Lajme flash
The New York Times: Studentët kërkojnë dorëheqjen e kryeministrit, kreu i opozitës i përkrah por ata thërrasin "Rama në burg, Berisha në burg"
19 October 2026, 11:57 / POLITIKË
Artikulli i The New York Times
Përballë protestave të dhunshme, kryeministri prej kohësh i Shqipërisë, Edi Rama, u bëri thirrje të dielën demonstruesve të rinj që të ruajnë qetësinë, duke paralajmëruar se vendi ballafaqohet me një “murtajë të tmerrshme”, të nxitur nga Irani, Rusia dhe ekstremistët e së majtës.
Lëvizja e protestave në Shqipëri nisi në maj dhe fillimisht ishte paqësore. Ajo u udhëhoq nga aktivistë mjedisorë, të zemëruar për një projekt të planifikuar zhvillimi luksoz, të lidhur me Jared Kushnerin, dhëndrin e presidentit Trump. Megjithatë, protesta u shndërrua shpejt në një shpërthim më të gjerë pakënaqësie për korrupsionin, standardin e jetesës dhe qëndrimin e gjatë të zotit Rama në postin e kryeministrit.
Javën e kaluar, lëvizja mori një tjetër drejtim, kur studentët, të pakënaqur me kostot e larta të arsimit dhe rritjen e shpenzimeve të jetesës, iu bashkuan protestave, duke u dhënë një shtysë të re demonstratave që po humbnin vrullin. Në të njëjtën kohë, një shpërthim i papritur dhune të enjten e paralizoi kryeqytetin, Tiranën.
Të dielën, protestues të maskuar sulmuan një komisariat policie në qendër të Tiranës dhe i vunë flakën me kokteje molotovi. Sipas raportimeve të mediave, pesë efektivë policie mbetën të plagosur. Edhe muret e jashtme dhe dyert e Ministrisë së Brendshme dhe të Ministrisë së Infrastrukturës u përfshinë nga flakët.
Edhe selia e Partisë Socialiste në pushtet u sulmua, ndërsa persona të ndryshëm thyen xhamat duke hedhur gurë.
Studentët i kanë lënë pas kërkesat e tyre fillestare për koston e jetesës dhe arsimit, duke shpallur tashmë dorëheqjen e zotit Rama si kërkesën e tyre të vetme.
Kreu i Partisë Demokratike, forca kryesore opozitare në Shqipëri, Sali Berisha, i cili është përpjekur të përfitojë politikisht nga trazirat për të përmirësuar pozitat e tij të dobësuara politike, mbështeti thirrjet për dorëheqjen e zotit Rama, duke deklaruar se vetëm kjo mund të qetësojë tensionet. Megjithatë, protestuesit kanë ruajtur distancën nga opozita, duke kërkuar që si zoti Berisha, ish-kryeministër, ashtu edhe zoti Rama të përfundojnë në burg.
Në reagimin e tij të parë të detajuar ndaj dhunës, të dielën zoti Rama deklaroi se studentët, të cilët në dukje janë në krye të protestave, janë “marrë peng” nga një grup i vogël prej 200 deri në 300 personash të maskuar, të cilët “nuk kanë asgjë të përbashkët me studentët” dhe synojnë vetëm të krijojnë kaos e të pengojnë ambiciet e Shqipërisë për t’u anëtarësuar në Bashkimin Evropian. Shqipëria është tashmë anëtare e NATO-s.
Komisioni Evropian, krahu ekzekutiv i Bashkimit Evropian me seli në Bruksel, deklaroi të dielën se “dënojmë përdorimin e dhunës në Tiranë dhe në qytete të tjera të Shqipërisë, përfshirë zjarrvëniet, sulmet ndaj institucioneve shtetërore dhe shkatërrimin e pronës publike dhe private”. Duke theksuar se vendet që synojnë t’i bashkohen bllokut evropian duhet t’i trajtojnë pakënaqësitë “në mënyrë paqësore”, Komisioni shtoi: “Mirëpresim angazhimin e autoriteteve shqiptare për të garantuar mbrojtjen e së drejtës për të protestuar”.
