës që kam”, kishte deklaruar këngëtarja.
Me humorin karakteristik, ajo kishte shtuar se, nëse do të jetonte deri në 95 vjeç, do të vazhdonte të përdorte grimin dhe ndërhyrjet estetike për t’u dukur sa më e re.
“Do të dukem si një film vizatimor. Do të kem grim. Do të dukem aq e re sa më lejojnë kirurgët e mi plastikë”, ishte shprehur Parton, duke theksuar se më e rëndësishme se pamja ishte ajo që një person përcjell nga brenda.
Pavarësisht energjisë dhe përqendrimit të saj te jeta, këngëtarja kishte menduar edhe për atë që vjen pas vdekjes. Në vitin 2025, pas ndarjes nga jeta të bashkëshortit të saj, Carl Dean, me të cilin kishte qenë e martuar për gati 60 vjet, ajo kishte thënë se besonte se një ditë do ta shihte sërish.
Në një episod të vitit 2019 të podcastit “Dolly Parton’s America”, Parton kishte folur edhe për besimin e saj dhe jetën e përtejme.
Ajo kishte thënë se shpresonte të vazhdonte të këndonte, të shkruante këngë dhe madje të luante harpë në parajsë, duke e përshkruar veten me humor si pjesë të “grupit të engjëjve”.
“Nuk mendoj se ky është fundi im. Nuk mendoj se ky është fundi i ndonjërit prej nesh”, kishte deklaruar Parton, duke shtuar se besonte se njerëzit mund të vazhdonin të ekzistonin në forma të tjera.
Fjalët e saj, të thëna muaj përpara vdekjes, tashmë marrin një tjetër kuptim, veçanërisht deklarata e saj se “nuk kishte kohë të plakej” dhe se nuk e konsideronte vdekjen si fundin.
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128