English
Luaj me Fjalëkryq
Lajme flash

Financial Times: 6.9 miliardë dollarë përmes bankave ndërkombëtare, si Rusia anashkaloi sanksionet me A7

22 September 2026, 10:13 / BOTA ALFA PRESS

Një rrjet i gjerë mashtrimi financiar, i dyshuar se është krijuar me mbështetjen e Kremlinit, ka mundësuar që kompania ruse fintech A7 të kanalizojë më shumë se 6.9 miliardë dollarë përmes sistemit bankar ndërkombëtar, pavarësisht sanksioneve të vendosura ndaj Rusisë pas nisjes së luftës në Ukrainë.

Zbulimi është bërë nga “Financial Times”, e cila ka analizuar qindra mijëra dokumente të marra nga brenda kompanisë. Sipas hetimit, A7 përdori një rrjet të gjerë kompanish fasadë, dokumente të falsifikuara dhe të dhëna mashtruese për të maskuar natyrën reale të transaksioneve.

Në transaksionet e lidhura me A7 shfaqen disa prej bankave më të mëdha ndërkombëtare.

Sipas dokumenteve të siguruara nga “Financial Times”, disa prej transaksioneve lidhen edhe me mallra të ndjeshme për luftën, përfshirë pajisje ushtarake dhe blerje të kryera për shërbimet ruse të sigurisë.

A7 u krijua në Rusi dhe Kirgistan si një alternativë për pagesat ndërkombëtare, pasi bankat ruse u përjashtuan nga sistemi SWIFT pas pushtimit të Ukrainës në shkurt 2022.

Kompania u themelua nga oligarku moldav Ilan Shor, me mbështetjen e Promsvyazbank, bankë shtetërore ruse me lidhje të ngushta me industrinë e mbrojtjes.

Kremlini e ka paraqitur A7 si një nga ofruesit kryesorë të Rusisë për pagesat ndërkufitare të importeve.

Megjithatë, sipas hetimit të “Financial Times”, kompania nuk u mbështet vetëm në teknologjinë financiare për të anashkaluar sanksionet. Dokumentet tregojnë përdorimin e kompanive fiktive, faturave të falsifikuara dhe përshkrimeve të ndryshuara të produkteve për të shmangur kontrollet bankare.

Të dhënat e analizuara nga “Financial Times” tregojnë se llogaritë në Hong Kong morën rreth 1.1 miliardë dollarë nga subjekte të lidhura me A7, nga fundi i vitit 2024 deri në gusht 2025.

Hetimi identifikoi rreth 100 kompani fiktive që kryen pagesa gjatë periudhës së mbuluar nga të dhënat e rrjedhura. Dokumentet përmendin edhe dhjetëra subjekte të tjera të ngjashme në Emiratet e Bashkuara Arabe, Hong Kong, Kirgistan dhe Indonezi.

Sipas “Financial Times”, këto kompani përdornin dokumente të falsifikuara për t’i paraqitur produktet dhe transaksionet si diçka tjetër nga ajo që ishin në të vërtetë.

A7 dyshohet se kishte në dispozicion mijëra vula kompanish, disa të falsifikuara dhe të tjera të kopjuara nga dokumente reale të kompanive që nuk kishin dijeni për përdorimin e tyre.

Punonjësit e kompanisë, sipas dokumenteve, udhëzonin klientët se si të përshkruanin produktet për të shmangur kontrollet e sanksioneve. Në disa raste, kodet doganore të produkteve të sanksionuara zëvendësoheshin me kode të ngjashme, por që nuk ishin të ndaluara.

Një nga rastet e përfshira në dokumentet e rrjedhura lidhet me blerjen e 500 dylbive me shikim nate, me vlerë rreth 510 mijë dollarë, për një klient rus në shkurt të vitit 2025.

Punonjësit e A7 kishin përgatitur dokumente ku produkti përshkruhej si “xham i përforcuar”. Në një moment u diskutua mundësia që të deklarohej si “këpucë”, por në fund u vendos të ruhej përshkrimi fillestar për të shmangur dyshimet.

Dokumentet tregojnë gjithashtu përpjekje për të hequr çdo gjurmë ruse nga dokumentacioni, përmes ndryshimit të të dhënave të blerësve, produkteve dhe dërgesave, si dhe eliminimit të shkronjave cirilike.

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128