Ndërsa në rrjetet sociale po qarkullojnë pamje të ndërtesave të përfshira nga flakët gjatë protestave në Francë, disa demonstrues shqiptarë kanë nisur të bëjnë thirrje për revolucion edhe në vendin e tyre. Të zhgënjyer nga dështimi për ta larguar zotin Rama nga pushteti pas muajsh protestash paqësore, ata thonë se janë frymëzuar nga zhvillimet në Francë.
Zoti Rama deklaroi se forcat e sigurisë kishin “neutralizuar” një dron që transportonte eksplozivë, përpara se ai të përdorej për të goditur zyrën e kryeministrit dhe për t’i vënë flakën një strukture prej druri në oborrin e saj. Sipas tij, droni ishte “vepër e një dore të jashtme”, pa dhënë detaje nëse kishte ndonjë person apo palë të caktuar në mendje.
“Asnjë i ri, asnjë student dhe asnjë i mitur nuk do të mendonte për një plan të tillë, e aq më pak ta vinte atë në zbatim”, u shpreh ai.
Duke dënuar atë që e cilësoi si “dhunë të verbër”, zoti Rama tha: “Të rinjtë janë të zhgënjyer, po. Ata janë të zemëruar. Studentët duan më shumë; duan ndryshim. Kështu ka qenë gjithmonë dhe kështu do të jetë gjithmonë. Është në natyrën e tyre”.
Megjithatë, ai tha se të rinjtë po përdoren “pothuajse si mburoja njerëzore” nga ekstremistë të dhunshëm, të cilët synojnë të çajnë kordonët e policisë për të sulmuar ndërtesat qeveritare, bankat dhe bizneset.
“E kemi parë të njëjtin skenar të përsëritet edhe në vende të tjera, megjithëse në kontekste të ndryshme: në Francë, Itali, Portugali, Bruksel e Belgjikë, si dhe në Spanjë”, tha ai. Kryeministri shtoi se “në të gjitha këto vende kemi parë të njëjtin fenomen, këtë të ashtuquajturën lëvizje Antifa — një murtajë të të çmendurve dhe neokomunistëve”.
Sipas tij, ndryshe nga vendet e tronditura nga protestat e Gjeneratës Z në Evropën Perëndimore, Shqipëria ka më shumë mundësi për të frenuar kaosin, për shkak të përvojës së saj me anarkinë në vitin 1997, kur kolapsi i skemave piramidale të investimeve, të cilat premtonin pasurim të shpejtë, shkaktoi trazira të gjera civile.
“E kemi parë Shqipërinë të mbahet peng nga marrëzia”, tha ai.
Rama, i cili vitin e kaluar fitoi një mandat të katërt në zgjedhjet parlamentare me një rezultat dërrmues, ka qëndruar në detyrë për 13 vjet dhe ka qenë pjesë e qeverisjes shqiptare, në role të ndryshme, që prej vitit 1998.
Ai fajësoi “forcat e jashtme” për kthesën e papritur drejt dhunës gjatë javës së kaluar, duke deklaruar se tensionet ishin nxitur nga dezinformimi i shpërndarë në rrjetet sociale nga Irani dhe Rusia. Irani ka pasur prej kohësh marrëdhënie armiqësore me zotin Rama, pasi qeveria e tij ka refuzuar të dëbojë disidentët iranianë që strehohen në Shqipëri.
Alexander Dugin, një filozof rus, nacionalizmi i skajshëm dhe qëndrimet e tij kundër Perëndimit kanë gjetur mbështetje në Kremlin, ka shprehur publikisht përkrahje për protestuesit shqiptarë. Në një postim në rrjetet sociale të shtunën, ai i cilësoi shqiptarët si një “popull shumë interesant dhe trim”, që “po zgjohet tani”./ Përshtati në shqip Alfapress.al
Po ndodh...
Elitat heshtin, Rama bën pazare, shqiptarët paguajnë!
Nga Indrit Gjyzeli
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128