Lajme flash
Skandali 20-miliardësh/ Gianni Infantino ia shet Kampionatin Botëror kapitalit privat! Hyn në lojë dhëndri i Trump
29 July 2026, 13:45 / SPORT
Gianni Infantino i hap dyert e FIFA-s për kapitalin privat dhe nxit një luftë të hapur me Nyon-in (selinë e UEFA-s).
Krijimi i “FIFA Forward Enterprise” synon të mbledhë 4.2 miliardë dollarë duke shitur aksione pakice të Kampionatit Botëror. Midis financuesve është edhe fondi i vëllait të kunatit të Trump. UEFA nuk e ka pritur aspak mirë këtë lëvizje dhe ka folur për një mungesë serioze transparence.
Është një bombë me sahat e vërtetë ajo e plasur nga e përditshmja britanike Financial Times dhe e konfirmar menjëherë nga Cyrihu: Gianni Infantino po ia shet futbollin fondeve private. Presidenti i FIFA-s ka njoftuar zyrtarisht planin për krijimin e “FIFA Forward Enterprise” (FFE), një holding komercial i vlerësuar me 20 miliardë dollarë (rreth 17.5 miliardë euro), i destinuar të menaxhojë në mënyrë ekskluzive të drejtat dhe makinerinë organizative të Botërorit dhe Botërorit për Klube.
Qëllimi i deklaruar është të mblidhen 4.2 miliardë dollarë (3.7 miliardë euro) deri në fund të vitit, duke shitur aksione pakice (“pa kompetenca kontrolli”, saktëson FIFA) te blerës të përzgjedhur me kujdes. Mes kolosëve të përfshirë është banka e investimeve nga Nju Jorku, JP Morgan, por ajo që po dridh pallatet e politikës dhe sportit është prania mes investitorëve potencialë e Thrive Eternal, një fond i udhëhequr nga Joshua Kushner, vëllai i Jared Kushner (dhëndrit të Donald Trump).
”Kjo kapërcen një kufi që institucionet drejtuese të futbollit nuk duhet ta kalojnë kurrë”, deklaron UEFA, duke e konsideruar këtë situatë tepër serioze. “Shpirti dhe qeverisja e futbollit nuk janë mallra për t’u nxjerrë në treg, aq më tepër në mungesë të plotë të transparencës se kush do të përfitonte ekonomikisht prej saj.”
Lidhjet mes Infantinos dhe rrethit të Donald Trump nuk janë diçka e re, por pas përfundimit të Botërorit të fundit në SHBA, Kanada dhe Meksikë (i cili solli të ardhura rekorde prej rreth 12 miliardë dollarësh), sinergjia politike dhe ekonomike është forcuar edhe më shumë, duke nxitur reagime të ashpra nga UEFA dhe federatat evropiane.
Për të zbutur pakënaqësitë e brendshme të 211 federatave kombëtare anëtare, Infantino nxori armën e tij të zakonshme të joshjes masive: paratë. Gjatë takimit në Manhattan më 18 korrikun e kaluar, në prag të finales së Botërorit Spanjë-Argjentinë, kreu i FIFA-s premtoi një injektim likuiditeti të padëgjuar më parë përmes programit “FIFA Fast-Forward Program”.
”Bëhet fjalë për demokratizimin e futbollit në nivel global”, u mbrojt Infantino përmes një komunikate, duke e cilësuar këtë kthesë si të vetmen rrugë për “të çliruar potencialin tregtar të pashfrytëzuar”. Por prapa deklaratave për demokratizim, ka nga ata që shohin një manovrë të pamëshirshme për të siguruar mbështetjen elektorale në prag të votimit të vitit të ardhshëm, ku Infantino po shkon drejt rizgjedhjes me aklamacion për mandatin e tij të katërt dhe të fundit deri në vitin 2031.
Nuk është hera e parë që drejtuesi zviceran tenton një goditje me kapitalet e mëdha të investimeve. Që në vitin 2018 ai tentoi të kalonte një ofertë sekrete prej 25 miliardë dollarësh për 12 vjet, të hartuar nga gjiganti SoftBank dhe e mbështetur nga kapitali i Arabisë Saudite. Ajo kohë u karakterizua nga vetoja e përbashkët e UEFA-s dhe klubeve evropiane që përmbysi planin, duke shpëtuar Ligën e Kampionëve dhe Kampionatin Evropian.
