Lajme flash
Tebas i përgjigjet Bernabeut: Mund të vazhdojnë të kërkojnë dorëheqjen time
19 October 2026, 16:03 / SPORT
Konflikti mes Javier Tebas dhe Real Madridit është rikthyer në qendër të vëmendjes. Pas fitores 4-1 ndaj Sevillas, tifozët madrilenë shfaqën një banderolë kundër presidentit të LaLigës dhe brohoritën në kor për dorëheqjen e tij, duke e kthyer stadiumin “Santiago Bernabeu” në një skenë proteste ndaj drejtuesit të futbollit spanjoll.
Në tribunën jugore u shfaq mesazhi: “Ky nuk është futboll, janë Tebas dhe Negreira”. Më pas, tifozët kënduan kundër Tebasit, presidentit të Barcelonës, Joan Laporta, dhe Federatës Spanjolle të Futbollit, duke rikthyer në diskutim çështjen Negreira, që prej kohësh është në qendër të polemikave mes dy gjigantëve të futbollit spanjoll.
Protesta erdhi vetëm pak ditë pasi Tebas krahasoi mënyrën se si Real Madrid TV kritikon arbitrimin me metodat e propagandës së Joseph Goebbels, ministrit të propagandës së Gjermanisë naziste. Deklarata shkaktoi reagim të fortë nga klubi madrilen, i cili kërkoi publikisht dorëheqjen e presidentit të LaLigës.
Tebas: Faktet më dhanë të drejtë
Tebas reagoi në rrjetet sociale, duke e lidhur protestën e tifozëve me qëndrimin e drejtuesve të Real Madridit. Ai pretendoi se ngjarjet e fundit konfirmojnë atë që kishte denoncuar në deklaratat e tij të mëparshme.
“Më duheshin vetëm dy ditë që faktet të më vërtetonin të drejtë”, shkroi presidenti i LaLigës. Ai iu referua gjithashtu një artikulli të gazetarit Tomás González-Martín në gazetën “El Debate” dhe kërkoi që Real Madridi të sqaronte publikisht qëndrimin e tij për krahasimet me çështjen Negreira, si dhe pretendimet se kalendari i ndeshjeve e vendos klubin në disavantazh.
Tebas kërkoi gjithashtu transparencë mbi kërkesat e Real Madridit për ndryshimin e orareve të ndeshjeve dhe numrin e rasteve kur këto kërkesa janë pranuar, duke kundërshtuar atë që e cilëson si një narrativë persekutimi ndaj klubit madrilen.
Përplasja me Florentino Perezin vazhdon
Presidenti i LaLigës vuri në pikëpyetje edhe përgjegjësinë e drejtuesve të Real Madridit për mesazhet që, sipas tij, përforcojnë akuzat ndaj institucioneve të futbollit spanjoll.
“A do ta shpjegojnë ata si një opinion nga jashtë klubit? Përputhja me narrativën që denoncova është e qartë për të gjithë”, deklaroi Tebas, duke iu referuar banderolës së shfaqur në Bernabeu.
Ai akuzoi drejtuesit madrilenë se po përqendrohen te manipulimet dhe gënjeshtrat, ndërsa i kritikoi për nxitjen e pakënaqësisë dhe paraqitjen e klubit si viktimë të sistemit.
“Ata mund të vazhdojnë të kërkojnë dorëheqjen time. Çdo ditë, ata ilustrojnë më mirë atë që kam denoncuar”, përfundoi Tebas.
Përplasja mes tij dhe presidentit të Real Madridit, Florentino Perez, zgjat prej më shumë se një dekade dhe duket larg një zgjidhjeje. Ndërsa çështja Negreira dhe debatet për arbitrimin vazhdojnë të ndezin polemika në Spanjë, tensioni mes LaLigës dhe klubit madrilen mbetet në nivele të larta.
Po ndodh...
Elitat heshtin, Rama bën pazare, shqiptarët paguajnë!
Nga Indrit Gjyzeli
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128