Ndërkohë, megjithatë, marrëdhëniet strategjike me Rijadin janë konsoliduar: Arabia Saudite sponsorizoi Botërorin super të pasur për Klube 2025 në SHBA (të fituar nga Chelsea 3-0 ndaj PSG-së) dhe ka marrë zyrtarisht organizimin e Botërorit 2034. Në prapaskenë mbetet misteri mbi të ardhmen personale të Infantinos. E përditshmja The Times zbulon se për të po studiohet pozicioni i “Komisionerit”/CEO-s super të paguar në krye të FFE-së së re, një rol operativ si “super boss” global, i çliruar nga kufizimet e mandateve institucionale. FIFA ka mohuar që kjo hipotezë të jetë diskutuar formalisht, megjithëse ka pranuar se “presidenti do të ketë dhe duhet të ketë një rol udhëheqës në entitetin e ri”.
Beteja ligjore dhe politike sapo ka filluar. Qeverisja e topit dridhet, ndërsa fondet amerikane dhe saudite po ndezin motorët për të marrë bizhuterinë më të madhe të futbollit botëror.
Kryeministri britanik Burnham sulmon FIFA-n: “Ky sport u përket tifozëve dhe jo investitorëve.”
Kryeministri britanik Andy Burnham deklaroi se “futbolli nuk u përket investitorëve”, duke iu bashkuar kritikave ndaj planit të FIFA-s për të krijuar një shoqëri të re private për menaxhimin e Kupës së Botës dhe kompeticioneve të tjera. Të martën, FIFA njoftoi synimin për të lansuar FIFA Forward Enterprise (FFE), një pobudë që do të bashkonte shitjen e të drejtave komerciale të FIFA-s me menaxhimin operativ të turneve të saj.
Organi i ri do të jetë i hapur për investitorët privatë dhe u dënua menjëherë nga UEFA, e cila në një deklaratë tha se “shpirti dhe menaxhimi i futbollit nuk janë mallra për t’u tregtuar”. Burnham, një tifoz i Evertonit, publikoi një reagim në rrjetet sociale për t’iu bashkuar korit të kritikave:
”Më lejoni ta them këtë shumë drejtpërdrejt. Futbolli nuk u përket investitorëve. U përket njerëzve që mbushin shkallët e stadiumeve dhe që qëndrojnë në anë të fushës javë pas jave, me shi apo me diell”, tha Burnham.
BE-ja kundër planit komercial të FIFA-S: “Duart larg nga sporti ynë.”
”Këtu nuk jemi në bejsboll. Kupa e Botës mbetet turneu më i madh sportiv në planet, me gjithë shfrytëzimin e çdo mundësie komerciale nga FIFA. Por çdo gjë ka një kufi. Komercializimi i pandalshëm i futbollit është bërë gërryes. Po kërcënon elementët që e bënë futbollin sportin më të populluar në botë. Suksesi komercial duhet të përforcojë futbollin, jo ta gllabërojë atë. Duart larg nga sporti ynë” — shkruan në platformën X komisioneri i BE-së për Sportin, Glen Micallef, duke komentuar planin e ri të FIFA-s.
Micallef nënvizon më tej:
Konflikti i interesit: “Një shqetësim i veçantë lind kur kompetencat rregullatore të FIFA-s përputhen me interesat financiare të entiteteve private; domethënë, kur vlera e investimeve varet nga vendimet e marra nga FIFA. Kjo ngre pyetje të thella sa i përket qeverisjes, pavarësisë dhe konfliktit të interesave.”
Çështjet ligjore: “Këto propozime ngrenë pyetje të rëndësishme lidhur me të drejtën e konkurrencës. Siç është njohur vazhdimisht nga Gjykata e Drejtësisë e Bashkimit Evropian, rregullat sportive i nënshtrohen të drejtës së BE-së kur ato prodhojnë efekte ekonomike. Komisioni Evropian do t’i shqyrtojë me kujdes këto propozime.”
Komisioneri maltez përfundoi duke mbështetur UEFA-n dhe duke i bërë thirrje çdo federate kombëtare të nisë një dialog domethënës me ligat, klubet, futbollistët dhe tifozët përpara se të mbajë një qëndrim zyrtar.
FIFA: “Kushner Jr, është CEO i grupit investues, vetëm pakica e aksioneve janë në shitje.”
Kompania e fondeve ku Jared Kushner është CEO është mes investitorëve për blerjen e kuotave të shoqërisë së re që zotëron të drejtat komerciale të Kupës së Botës, “por investitorët privatë do të zotërojnë vetëm një aksion pakice, jo të FIFA-s, por të një shoqërie bijë të saj”.
Këtë e saktëson një zëdhënës i FIFA-s pas bujës së madhe mediatike. Kompania Thrive, ku Kushner Jr. është CEO, “pritet të udhëheqë grupin e investitorëve të propozuar. Jared Kushner nuk është një investitor personal. Presidenti i FIFA-s dhe administrata kanë për detyrë të kontrollojnë zhvillimin e këtij projekti”.
Po ndodh...
ide
Protesta si furra ku po farkëtohet sistemi i ri politik
Nga Red Varaku
Një Parlament kllounësh!
Nga Sidi Hasanaj
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128